ESODƆS 25
25
Asaa Okũ Ɔta Ole Katakɔ Nwu Otofo
1Ninfɛ di SAATE nwu latɔkɔ Mose alɛ, 2“Tɔkɔ Israel batii baakũ asaa bawakoe. Fũ asaa okũ nwu nkpo fatɛɛ, fakyeko otii biala nfũ dieekye nwɔ di otu kamɛ alɛ ɔɔta ni. 3Nnya asaa okũ ya mmle okle faafũ fakyeko ni ɔkyɛ lɛma. Koto sɛɛle, koto fututu ku kupa; 4abula biene fɛnɛnɛɛ bluu ku n-ya niɛbla ni fɛ ɔsɛɛ, okũ sɛɛle ku dibula fɛnɛnɛɛ fututu, batie sinwini akpeele ku; 5akunumuu akũ ya beekpee ni kɔfa sɛɛle ku ntu kamɛ banankyue akũ ku akesia sewoso; 6nnɔnyi awosobi nnɔnyi be mankpete ni baakaniɛ kamɛ ku nnɔnyi kɔnɔkɔnɔ ku siduufii man-yɔ mampɛ ni ɔfɔɔ; 7ku oniks afuɔ ku afuɔ ya niefũ ni kɔya alɛ baayɔ mankakaasa ni di olebatatɛ simu akpeele ku ntɛɛditikasaa suoto.
8“Faata Israel batii nwu nkpo batofo lɛkpaayo klekle batɛɛ, alɛ kasiɛ ma kaamɛ. 9Batofo lɛkpaayo nwu nkpo, baase asaa ya nimayila ni kaamɛ fɛ mmle okle kamatuo fɔ ni.
Yaa Latuo Mmle Okle Baabla Ni Kanya Ninii Lɛlakaa Nwu
10“Ta ma bayɔ akesia kowoso bawola lɛlakaa, diɛkaana nkpaa nnyɔ ku anɛɛkpa anaasĩ, lɛblɛfɛ dibla kɔkpaa kunwii ku anɛɛkpa atiɛ, di lɛtaka kafɔɔ dibla kɔkpaa kunwii ku anɛɛkpa atiɛ. 11Baayɔ koto sɛɛle nwaa batĩi kayi ku kamɛ, baaloso koto sɛɛle batika di katĩita nwu atokosi bakyisa. 12Baabla koto sɛɛle nkɔnii nna bakaasa di nkpaa nna nwu kasekɔ. Nkɔnii nnyɔ diwɛ di kakyɛ kanwii di nkɔnii nnyɔ kafɔɔ diwɛ di kakyɛ nyɔɔfa. 13Baayɔ akesia kowoso bawola sewoso kyɔlɔlɔɔ, baayɔ koto sɛɛle batĩi sĩ. 14Baayɔ sewoso kyɔlɔlɔɔ nwu nkpo batũ di akɔnii nwu nkpo kamɛ di lɛlakaa nwu suoto di kakyɛ biala. 15Sewoso nwu nkpo sisiɛ di nkɔnii nwu nkpo kamɛ di lɛlakaa nwu suoto, batandiki sĩ. 16Nse lɛyɔ afiofa lefosi nwu nkpo kamakpana ntika ni di afuɔ nkyɛ nnyɔ nwu suoto lɛta fɔ yi, faayɔ fankpee di lɛlakaa nwu kamɛ.
17“Faata ma bayɔ koto sɛɛle nwaa babla lɛlakaa nwu katĩita lɛba le kamayɔ mbla ni lekoto otikiti nta ma ni, lɛkaana dibla nkpaa nnyɔ ku anɛɛkpa anaasĩ, lɛɛblɛfɛ kafɔɔ dibla nkpaa nnyɔ ku anɛɛkpa atiɛ. 18Baayɔ koto sɛɛle babla bakerubim#25.18bakerubim babɔkɛɛ ba ninkpe ni afoko banyɔ batika di katĩita nwu suoto disi le ku disi le. 19Bla kerub nwu onwii diisi le onwii kafɔɔ diisi le, kafɔɔ koto sɛɛle ko babayɔ mambla ni bakerubim nwu nkpo banyɔ kakya di katĩita nwu suoto. 20Bakerubim nwu nkpo bamunikĩisa anu bakyɔɔ bawo, baatakatɛsa afoko lɛma bakyɔɔ osi, di kunyii lɛma kutĩi katĩita nwu nkpo, anu lɛma kafɔɔ ntoonyu katĩita nwu. 21Faayɔ afuɔ nkyɛ nnyɔ nwu nkpo kamata fɔ ni di afiofa lefosi nwu ntika ni fakpee di lɛlakaa nwu nkpo kamɛ, faayɔ katĩita nwu nkpo fatĩi kanya. 22Bakerubim nwu nintika ni di kanya ninii lɛlakaa nwu osi obo kamadiki suoto ntuo fɔ. Nfa kamatɔkɔ fɔ kufiofa nii ko kumuu fabayɔ fanta ni Israel batii nɛ.
Yaa Latuo Mmle Okle Baabla Ni Bloblo Klekle Opunu
23“Bayɔ akesia kowoso bawola opunu kuɔkaana nkpaa ntiɛ, lɛblɛfɛ kafɔɔ dibla kɔkpaa kunwii ku anɛɛkpa akuɔ, di lɛtaka ninwu kafɔɔ kubla nkpaa nnyɔ ku anɛɛkpa atiɛ. 24Baayɔ koto sɛɛle nwaa batĩi nwu, baaloso koto sɛɛle bakpee nwu lɛkpankyila. 25Baatika nwu atokosi lɛblɛfɛ dibla anɛɛkpa atiɛ, baaloso koto sɛɛle batika di atokosi nwu. 26Baabla koto sɛɛle nkɔnii nna bakaasa di nfũ di opunu nwu nkpaa nkpe ni. 27Nkɔnii nwu nkpo dikaako opunu nwu nkpo atokosi alɛ diamufũ sewoso se babayɔ mankpee mantɔɔkɛnkɛ nwu ni. 28Wola akesia sewoso kyɔnkylɔlɔ, faayɔ koto sɛɛle fatĩi sĩ, babayɔ mankpee mantɔɔkɛnkɛ ni opunu nwu. 29Faayɔ koto sɛɛle nwaa fabla babɛɛsitɛnkle ku akaku ku sipũ ku nsɛfɛ babatɔɔnyɛɛnɛ asaaɔta asaa mantookpete ni. 30Faayɔ Yaa bloblo fatika di opunu nwu suoto di anu nii obe lele.
Yaa Latuo Mmle Okle Baabla Ni Kandiɛ Ditikasaa Nwu
31“Faayɔ koto sɛɛle nwaa leboo fawola kandiɛ ditikasaa fadiki kaamɛ, kalɔ nɔɔ ku ntɛɛ kawesee nwu. Nnɔnyi akpetesaa ku atoto ku atoto ya nikofukuti ni, faawola nya fandiki di koto sɛɛle leboo nwu kamɛ. 32Ɛkpaalɛ ekuɔ ninkaa di kandiɛ ditikasaa kawesee nwu suoto. Ɛkpaalɛ etiɛ di kakyɛ kanwii, ɛkpaalɛ etiɛ kafɔɔ di kakyɛ nyɔɔfa. 33Ɛkpaalɛ ekuɔ nwu nkpo kawɛ kandiɛ atikasaa beelolaa bɛɛbla ni fɛ sipũ, bɛɛbla nya ni fɛ almond kowoso atoto kakyɛ ka ku kakyɛ ka. 34Di kandiɛ ditikasaa kawesee nwu suoto yi, dikpenii bɛɛyɔ koto sɛɛle bɛɛbla epũ ɛna ninte ni fɛ almond kowoso atoto. 35Di kandiɛ ditikasaa kowesee nwu suoto kakyɛ ka ku kakyɛ ka kalɔ yi, almond kowoso letoto dikaa di dibiala suoto. 36Atoto nwu ku kowesee nwu amuu abla ninwii ku kandiɛ ditikasaa nwu feewola nya feediki ni di koto sɛɛle nwaa leboo ninwii kamɛ.
37“Faabla bakandiɛ bakuɛnsĩ fatika ni di suoto alɛ baakpa manwa sitũ. 38Faayɔ koto sɛɛle nwaa fabla kandiɛ okũ dibudisaa ku babɛɛsi bɛnkɛɛ. 39Yɔ koto sɛɛle nwaa ko di onutũ ni kũ lewo ni bakiloo afosi atiɛ bakiloo banɔɔ fabla kandiɛ ditikasaa nwu ku asaa bule ninya. 40Nyu falɛ fɛɛbla nya di mmle okle kanya latuo fɔ ni di kobokote nwu suoto.
Currently Selected:
ESODƆS 25: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
