DEUTERONOMY 9
9
Israel Mabi Iikã Bosate Atsue.
1Mose ɔɣɛ sɔ: Israel kaɖe minɔ lo! Ka mito miba miawara Yordan ɔwore, miafɔ karɔ̃ ga nɖe maturi mama ma mba ɔle maɖo mi fiɛ masi maɖo mi ana kare. Ma simagɛ̃siare ɔmɔ fiɛ sɛ̃ abere ɔkɔlɛ kato akpa kuɖokpo. 2Maturi mamɔ ɔkɔlɛ fiɛ maba ɔle - ma Anakse! Miɣe fiɛ miɔnɔ ara i ma iso fiɛ masɛ maɣɛ sɔ, "Kuwɛ̃ iiwo ma Anakse iso ɔɖe." 3Ɣɛɛ nɔme ne mifɔ miɖe sɔ Bosate mi Ɣaa, nɖe nwɔ nto ɔ̃awara ɔɖe mi katɔ̃, lɛ ɔtɔ wɔ nto ɔtsuedza ara. Ɔto ɔ̃aɖe ma iso ɔwɔra ma fiɛ ɔ̃amɔɛ̃ ma i mi anɔ. Ne miasa ma miɖi miwɔra ma mala, lɛ kumɛgɔ i Bosate ɔɣɛ ɔsɛ ɔtã mi.
4Si Bosate mi Ɣaa ɔɔsa ma ɔɖi i mi katɔ̃ kama ne, midaaɣere so sɔ, "Bosate ɔkɔ mi ɔbɔ sɔ mifɔ karɔ̃ gagbe ala mi sibɔlɔlɔ ɔso." Oɣoo, Bosate to ɔ̃asa nɖebi mɛgbe ɔɖi i mi katɔ̃ ɔtã mi ala me ɔtile ɔso. 5Iiɖe sɔ mi sibɔlɔlɔ ɣee mi ɔnukuare i Bosate anɔ ɔso ɔto ɔtã sɔ mifɔ ma karɔ̃. Mi Ɣaa, Bosate to ɔ̃asa nɖebi mɛgbe ɔɖi alasɔ maba ɔtile. Bosate mi Ɣaa to ɔ̃asa nɖebi mɛgbe ɔɖi i mi katɔ̃ si ɔbara i ndamu mɛ ɔkã ɔtã mi mawa Abraham gu Isak gu Yakob iso. 6Ne ɔso minɔkarɔ̃ iyɔ sɔ ne, Bosate mi Ɣaa iito ɔsu karɔ̃ sɛɛ gagbe ɔtã mi sɔ mifɔ, ala mi sibɔlɔlɔ ɔso ɣɛɛ miɖe maturi ma mba atsuele.
Sikãrɛtɛa Inantsuĩbirɛrɛ̃
7Mose ɔsɔgu i katɔ̃ sɔ: Midaaɣara kuiyikuiyi ngbɔ mipia Bosate mi Ɣaa sikpã i fafuĩ ame. Ita i ɔwi wɔ mirui i Egipte karɔ̃ iso gbɔgbɔɔgbɔ miba miabo i ngbe ne, miɔla miɔta miya i Bosate iso. 8I Xoreb kube kɔrɛ ne mitara Bosate sikpã teterea fiɛ ɔna sikpã gbaã gɔ tee ɔ̃awɔra mi. 9Ɔwi wɔ loya lokɛlɛ kube iso ne, losɛ loafɔ ata, nwa iso matsɛrɛ ndamu mɛ i Bosate ɔbaragu mi. Lowe i kube iso akpɛnɛ sina gu kusɛ̃ sina gɔ loiɖe kuira fiɛ loinɛ ndu ana. 10Bosate ɔtã me ata anyɔ wa ɔsu ɔ̃ mɔmɔ irɔĩ ɔtsɛrɛ ara ɔsia iso. Mmara mɛ ɔɖuɖu i Bosate ɔɣere mi ɔbɔrɛgu i ɔtɔ ame i kube iso, ku iyi nɛ misakanya sia i ata wã anyɔ iso.
11Akpɛnɛ sina gu kusɛ̃ sina kama ne, Bosate ɔtã me ata anyɔ, nwa nɖe ndamu ata. 12Kere ne Bosate ɔɣere me sɔ, "So bɔrɛ i ngbe ɔluwɛ̃, alasɔ fɔ maturi ma akɔ abɔrɛgu i Egipte karɔ̃ iso ɔɔnina so. Maɔfiriki mala i ɔri wɔ iso loɣere ma sɔ masɛ, ne maɔbara ibɔra torea irapɔa matã so."
13Ne Bosate ɔɣere me sɔ, "Loɔnya maturi magbe fiɛ maɖe maturi ma mba atsuele gbaã! 14Nyua me sɛ, si loawɔra ma fiɛ loanukutu ma iyere loɖi i kato kayirinɔ. Iyɔ loabara-ɔ akpese kaɖe ga losi fiɛ kaba ɔle kaɖo ma."
15Ne ɔso lofiriki loso kube gɔ ɔtɔ sinyagɛmi to simɔɛ̃ sibɔrɛ i kube ame. Ne ata wã anyɔ ɔwe i wũ nrɔɔ̃ ame. 16Gɔ lonyɔ ne, lonya sɔ miɔbara ikpi i Bosate mi Ɣaa iso. Miɔbara inantsuĩbirɛrɛ̃ kumiamia ibɔra torea irapɔa mitã so. Miɔpɛ mifiriki mala i nsɛgbai mɛ i Bosate ɔɣere mi iso. 17Ne ɔso losu ata wã anyɔ lofuĩdza loɖi i wũ nrɔɔ̃ ame, abibiɛ pasapasa i mi anɔmi ame ne.
18Kere ne lokpese lorɛ lofu anɔ i karɔ̃ i Bosate anɔ, akpɛnɛ sina kusɛ̃ sina ana. Loiɖe kuira ɣee loinɛ ndu ala akpi ɔɖuɖu wa miɔbara iti. Mibara iranyanyariã i Bosate anɔmi ame fiɛ mitara fiɛ mipia wũ sikpã. 19Lonigã Bosate sikpã gu sikpã teterea alasɔ sibo ngbegɔ ka ɔ̃awo mi ɔwɔra. Ɣɛɛ Bosate ɔkã me atsue ana. 20Ngbɔ ame i Bosate ɔna sikpã ku Aron sibo gɔ ɔ̃awo wũ ɔwɔra ɣɛɛ lokparamakayi i ɔ̃ iti ana. 21Ana ne losu mi ira lalaa, inantsuĩbirɛrɛ̃ ibɔra torea irapɔa nɛ mibara, lofuĩdza ne lopia i ɔtɔ ame. Kere ne lobibiɛ ne pasapasa fiɛ lokɔtɛ ne ɖɛkpɛrɛɛ lɛ ɔsebu fiɛ lofuĩdza ne lopia i kaworei ga nto kabore i kube iso kafe ame.
22Mipia Bosate sikpã ana i Tabera i Masa gu i Kibrot Xataava.
23Ɔwi wɔ mipia i Kades Barnea ne ɔsese mi ɔbɔrɛgu i mmɔ ɔɣere mi sɔ, "Mikɛlɛ miafɔ karɔ̃ ga nto lotã mi." Ɣɛɛ mita miya i Bosate mi Ɣaa silɔ iso. Miifɔ wũ miɖe ɣee miiwarɛ wũ. 24Ita i ɔwi wɔ lotsue mi ne, misɛ mita miya i Bosate iso.
25Ne ɔso lorɛ lokɔlɛ anɔ lofu i karɔ̃ i Bosate anɔ, akpɛnɛ sina gu kusɛ̃ sina wamɔ ame alasɔ Bosate ɔɣɛ sɔ ɔ̃awɔra mi. 26Ne lokparamakayi lotã Bosate loɣɛ sɔ, "Bosate Wɔ Nsiguso, daawɔra fɔ maturi, fɔ mɔmɔ kaɖekɔ̃ ga aɖi ku kɔrɔ̃ teterea gu fɔ ɔle siare fiɛ akɔ ma abɔrɛgu i Egipte karɔ̃ iso ku fɔ kɔrɔ̃ teteree. 27Nyigi fɔ maɖabo Abraham gu Isak gu Yakob. Kpa anɔ fu maturi magbe atsuele gu ɔtile gu ma ikpi iso. 28Si iiɖe ngbɔ ne, ma Egiptese ma kɔrɛ aɖi bo abɔrɛgu to maaɣɛ sɔ, 'Ala Bosate iiwo ma ɔkɔ ɔkɛlɛgu karɔ̃ ga ɔɣɛ ɔsɛ sɔ ɔ̃atã ma iso fiɛ ɔtsiri ma ɔso ne, ɔkɔ ma ɔɖi ɔkɛlɛgu fafuĩ ame si ɔɖue ma.' 29Ɣɛɛ ne fɔ maturi maɖe, fɔ kaɖekɔ̃ ga akɔ abɔrɛgu i Egipte karɔ̃ iso ku fɔ ɔle gu kɔrɔ̃ teteree."
Currently Selected:
DEUTERONOMY 9: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
