DEUTERONOMY 10
10
Mose Ɔledza Mmara Miweo Ifɔ
1Mose ɔɣere Israel mabi sɔ: Ne Bosate ɔɣere me ku ɔwi wɔmɔ ame sɔ, "Bɛse ata anyɔ lɛ aɖeakatɔ̃ igbã si aya aba i wũ kɔrɛ i kube iso. Bara kakolo aɖaka ana. 2Loatsɛrɛ atɔ̃me wa lotsɛrɛ i ata ɖeakatɔ̃ wa abiɛ iso, losia i nwamɔ iso. Iyɔ si ka aasu wã apia i aɖaka ame."
3Ne ɔso losu akasia kakolo lobara aɖaka fiɛ lobɛse ata anyɔ lɛ aɖeakatɔ̃ awe. Ne losu wã i nrɔɔ̃ ame loya lokɛlɛgu kube iso. 4Ne Bosate ɔtsɛrɛ atɔ̃me wa ame ɔɖekatɔ̃ ɔtsɛrɛ i ɔwi ɖeakatɔ̃ ɔsia i ata wamɔ iso. Wã nɖe Mmara Miweo mɛ ɔtã mi ku ɔwi wɔ ɔɖeika ɔbɔrɛgu i ɔtɔ ame, ku iyi nɛ misakanya i kube kɔrɛ. Ne Bosate ɔsu wã ɔtã me. 5Kere ne lopɛ lofiriki lokpese loso kube loba karɔ̃. Lɛ kumɛgɔ i Bosate ɔɣɛ ne, losu ata lopia i aɖaka wa lobara ame fiɛ apia i mmɔ kiniɔ.
6(Israel mabi ɔrui i abiɔ wa nɖe ma Yaakanse are kɔrɛ fiɛ makɛlɛ Mosera. Mmɔ i Aron ɔkpi fiɛ mabiara wũ fiɛ ɔ̃ ɔbibirɛrɛĩ Eleazar ɔsu ɔ̃ kasɛkɔ̃ lɛ sɔrɛdze pelepele. 7Mata i mmɔ ne masɛ ɔri makɛlɛ Gudgoda fiɛ ka makɛlɛ Yotbata, karɔ̃ ga iso siwore ku ndu gbodzoo pia. 8I ɔwi wɔmɔ ame ne Bosate ɔɖi Levi kamele marɛrɛ̃ sɔ masore Bosate ndamu aɖaka. Ana ne si maya i Bosate anɔ si masumu wũ, si mafere kusɛkusɛ i ɔ̃ iyere ame. Nnɛgbe masɛ mabara ipɛ nɔme. 9Ne ɔso i ma Levise na karɔ̃ ɣee kaɖekɔ̃ i ma manyii ndɛ̃. Bosate nɖe ma kaɖekɔ̃ lɛ kumɛgɔ i Bosate mi Ɣaa ɔɣere ma.)
10Kiniɔ ne loɔwe i kube iso akpɛnɛ sina gu kusɛ̃ sina, lɛ kumɛgɔ lobara ɔkpɛ ɖeakatɔ̃ awe. Ne Bosate ɔkã me atsue ana ku ɔwi wɔgbe. Iiɖe ɔ̃ kuɖuɛ kuɖe sɔ ɔ̃awɔra mi. 11Ne Bosate ɔɣere me sɔ, "Kɛlɛ si asɛ aakɔ maturi i ma irisɛ ame, si masɛ maabo mafɔ karɔ̃ ga lokã ndamu lotã ma mawa sɔ loatã ma."
Nigã Bosate
12Kiniɔ ne, Israel kaɖe, nnɛ i Bosate mi Ɣaa to ɔbie ɔbɔrɛgu i mi kɔrɛ nɖe sɔ, miwarɛ Bosate mi Ɣaa si misɛ i ɔ̃ siri ɔɖuɖu iso. Miɖuɛ Bosate mi Ɣaa si misumu wũ ku mi sikala gu mi situ ɔɖuɖu. 13Mibara i Bosate mmara gu asɛ̃ra iso. Nto losu wã lotã mi nɔme ala mi isɛɛ ɔso.
14 Bosate mi Ɣaa mba kato, ta kato ga lokɔlɛ kaɖo kɔraa, karɔ̃ gu irabiara nɛ i kã iso. 15Ɣɛɛ Bosate ba inyɔiso ɔtã mi mawa ne ɔsu kuɖuɛ gbaã ɔtã mi mawa ne ɔso ɔɖi mi, ma ɔkparɛ, i nɖebi ɔɖuɖu ame lɛ ise nɔme. 16Ne ɔso mibɛ mi ɔtu ɔko miɖi si minyua atsuele iwe ana. 17Ala Bosate mi Ɣaa nɖe Ɣaa i aɣɔ gu sile ɔɖuɖu iso gu makɔse ame Ɔkɔse ɔso. Ɔɖe Ɣaa siare gu ɔlesate fiɛ ɔɖe ifɔ̃ra, ɔ̃isɛ ɔnyɔ ɔturi anɔ ɣee ɔsiai i ɔturi kama fiɛ ɔ̃isɛ ɔfɔ kawɛrɛra karatã kukawɛ̃. 18Ɔsɛ ɔfɔ makpisemare gu masekpibi kanya fiɛ ɔsɛ ɔɖuɛ ɔfɔ, ɔtã wũ arapia gu araɖea. 19Iyɔ miɖuɛ mma nɖe mafɔ alasɔ mi wũ ne miɔɖe mafɔ i Egipte karɔ̃ iso. 20Misu kuwarɛ ku kunigã mitã Bosate mi Ɣaa si misumu ɔnɔwɛ̃. Mipɛ mimatã wũ si mikã ndamu i ɔ̃ iyere iso. 21Ɔ̃ nɖe nwɔ miale; ɔ̃ nɖe mi Ɣaa, nwɔ lobara ara siare gu afɔ̃ra wa mba ɣii. Minya wã ku mi mɔmɔ anɔmi. 22Mi mawa ɔɖuɖu ma lokɛlɛ Egipte karɔ̃ iso ɔɖe maturi sikɔdzɛ. Ɣɛɛ kiniɔ ne Bosate mi Ɣaa ɔɔbara miɔsi, lɛ awãmi wa i kuɖokpo awe.
Currently Selected:
DEUTERONOMY 10: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
