ESODƆS 26
26
SAATE Nwu Latuo Mmle Baapɛ Ni Lɛkpaayo Nwu Ku Mmle Baasaka Ni Kamɛ Abula
1“Pɛ Lɛkpaayo Klekle nwu ku abula lefosi ya bɛɛyɔ seleteku biene fɛnɛnɛɛ losole ku bluu ku nse niɛbla ni fɛ ɔsɛɛ ku sɛɛsɛle bɔmbɔ di batii ba nin-ye ni ɔkpɛ nwu nwaa leloso bakerubim beetika ni di suoto. 2Abula nwu nkpo amuu nimuɔ akyɛkyɛ, lɛkaana lɛnya abla nkpaa afosi ana nkpaa nnyɔ, lɛblɛfɛ lɛnya kafɔɔ abla nkpaa nkuɔ. 3Kaa abula nwu nkpo anɔɔ fakyasa, faabla anɔɔ bule kafɔɔ laakpanwu. 4Faayɔ bluu dibula le feemumufũ fɛɛkaa ni fatika atoko di dibula nwu ninwii suoto, faabla laakpanwu di kakyɛ nyɔɔfa suoto. 5Dibula le Feemumufũ fɛɛkaa ni di atokosi nwu suoto dibla afosi anɔɔ kaakyɛ kanwii, diɛbla afosi anɔɔ kafɔɔ di kakyɛ nyɔɔfa suoto. 6Faayɔ koto sɛɛle fabla amufũsaa afosi anɔɔ, faayɔ famufũ abula nwu nkpo fakyasa, alɛ lɛkpaayo nwu kabla ninwii.
7“Faayɔ batie sinwini fabla lefosi dibula ninwii fabatĩi ni lɛkpaayo nwu. 8Lefosi dibula ninwii nwu nkpo amuu abla kyɛkyɛ, lɛkaana lɛnya abla nkpaa afosi ana nkpaa nnɔɔ, lɛblɛfɛ lɛnya kafɔɔ abla nkpaa nkuɔ. 9Kaa abula nwu nkpo anɔɔ fakyasa fabla ninwii, faakaa kafɔɔ akuɔ bule fakyasa fabla ninwii. Faakatu dibula kuɔnle nwu nkpo fakaasa baawo di lɛkpaayo nwu nkpo anu. 10Faabla dibula le feemumufũ fɛɛkaa ni afosi-anɔɔ fatika atokosi di kakyɛ kanwii, faatika atokosi nwu nkpo okle kafɔɔ di kakyɛ nyɔɔfa. 11Faayɔ abɔɔsaa afosi anɔɔ fabla amufũsaa fakpee di atokosi nwu nkpo famufũ lɛkpaayo nwu nkpo bakyasa fabla ninwii. 12Dibula le niebu disaka ni di lɛkpaayo nwu nkpo sɛmaa yi, ta disaka diwa kasɔ. 13Lɛkpaayo nwu nkpo abula nwu niebu asaka ni disi le ku disi le, diɛbla ni fɛ lefosi anɛɛkpa anɛ, asaka atĩi lɛkpaayo nwu. 14Faayɔ dikunumuu kukũ feekpee ni kɔfa sɛɛle faba lɛkpaayo nwu. Di nkunkpo sɛmaa, faakple fayɔ ntu kamɛ nankyue kukũ fatika di osi.
15“Yɔ akesia kowoso fawola lɛkpaayo nwu nkpo n-yokontũ sewoso. 16Kayokontũ biala sewoso lɛtaka dibla lefosi nkpaa nnɔɔ, di lɛblɛfɛ nimi kafɔɔ dibla nkpaa nnyɔ anɛɛkpa atiɛ, 17faakya sewoso nwu nkpo kalɔ badiki akyɛɛ anyɔ. Nkpo okle faawola lɛkpaayo nwu nkpo n-yokontũ sewoso nwu simuu nɛ. 18Wola lɛkpaayo nwu nkpo kala lɛkyɛ n-yokontũ sewoso afosi-anyɔ. 19Faayɔ koto fututu kafɔɔ fabla asɔse afosi-ana fakpee di sewoso nwu kalɔ. Asɔse anyɔ asiɛ di kayokontũ sewoso nwu biala kalɔ, lɛkyɛɛ biala lɛsɔse ninwii. 20Di lɛkpaayo nwu nkpo katoo lɛkyɛ yi, wola n-yokontũ sewoso afosi-anyɔ. 21Faabla kafɔɔ koto fututu asɔse afosi-ana. Asɔse anyɔ asiɛ di kayokontũ owoso biala kalɔ. 22Faawola n-yokontũ ewoso ekuɔ fata lɛkpaayo nwu nkpo di kufĩ kamɛɛkɔ, 23faawola kafɔɔ n-yokontũ ewoso ɛnyɔ fata sɛmaa ayokɔ kayɛntɛlekɔ nwu 24Di n-yokontũ sewoso akɔ ya mmle anyɔ yi, dikpenii fɛɛkyasa sĩ feekyeko kalɔ fɛɛlaase di osi, fɛɛyɔ feekpee di lɛkɔnii ninwii kamɛ. Nkpo faabla anyɔ nwu nɛ. 25Nkpo oso dibabla n-yokontũ ewoso ɛnɛ, koto fututu asɔse kafɔɔ mabla lefosi akuɔ. Asɔse anyɔ di kayokontũ owoso biala kalɔ.
26“Yɔ akesia kowoso kafɔɔ fawola elenle ɛnɔɔ fata n-yokontũ ewoso nwu di lɛkpaayo nwu kakyɛ kanwii, 27ɛnɔɔ kafɔɔ fata mbe ninkpe ni kaakyɛ nyɔɔfa, ɛnɔɔ kafɔɔ fata n-yokontũ be ninkpe ni di kufĩ kamɛɛkɔ lɛkyɛ di lɛkpaayo nwu kayɛntɛlekɔ nwu. 28Ntɛɛ olenle nwu nnwu, kukye ntɛɛ n-yokontũ ewoso nwu disi le ku disi le. 29Faayɔ koto sɛɛle batĩi n-yokontũ ewoso nwu nkpo, faabla kafɔɔ koto sɛɛle nkɔnii sieklee selenle nwu nkpo. Batĩi selenle nwu kafɔɔ ku koto sɛɛle.
30“Pɛ lɛkpaayo nwu nkpo di mmle okle latuo fɔ ni kanya di kobokote nwu nkpo suoto.
31“Yɔ dibula le bɛɛyɔ seleteku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibene fɛnɛnɛɛ losole di batii ba nin-ye ni ɔkpɛ nwu nwaa leloso bakerubim beetika ni di suoto. 32Faayɔ koto sɛɛle amufũsaa famufũ fasaka di akesia akpaka ana ya fɛɛyɔ koto sɛɛle feetĩi ni, ayɛ ni di koto fututu asɔse ana suoto. 33Yɔ abula nwu nkpo basaka di asakasaa suoto, faayɔ kanya ninii lɛlakaa nwu nkpo kafɔɔ fase di dibula nwu sɛmaa. Dibula nwu kamasɛ Kakleklekɔ nwu di Kakleklekɔ kaamɛ Kakleklekɔ nwu suoto. 34Faayɔ lekoto otikiti katĩita nwu fatĩi Kanya Ninii lɛlakaa nwu di Kakleklekɔ kaamɛ Kakleklekɔ kamɛ. 35Faayɔ opunu nwu nkpo fase di dibula nwu nkpo sitũ di lɛkpaayo nwu kamɛ kaatoo lɛkyɛ. Faayɔ kandiɛ ditikasaa nwu kafɔɔ fase di kala lɛkyɛ.
36“Lɛkpaayo nwu nkpo kayoko yi, yɔ seleteku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole fata asaalosotɛ aloso dibula nwu. 37Yɔ koto sɛɛle fabla dibula nwu nkpo amufũsaa, faabla akesia sewoso akpaka, faayɔ koto sɛɛle batĩi nya, faayɔ abɔɔsaa kafɔɔ fabla asɔse fata nya.
Currently Selected:
ESODƆS 26: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
