Jɔnə́ 16
16
1Yésuwə a kǐ á wúsú álí byá nána, “Nǎn pɔ̌ŋ nyə́ misam mínán mísə́sə̌n nána nyí si mákú dúbɛ́ lí nyə. 2Bá nan nyə́ á mandáʼ má mákáni má baʼ bá Ísrɛl. Púndá ɛ́ paʼ ɛ́yə́ baʼ ábə́ bá búlúwákí nyə́ bá kani nána bá bwəlí Dyǔ 3Bá bwə̌ misam mínán mísə́sə̌n á ɛ́tútú nána bá bíyǎ Sáŋ m myə na bá bíyǎ mî. 4Ndé nǎn pɔ̌ŋ nyə́ misam mínán mísə́sə̌n nána, wə̌ti púndá ɛ pilí ɛ́yə́ misam mínán mí bwəlání, nyí kání nána mi mi pɔ̌ŋ nyə́.”
Ɛbulú ɛ́ Mudî ámə́ n Sáŋí
N sî n pɔ̌ŋ nyə́ misam ámínán butya á bibutílí á ɛ́tútú nána m bílí na nyə́. 5Ndé sɔnsɔ́nǎn, nǎn kə á ani awə̌ a lúmí mi. Ndé nyə́ mɔʼ ká nfɔ́ a sə̌ mî ɛ kɔndɛ́ áfə́ nǎn kəní. 6Ngə m mə́ní nyə́ ɛ pɔ̌ŋ misam mínán mísə́sə̌n, milə́m mí nyə mí lwínjí na likini. 7Á mbálɛ nǎn pɔ̌ŋ nyə́ nána ɛ́ dí á wulɔ́kɔ́ wú nyə nána n kə̂. Á ɛ́tútú nána njí n kíyǎ, Ŋwúnjan a sî pǎ á nyə́. Ndé wə̌ti n kǐ, ní n lúm nyə́ mɔ́. 8Njí a pilí á lúfú baʼ bá nkínshíyə nána, lisɔ́ntan lí bɔ álə́ bá wɔ́ŋíní tɛ́ŋgɛnɛ libwə wúbî, na libwə wú wúlɔ lí tɛ́ŋgɛniyǎ. Na bá sɔ́ntaniyǎ yə̌ ɛ́yə́ Dyǔ lí kásíní. 9Lisɔ́ntan lí bɔ tɛ́ŋgɛnɛ wubî lí tɛ́ŋgɛniyǎ á ɛ́tútú nána bá dúbɛ̌ mî. 10Bá tɛ́ŋgɛniyǎ tɛ́ŋgɛnɛ álí bwə misam ámə́ mí tɛ́ŋgɛ́ní, á ɛ́tútú nána nǎn kə á Sáŋ, nyí sǐ míná pə́ mi. 11Bá tɛ́ŋgɛniyǎ tɛ́ŋgɛnɛ nyay ɛyə̌ Dyǔ lí káyísíní á ɛ́tútú nána m mə́ ɛ káyísí janiya lí nkínshiyə.
12“Ŋ wɔ́ŋí pə́ misam jǐta álí pɔ̌ŋ nyə́, ndé byə̌m bî bí túm nyə́ átin álí sɔ́ntan. 13Ndé á púndá ɛyə̌ Mudî m mbálɛ m paʼní, m bwə nyə́ nyí bí mbálɛ ɛsə́sə̌n. A sî byábá na wunja wú mɔ mɔ́mə̌n. Yə̌ ɛ́yə́ bá pɔ́ŋí mɔ́ yɔ́ á byání, ti á pɔ̌ŋ nyə́ misam ámə́ mí bwəlan. 14Á bə mî wulɔʼ á ɛ́tútú nána ká yə̌ ɛ́yə́ a wúkíní á mi, yɔ́ mɔ́ pə́ á pɔŋní nyə́. 15Ká njá yǔmə́ ɛ́yə́ Sáŋ m myə a wɔ́ŋíní ɛ́ dí ɛ́ myə. Yɔ́ ɛ́ bwə́lí ka m byá nána Mudî m mû n nǔŋ ká yə̌ ɛ́yə́ m byábíní, ti m pɔ́ŋ nyə́.”
Likini na munyɛŋgɛ
16Yésuwə a byábí pə́ nána, “Á mbís ɛ mǎ púndá nyí sî míná pə́ mi, ti á mbís ɛ mǎ púndá, nyí mín mî.” 17Duŋgu li bawútú bá mɔ bá kɔ́ndɛ́ bɔ́ na bɔ́mə̌n nána, “Yə̌ mɔ́ a káníní álí byá, nána, ‘Á mǎ púndá nyí sî míná pə́ mi, na á mbís ɛ mǎ púndá pə́ nyí mín mî?’ Na álí byá pə́ nána, ‘Á ɛ́tútú nána nǎn kə á Sáŋ m myə.’” 18Bá bílí pə́ ɛ kɔndɛ nána, Yə̌ mɔ́ a káníní álí byá nána, “Á mǎ púndá?” Sí sɔ́ntaniyǎ yə̌ ɛ́yə́ ǎ byání.
19Yésuwə a m mə̌ bí nána bá sa mɔ́ ɛ kɔndɛ́ nsam. Áfánikə̌ a m pɔ̌ŋ bɔ́ nána, “Yə̌ ɛ́yə́ m byábíní nána, ‘Á mǎ púndá nyí sî míná pə́ mi, á mbís ɛ mǎ púndá nyí mín mî,’ Yɔ̂ nyí kɔndɛ́ní nyə́ na nyə́mə̌n? 20Á mbálɛ nǎn pɔ̌ŋ nyə́ nána, nyí ji, nyí tutaʼ ndé nkínshíyə n wú munyɛŋgɛ. Nyí bá likini ndé likini lí nyə lí tǐm múnyɛŋgɛ. 21Wə̌ti púndá ɛ liyɛ́ ɛ mwalân ɛ mə́ ɛ paʼ, á bá likini á ɛ́tútú nána púndá ɛ mutaka ɛ́ mɔ ɛ mə́ ɛ paʼ. Ndé njí a mə́ ɛ yɛ́, á wú munyɛŋgɛ á ɛ́tútú nána mɔ̌nyuŋ a yátí á nkínshíyə. 22Nâ ɛ díní mulimlim na nyə́. Sɔnsɔ́nǎn nyí dí na likini, ndé m mín pə́ nyə́. Á púndá ɛni, milə́m mí nyə mí lwín na munyɛŋgɛ, ti mɔʼ ká nfɔ́ a sî púlá nyə́ ɛ nuŋán munyɛŋgɛ mû. 23Á púndá ɛ́yə́ bǔn bû bú paʼní, nyí sî kɔndɛ́ mî ká yǔm. Á mbálɛ nǎn pɔ̌ŋ nyə́ nána, Sáŋ á bə nyə́ ká njá yǔmə́ nyí kɔ́ndɛ́ní mɔ́ á dǐn lí myə. 24Nyí nan kɔ́ndɛ́yá ká yǔm á dǐn lí myə kə́ŋ ta sɔnsɔ́nǎn. Nyí kɔ́ndɛ mɔ́ á dǐn lí myə, ti nyí kwisi na munyɛŋgɛ n nyə n lwínj.”
Yésuwə a túmbí nkínshíyə
25Yésuwə a bátí pə́ álí pɔ̌ŋ bawútú bá mɔ́ nána, “M bwəlání ŋganú álí pɔ̌ŋ nyə́ misam jǐta. Ndé púndá ɛ̌ paʼ ɛ́yə́ n sî bwəlání pə́ ŋganú, ndé m pɔ̌ŋ nyə́ misam tɛ́ŋgɛnɛ Sáŋ, á nyay ɛ́yə́ nyí sɔ́ntání. 26Wə̌ti bǔn bû wú pílí, nyí kɔndɛ́ mɔ́ ká njá yǔmə́ á dǐn lí myə. N sî látíyá nyǔ álí pɔ̌ŋ mɔ́ nána a wúnjan, 27á ɛ́tútú nána Sáŋ a nəŋí nyə́. A nəŋí nyə́ á ɛ́tútú nána nyí nə́ŋí mi na nána nyí mə́ ɛ dúbɛ́ nána n fí á mɔ́. 28N fí á Sáŋ, m paʼ á nkínshíyə, sɔnsɔ́nǎn m makú nkínshíyə n tím pə́ á Sáŋ.”
29Ti bawútú bá mɔ bá pushú mɔ́ nána, “Sɔnsɔ́nǎn, ɛ mə́ ɛ byá ngə sí sɔ́ntání, ɛ bwə́laniyǎ ŋganú. 30Sɔnsɔ́nǎn sí bí nána ɛ bí misam mísə́sə̌n, na ɛ sə̌ ɛ́ saki na mɔʼ a kɔndɛ́ wə ká yǔm. Ɛ́yínán ɛ́ bwə́lí sə́ sí dúbɛ́ nána ɛ fí á Dyǔ.” 31Yésuwə a pushú bɔ́ nána, Nyí dúbɛ́ sɔnsɔ́nǎn? 32Tátíyáni! Púndá ɛ̌ paʼ, ɛ mə̌ yí ɛ paʼ, ɛ́yə́ nyə́ mɔʼ ansə́sə̌n nyí páŋílíní. Mɔtɛ́ á kə mifílí áfə́ a fíní, nyí makú mímə̌n nfɔ́. Ndé kánâwə̌, n shiyǎ mimə̌n nfɔ́, Sáŋ a dí na mi. 33M pɔŋí nyə́ misam minán mísə́sə̌n na nyí wɔ́ŋ musaŋgu ngə nyí díní na mi. Nyí kwisí mutaʼkaʼ á nkínshíyə, ndé nyí tfúl milə́m. N túmbí nkínshíyə.
Currently Selected:
Jɔnə́ 16: bwt
Highlight
Copy
Compare
Share
Want to have your highlights saved across all your devices? Sign up or sign in
