Jɔnə́ 15
15
Yésuwə a dí ɛju ɛ́ bipum ɛ́ mbálɛ
1“Mi n dí ɛju ɛ́ bípum bí mbímbí, na Sáŋ m myə mɔ́ a dí mbwəla-a-ndutu á ndfukú. 2Ǎ fúl ɛlâʼ tɛ́ ɛ́yə́ ɛ́ dí á nyǔ m myə, ɛ́yə́ ɛ́ sə̌ yɛ́ bípum, ti ǎ fálú nlaʼ tɛ́ ámə́ n yɛ́ bipum, nána, ɛ sáŋ, ɛ yɛ́ pə́ bipum jǐta. 3Nyí dí wusáŋgí á ɛ́tútú ɛ́ jókwa álə́ m bə́kíní nyə́. 4Nyí bá wə̂ na mi, mi pə́ m bá wə́ na nyə́. Nlaʼ mɔ́mə̌n n tíŋganiyǎ ɛ́ yɛ́ bípum ɛ́yə́ n shiyaní á ɛju ɛ́ bwə́. Mulimlim nâ, nyə́ pə́ nyí tíŋganiyǎ ɛ́ yɛ́ bípum ɛ́sibá na nyí dí na mi.
5Mi n dí ɛju ɛ́ bwə́ ɛ́yə́ ɛ́ yɛ́ bipum, nyə́ nyí dí milaʼ. Mɔʼ na mɔtɛ́ awə̌ a dí wə̂ na mi, ní mi pə́ n dí na mɔ́ á yɛ́ bipum jǐta. Nyí tíŋganiyǎ ɛ́ bwə́ ká yǔm ɛ́sibá na nyí di na mi. 6Ká njá awə̌ a shiyá na mi, bá fúl mɔ́ ngə nlaʼ. Nlaʼ mún nán kín. Bá laʼ milaʼ mî bá shwá myɔ́ á mwǐ átin ti bí wɔ́kí. 7Njí nyí dí wə̂ na mi, na jókwa lí myə lí dí wə̂ na nyə́ átin, ká njá yúmə́ ɛ́yə́ nyí kɔ́ndɛ́ní á dǐn lí myə, nyí kwisí yɔ́. 8Wulɔʼ wú Sáŋ m myə wú míndi njí nyí yɛ́ bipum jǐta, ɛ́yî yɔ̂ ɛ́ bwə nyí bá bawútú bá myə. 9Ngə Sáŋ m myə a nəŋíní mi, mulimlim mi pə́ n nəŋí nyə́, áfánikə̌ nyí bá wə̂ na mi nána m bá wə́ nyə́ ɛ nəŋ. 10Njí nyí kɔ́ŋgɔ́ní mambéndá má myə, ní m bá wə́ nyə́ ɛ nəŋ. Mulimlim ngə mi pə́ n kɔ́ŋgɔ́ní mabéndá má Sáŋ m myə, ka a bá wə̌ mi ɛ nəŋ. 11M mə́ nyə́ ɛ pɔ̌ŋ misam mínán mísə́sə̌n nána munyɛŋgɛ m myə m mbá na nyə́ na munyɛŋgɛ n nyə n lwín. 12Mbéndá ɛ́ myə ɛ dí nána, nyí nə̂ŋ nyə́ na nyə́mə̌n mulimlim ngə n nəŋíní nyə́. 13Njí mɔʼ a wúlí á milú mí baʼ, ní a lúfú ɛniŋgán ɛ́yə́ ɛ́ kɔ́lí jǐta. 14Nyí dí basún bá myə njí nyí bwə́lí ká njá yúmə́ ɛ́yə́ mi pɔŋíní nyə́ nána nyí bwə̂. 15N sə pə́ nyə́ ɛ bə̌ŋ babwəla-bá-ndutu á ɛ́tútú nána babwəla-ba-ndutu bá bíyǎ yə̌ ɛ́yə́ sísə́ m bɔ ǎ bwəní. Ndé nǎn bə̌ŋ nyə́ basún, á ɛ́tútú nána nǎn pɔ̌ŋ nyə́ misam mísə́sə̌n ámə́ Sáŋ m myə a pɔŋíní mi. 16Nyí pwɛ́siyǎ mî, ndé mí m pwɛsí nyə́ ti n lúmí nyə́ álí bwə misam ámə́ mí yɛ́ bipum bí mbâ. Nyay ɛ misam ámə́ mí bá á púndá ɛsə́sə̌n. Njí nyí bwə́lí nâ, Sáŋ m myə ǎ bə nyə́ ká yə̌ ɛ́yə́ nyí kɔ́ndɛ́ní mɔ́ á dǐn lí myə. 17Misam mínán mísə́sə̌n ámə́ nǎn pɔ̌ŋní nyə́ mí dí nána, nyí nə̂ŋ nyə́ na nyə́mə̌n.”
Baʼ bá nkínshíyə bá kfwɛ nyə́
18Yésuwə a bílí wə̂ ɛ́ pɔ̌ŋ bawútú bá mɔ nána, “Njí nkínshíyə n kfwɛ́ nyə́, nyí bî nána miyə́ bá kɔ́sɛ́ní ɛ kfwɛ. 19Njí nyí dí ngə baʼ bá nkínshíyə, ní nkínshíyə n nuŋ nyə́ ngə baʼ bá mɔ. Ndé m pwɛsí nyə́ átítin a baʼ bá nkínshíyə. Nyí shiyǎ baʼ bá nkínshíyə. Ɛ́yî yɔ́ ɛ́ bwə́lí ka nkínshíyə n kwfɛ́ nyə́. 20Nyí káni mbyá ámə́ m pɔŋíní nyə́ nána, ‘Mbwəlâ a sə̌ ɛ́ túm sísə́ m mɔ.’ Njí bâ m fá mî á mútaka átin, ní bá fá pə́ nyə́ á mutaka átin. Njí bâ m kɔŋgɔ jókwa lí myə, ní bá kɔŋgɔ́ pə́ jókwa lí nyə. 21Bá bwə nyə́ mísam mínán mísə́sə̌n á dǐn lí myə, á ɛ́tútú nána bá bíyǎ Ani awə̌ a lúmí mi. 22Njí mi sî n paʼ ti m pɔ́ŋ bɔ́ misam ámín, ní wubî wú bɔ wú míndiyǎ. Ndé sɔnsɔ́nǎn, bá wɔ́ŋíyǎ yándá ká lífɔ́ á wubî wú bɔ. 23Ká njá awə̌ a kwfɛ̌ mî a kwfɛ̌ pə́ Sáŋ m myə. 24Njí mi sî m mə̌ ɛ bwə nyai ɛ́ misam ngə mínán átítin na bɔ́ ámə́ mɔʼ ká nfɔ́ a nan bwə́lání wə́, ní wubî wú bɔ wú míndiyǎ. Ndé sɔnsɔ́nǎn bá mə́ ɛ mín mísam mísə́sə̌n ámə́ m bwəlíní, kánâwə̌ bá dí wə mí ɛ kwfɛ, nâ bá kfwɛ́ní pə́ Sáŋ m myə. 25Á mínán mí dí álí lwínjí biyala ábə́ bí tílání á mambéndá má bɔ nána, ‘Yándá ká lífɔ́ lí bíliyǎ álə́ bá kwfɛ́ní mi.’ 26Ŋwúnjan á fí á Sáŋ m myə. A dí Mudî ámə́ m bwə ti baʼ bá sɔ́ntán mbálɛ. Ɛtî ɛ́yə́ m bání na Sáŋ m myə n lúm nyə́ Mɔ́, ti mɔ́ á pɔ̌ŋ nyə́ misam tɛ́ŋgɛnɛ mi. 27Nyə́ pə́ nyí lɔ́lí ɛ pɔ̌ŋ bâ tɛ́ŋgɛnɛ mi á ɛ́tútú nána nyí bílí na mi butya á bibutílí.”
Currently Selected:
Jɔnə́ 15: bwt
Highlight
Copy
Compare
Share
Want to have your highlights saved across all your devices? Sign up or sign in
