ESODƆS 36
36
1Nioso Besalel ku Oholiab ku batii ba bamuu di SAATE nwu lɛta ni lɛsaatofo ku ninumbe alɛ baatofo mmle okle baabla ni ɔkpɛ wɔ omuu baabla mantofo ni lɛkpaayo klekle nwu, dikpenii, bɛɛbla lɛsaa biala fɛ mmle di SAATE nwu lakpee ma ni kufiofa.”
2Nioso Mose lalɛɛ Besalel ku Oholiab ku batii ba bamuu nin-ye ni kɔnɛɛ kamɛ sɛkpɛ di SAATE nwu lata ni lɛsaatofo ku mba niatuna alɛ bɔɔwa mamabla ni ɔkpɛ nwu nkpo. 3Mose layɔ asaa ya amuu di Israel batii nwu lata alɛ batofo ni lɛkpaayo klekle nwu aata ma. Kafɔɔ Israel batii nwu lakple baatɔɔwako asaaɔta lɛma olesɛ biala. 4Ta nni nkpo oso, kɔnɛɛ kamɛ bakpɛmblatɛ nwu bamuu niatɔɔbla ni ɔkpɛ di Lɛkpaayo klekle nwu suoto, baadiɛ ɔkpɛ, 5ni baalaatɔkɔ Mose alɛ, “Batii nwu nkpo kokple manwako asaa manlenkeesa ɔkpɛ wɔ di SAATE nwu nkpo lekpee kufiofa alɛ bubla nii.”
6Nioso Mose lata kanya baayie lɛkya di kasikɔ lɛma nwu alɛ, “Osuɔtɔ ee, ɔsanko kuonwii atansinwako lɛsalɛsaa fɛ asaaɔta, ata lɛkpaayo klekle nwu otofo.” Nioso baata batii nwu nfɛ ladiɛ asaa ɔyɔ ɔwako. 7Diekye asaa nwu nkpo baasiisa ni nfɛ lapɔ aalenkee n-ya niafĩ aata ni ɔkpɛ nwu nkpo ɔbla.
Lɛkpaayo Nwu Klekle Otofo
8Batii ba bamuu nin-ye ni kɔnɛɛ kamɛ sɛkpɛ nwaa di bakpɛntɛ nwu kamɛ batofo lɛkpaayo nwu ku abula biene fɛnɛnɛɛ losole ku seleteku bluu ku nse niɛbla ni fɛ ɔsɛɛ ku sɛsɛɛle bɔmbɔ, baata mba nin-ye ni kɔnɛɛ kamɛ sɛkpɛ nwaa baloso bakerubim baakpee kaamɛ. 9Abula nwu amuu nimuɔ lakyɛkyɛ, lɛkaana lɛnya labla nkpaa afosi ana nkpaa nnyɔ, lɛblɛfɛ lɛnya kafɔɔ labla nkpaa nkuɔ. 10Bakaa abula nwu nkpo anɔɔ bakyasa, baayɔ anɔɔ bule kafɔɔ bakaa bakyasa. 11Ni baayɔ bluu dibula le baamumufũ baakaa ni baatika atoko di dibula nwu ninwii suoto nɛ. Ni baabla nkpo okle kafɔɔ di kakyɛ nyɔɔfa suoto nɛ. 12Baabla kafɔɔ dibula le baamumufũ baakaa baatika ni di atokosi nwu suoto dibla afosi anɔɔ kaakyɛ kanwii nɛ. Ni baabla afosi anɔɔ kafɔɔ di kakyɛ nyɔɔfa suoto nɛ. 13Ninfɛ baayɔ koto sɛɛle baabla amufũsaa afosi anɔɔ, baayɔ bamufũ abula nwu nkpo baakyasa, alɛ lɛkpaayo nwu kabla ninwii nɛ.
14Ninfɛ baayɔ batie sinwini baaloso abula baaba lɛkpaayo nwu, diabla lefosi dibula ninwii. 15Lefosi dibula ninwii nwu nkpo amuu lɛkaana lakyɛkyɛ diaba nkpaa afosi ana nkpaa nnɔɔ, lɛblɛfɛ kafɔɔ labla nkpaa nkuɔ. 16Baakaa abula nwu anɔɔ baakyasa baabla ninwii, ni baakaa akuɔ bule kafɔɔ baakyasa baabla ninwii nɛ. 17Ni baabla atoko atikasaa afosi anɔɔ baatika di dibula nwu kakyɛ kanwii suoto, ni baabla nkpo okle kafɔɔ di dibula kakyɛ nyɔɔfa suoto nɛ. 18Ni baabla abɔɔsaa amufũsaa baamufũ lɛkpaayo nwu baakyasa baabla ninwii nɛ. 19Ni baakple baabla abansaa bamba anyɔ baatika di lɛkpaayo nwu osi nɛ. Baayɔɔ dikunumuu kukũ baakpee ni kɔfa sɛɛle baabla ninwii, ni baayɔ ntu kamɛ nankyue kafɔɔ baabla lɛnyɔɔfa nɛ.
20Ni baayɔ akesia sewoso baawola n-yokontũ sewoso baata lɛkpaayo nwu nɛ. 21Nn-yokontũ sewoso nwu biala lɛtaka labla lefosi nkpaa nnɔɔ, lɛblɛfɛ kafɔɔ labla nkpaa nnyɔ anɛɛkpa atiɛ. 22Baakya sewoso nwu nkpo kalɔ badiki akyɛɛ anyɔ. Nkpo okle baawola lɛkpaayo nwu nkpo n-yokontũ sewoso nwu simuu nɛ. 23Baawola lɛkpaayo nwu nkpo kala lɛkyɛ n-yokontũ sewoso afosi anyɔ. 24Ni baayɔ koto fututu kafɔɔ baabla asɔse afosi ana baakpee seewoso nwu kalɔ nɛ. Asɔse anyɔ lasiɛ di kayokontũ sewoso nwu biala kalɔ, lɛkyɛɛ biala lasiɛ di lɛsɔse ninwii kalɔ. 25Di lɛkpaayo nwu nkpo katoo lɛkyɛ yi, baawola n-yokontũ sewoso afosi-anyɔ. 26Baabla kafɔɔ koto fututu asɔse afosi ana. Asɔse anyɔ lasiɛ di kayokontũ sewoso biala kalɔ. 27Baawola n-yokontũ sewoso ekuɔ bata lɛkpaayo nwu nkpo di kufĩ katunkɔ 28Baawola kafɔɔ n-yokontũ ewoso ɛnyɔ baata sɛmaa ayokɔ kayɛntɛlekɔ nwu. 29Di n-yokontũ sewoso akɔ ya mmle anyɔ yi, baakyasa n-yokontũ nwu baakyeko kalɔ baalaase di osi, baayɔ baakpee di lɛkɔnii ninwii kamɛ. Nkpo baabla anyɔ nwu nɛ. 30Nkpo oso diabla n-yokontũ sewoso ɛnɛ, koto fututu asɔse kafɔɔ labla lefosi akuɔ. Asɔse anyɔ di kayokontũ kowoso biala kalɔ.
31Baayɔ akesia kowoso kafɔɔ baawola selenle ɛnɔɔ baata n-yokontũ sewoso nwu di lɛkpaayo nwu kakyɛ kanwii 32ɛnɔɔ kafɔɔ baata mbe ninkpe ni kaakyɛ nyɔɔfa, ɛnɔɔ kafɔɔ baata n-yokontũ be ninkpe ni di kufĩ kamɛɛkɔ lɛkyɛ di lɛkpaayo nwu kayɛntɛlekɔ nwu. 33Baabla ntɛɛ olenle nwu nnwu, kuakye ntɛɛ n-yokontũ sewoso nwu disile ku disile. 34Baayɔ koto sɛɛle batĩi n-yokontũ sewoso nwu nkpo, baabla kafɔɔ koto sɛɛle nkɔnii bakleesa selenle nwu nkpo. Batĩi selenle nwu kafɔɔ ku koto sɛɛle.
35Bayɔ abula biene ya bɛɛyɔ seleteku fututu ku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole bata batii ba nin-ye ni ɔkpɛ nwaa baloso bakerubim bakpee kaamɛ. 36Baayɔ koto sɛɛle amufũsaa bamufũ basaka di akesia akpaka ana ya baayɔ koto sɛɛle baatĩi ni, aayila ni di koto fututu asɔse ana suoto. 37Lɛkpaayo nwu kayoko yi, bayɔ seleteku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole bata saalosotɛ aloso dibula batĩi kayoko nwu; 38baayɔ koto sɛɛle kafɔɔ babla abula nwu nkpo amufũsaa, baabla akesia sewoso akpaka anɔɔ, baayɔ koto sɛɛle batĩi nya nsintɛɛ. Ni baayɔ abɔɔsaa kafɔɔ baabla asɔse anɔɔ baata nya nɛ.
Currently Selected:
ESODƆS 36: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
