Jɔnə́ 14
14
Yésuwə a dí mbuka m mbálɛ ámə́ nán panán mwɛ́nɛ
1Yésuwə a pɔŋí bawútú bá mɔ nána, “Nyí si takí milə́m mí nyə. Nyí bán milə́m mí nyə á Dyǔ na á mi pə́. 2Tfǔŋ jǐta ɛ́ dí á ndáʼ ɛ́ Sáŋ m myə. Mi nǎn kə álí tambú nyə́ fǔm áwə́. Njí suká nâ ní mi púliyǎ nyə́ ɛ pɔ̌ŋ nána nǎn kə nyə́ ɛ tambú fǔm. 3Ndé njí n kǐ n tambú nyə́ fǔm, n tim á mbís, m paʼ n nǔŋ nyə́ álí bá na mi álí bwə nána nyə́ pɛ́ nyí bá áfə́ mi n díní. 4Nyí bí mbuka ámə́ nǎn kə áfə́ nǎn kəní.” 5Tɔ́masə a kɔ́ndɛ́ mɔ́ nána, “Sísə́, sí bíyǎ áfə́ ɛ̌ kəní, yán kə́ sí bíní mbuka ámə́ nǎn kə áfə́ ɛ díní?” 6Yésuwə a pushú mɔ́ nána, “Miyə́ n dí mbuka ámə́ nǎn kə á Sáŋ m myə, mbálɛ ɛ́ fí á mi, mi nǎn bə̌ lúŋgɛ́. Mɔʼ ká nfɔ́ a tíŋganiyǎ ɛ́ paʼ á Sáŋ m myə ɛ́yə́ a túmbiyǎní á mi. 7Sɔnsɔ́nǎn ngə nyí mə́ní mi ɛ bî, nyí bí pə́ Sáŋ m myə. Butya sɔnsɔ́nǎn, nyí bí mɔ́ na nyí mə́ mɔ́ ɛ mín.” 8Fílipə a pɔŋí mɔ́ nána, “Sísə́ lúfú sə́ Sáŋ, ɛ́yî yɔ́ sí saʼní.” 9Yésuwə a pushú mɔ́ nána, “A Fílipə m mə́ ɛ dyɛ na nyə́ ɛtfûm, yán ɛ tiŋgání ɛ pɔ̌ŋ nána ɛ bíyǎ mî? Ká njá awə̌ a míní mi, ní a míní Sáŋ. Ndé yán kə́ ɛ tiŋgání ɛ byá nána, ‘Lúfú sə́ Sáŋ?’ 10Wə ɛ dúbɛ̌ nána mi n dí á Sáŋ ti Sáŋ pə́ a bá mi átin?” Ti Yésuwə a pɔŋí bawútú bá mɔ́ nána, “Misam ámə́ m pɔŋíní nyə́ mí fíyǎ á mimə̌n. Ndé Sáŋ m myə awə̌ a dí mî átin mɔ́ ǎ bwə ɛbulú ɛ́ mɔ. 11Nyí dúbɛ́ mi ngə m byábíní nána n dí á Sáŋ átin ti Sáŋ m myə pə́ á dí á mi átin. Njí nyí dúbɛ̌ nâ, nyí dúbɛ́ ká misam mí manyáká ámə́ nǎn bwəní. 12Á mbálɛ nǎn pɔ̌ŋ nyə́ nána, ká njá awə̌ a dúbɛ́ mî á bwə̌ misam ámə́ mi nán bwəní. Á bwə pə́ misam ámə́ mí túmbí ɛ́ mínán á ɛ́tútú nána mi nǎn kə á Sáŋ. 13Mi nán bwə ká yə̌ ɛ́yə́ nyí kɔ́ndɛ́ní á dǐn lí myə álí bwə nána wulɔʼ wú Sáŋ wú míndi á Mwǎn m mɔ. 14Yǔm tɛ́ ɛ́yə́ nyí kɔ́ndɛ́ní á dǐn lí myə, m bwə yɔ́.”
Yésuwə a mú n lúm Mudî ámə́ n Sáŋí
15Yésuwə a byábí pə́ nána, “Njí nyí nə́ŋí mí, ní nyí nǎn mambéndá má myə. 16Mi m pɔ̌ŋ Sáŋ a bə̂ nyə́ Nwúnjan ampə́pə̂, awə̌ á bá na nyə́ kə́ŋ ta á bwindeya. 17Nwúnjan ani, mɔ́ a dí Mudî ámə́ nán nyítí mbálɛ tɛ́ŋgɛnɛ Dyǔ. Baʼ bá nkínshíyə bá tíŋganiyǎ mɔ́ ɛ kási á ɛ́tútú nána bá nan míníyá mɔ́ na nána bá bíyǎ mɔ́. Ndé nyí bí mɔ́ á ɛ́tútú nána a dí na nyə́, a bá pə́ nyə́ átin. 18Njí mi n kǐ, n sî makúwá nyə́ ngə bǎn bá nywí. M paʼ pə́ á nyə́. 19Á mǎ púndá, nkínshíyə n sî mín ná pə́ mi. Ndé nyə́mə̌n nyí mín mî. Ngə m bání luŋgɛ́, nâ pə́ nyí bání luŋgɛ́. 20Njí bǔn bû wú pílí, nyí bí na mi ndí Sáŋ myə átin, ti nyə́ pə́ nyí bá mî átin mulimlim ngə mi pə́ n díní nyə́ átin. 21Ká njá mɔ́lə́ awə̌ a kɛsí mambéndá má myə, ti a kɔŋgɔ́ pə́ mɔ́, mɔ́ á dí mɔʼ awə̌ a nəŋí mi. Ká njá awə̌ a nəŋí mi, Sáŋ ŋ myə pə́ á nəŋ mɔ́. Mi pə́ n nəŋ mɔ́ ti n lúfú mɔ́ nyǔ ɛ́ myə.” 22Júdasə (suká Júdasə Ískáriyɔtə) a byábí nána, “Sáŋgúwə́, yán ɛ́ bání na wə ɛ́ lúfú sə́ nyǔ ɛ́ wə ndé ɛ sî lúfúwá nkínshíyə̂?” 23Yésuwə a pushú nána, “Ká njá mɔ́lə́ awə̌ a nəŋí mi, a kɔŋgɔ́n jókwa lí myə. Sáŋ m myə á nəŋ mɔ́, ti mi na Sáŋ m myə sí pá á mɔ́, ti sí dyɛ na mɔ́. 24Ká njá awə̌ a nə́ŋiyǎ mî a sə̌ ɛ́ kɔŋgɔ́n jókwa lí myə. Jókwa lî álə́ nyí wúní lí dí lí Sáŋ m myə awə̌ a lúmí mi.
25Mi nǎn pɔ̌ŋ nyə́ misam mínán mísə́sə̌n ngə n díní wə̂ na nyə́. 26Nwúnjan, Mudî ámə́ n Sáŋí awə̌ Sáŋ m myə á lúmní a dǐn lí myə, á lɛ́fú nyə́ misam mísə́sə̌n ti á bwə nyə́ nyí kání misam mísə́sə̌n ámə́ m mə́ní nyə́ ɛ pɔŋ. 27Musaŋgu mɔ́ m makúní na nyə́. Musaŋgu m myə mɔ́ m bəní nyə́. Mi n sə nyə́ ɛ bə ngə nkínshíyə n bəní nyə́. Nyí sí takí milə́m mí nyə á libum, nyí sí báŋ. 28Nyí wúkí ngə m pɔŋíní nyə́ nána, ‘Mi m makú nyə́, ndé nán tim pə́ á nyə́.’ Ndé njí nyí n nəŋ mi, ní nyí wú munyɛŋgɛ na nǎn kə á Sáŋ á ɛ́tútú nána Sáŋ a dí wunə̂n litúm mî. 29Sɔnsɔ́nǎn nǎn pɔ̌ŋ nyə́ ɛ́yə́ ɛ́ nan bwə́laniyǎ nána ɛ́ bwə́lan, nyí dúbɛ́. 30Sí sî wɔ́ŋ púndá jǐta álí byá pə́ ɛ́tútú nána, janiya lí nkínshíyə lí paʼ. A wɔ́ŋiyǎ ngínya á nlú m myə. 31Ndé m bwə ngə Sáŋ m myə a pɔŋíní ná m bwə, álí bwə nána nkínshíyə m bí nána n nəŋí Sáŋ m myə. Nâ pə́ ɛ́ bwə́lání ti m bwəlí ká njá yǔmə́ a pɔŋíní mi nána m bwə.
Pakání sí fálu áfán.”
Currently Selected:
Jɔnə́ 14: bwt
Highlight
Copy
Compare
Share
Want to have your highlights saved across all your devices? Sign up or sign in
