مَرقُس 5
5
شفای مرد دیوزیَه
1اونا رفتِن وِ او طرف دریاچَه، وِ منطَقَه جِراسیا. 2وَختی که عیسی اَ قایق آما دامو فِوُرَن مردی که گرفتار روح بَد بی، اَ قَبرِسو دِراما وُ عیسانه دیی. 3او مرد دِ قَبرسُو وِ سَر مِبُرد وُ هوشکَه توان اینِنِ نَشت که اونِه حتّی وا زنجیر بَوَنَه. 4وِرِ ایکه هَر بار که اونِه وا زنجیر وُ پاوَن آهَنی بسهَ وین زنجیرانِ دِرُنَّه وی وُ پابنانِ اِشکِناَ وی. هوشکه حریفش نَوی، 5شُو وُ روز دِ مینِه قَبرِسو وُ رو کُو آ جیغِ وِلِنگ مِکرد وُ خُیِشِه وا سنگ زَخمی مِکِرد، 6همی که عیسانِه اَ دور دیی، دُوئِس وُ دِ بِراوَرِش اِفتا رو زِمی، 7وا صدا بُلن حَوار کِرد: «عیسی، پسر خدای متعال، تُو وا مَه چِکار داری؟ قَسَمِت مییِم وِ خدا که عذاوِم نَیی!» 8وِرِ ایکه عیسی وِش گُفتَه وی: «ای روح بد اَ ایی مرد بَرو دَر!» 9اوسِه عیسی اَزِش پُرسی: «اسمت چیهَ؟» جُواو دا: «اسمم قُشُونَه؛ وِرِ ایکه ایما زیادیم.» 10وُ خیلی عیزِ التماس کِرد وِ عیسی که اونانِ اَ او مَنطَقَه نَنازهَ دَر. 11دِ تپهآی او اطراف گلَه بزرگی خُوک دِ حال خوراک خوردِن بییِن. 12ارواح بد وا خواهش وِ عیسی، گُفتن: «ایمانِ بَفِرس مینِه خوکا بَل بَریم دِ مینِه خوکا.» 13عیسی وِشو اِجازَه دا. پَ ارواح بد دِرآمان وُ رفتِن مینِه خوکا. گلهایی که شُمارِشُ نَزیکِ دُو هزارتا خوک بی، دِ سِرازیری تپَه هجوم بُردِن وِ مینِه دریاچَه وُ دِ اِوُ خَفَه شوئِن.
14خوکبانا فِرار کِردَن وُ خوَر ایی جَریانِه اِناختن دِ مین شَر وُ دهات جوری که مَردِم درآمان دَر تا او چی که پیش آمیَ وی بُوینَن. 15اونا آمان وَرِ عیسی وُ هَمی که دییِن او مرد دیوزیَه که قبل تَر گِرِفتار قُشُونِ دیوا بی، ایسِه لِواس وَرِش کرِدَه وُ عاقل واقِل نِشِسهَ اونچو زَرتِلاک شوئِن. 16کِسایی که اَ نَزیک شاهِدِ ایی جریان بییِن او چی که وِ سَرِ مردِ دیو زیَه وُ خوکا آمیَ وی وِرَ مَردِم تعریف کِردَن. 17اوسِه مَردِم اَ عیسی خواهِش کِردَن که سرزِمینشونِه تَرک کُنَه.
18وَختی که عیسی سُوآرِ قایق مِشُد مردی که قَبلتَر دیوزیَه بی، التماس کِرد که وآردِ عیسی بَرَ. 19امّا عیسی اِجازَه نَدا وُ گُفت: «بَرو خونَه وَرِ رِفیقات وُ وِاونا بُ که خداوند وِرَت شی کرِدَه وَ چِجور رَحمِش آمیی وِت.» 20پَ او مرد رَفت وُ دِ سرزِمین دِکاپولیس، شروع کِرد وِ تعریف کِردَنِه هر چیی که عیسی وِرَش کرِدَ وی وُ تمام مردِم شِگِفت زیَه مِشوئِن.
شفایِ یِه زَن وُ دُختَرِ یایروس
21عیسی یِه دفعه دیَر وا قایق رَفت او طرف اِوُ. جمیعت زیادی دُورِش جمع شوئِن.وَ عیسی لُو دریاچَه بی. 22هَمو موقع یکی اَ رئیسای کنیسه که اسمِش یایروس بی آما اونچو وِ دیدَن عیسی، اِفتا وِ پاش، 23وا عِیزِ التماس وِش گُفت: «دختَر کوچوکِم دارهَ مِمیرهَ. خواهش مُکُنِم بیا وُ دَسِتِ بَل قَش تا شفا بِیرَ وُ زِنَه بَمُونَه.» 24پَ عیسی وآردِش رَفت.
عده زیادیَم دُم عیسی اِفتان را. مردِم اَ هر طرف وِ عیسی هجوم میاوُردِن. 25دِ او بین زَنی بی که دُوآزَ سال گرفتار خونریزی بی. 26او وِرَ دوا دَرمُو وَرِ طبیبا زیادی رفتُ عِذاوِ زیادی کَشیَ وی وُ تَمامِ دارایشِه خرج کرِدَ وی،امّا وِ جا ایی که خُو با، بَدتَر شیَ وی. 27پَ وَختی دِبارَ عیسی شِنُفت، دِ دُمِ جمعیت آما پشتِ سَرِ عیسی وُ دَس هَشت گوشه رَداش. 28وِرِ ایکه وا خُیِش گُفتَه وی: «اَیَر حتی دَسِم بَخُورهَ وِ گوشه رَداش شفا مِیرِم.» 29دَرجا خونریزش بَن آما وُ اَ بَدَن خُیِش فَمس اَ او بِلا شفا گِرِفتَه. 30عیسی درجا فَمِس که نیرویی ازِش آمیَ دَر. پَ دِ مینِه جمعیت رو وُریَشتُن وُ پُرسی: «ایی کی بی دَس هَشت قَ رَدام؟» 31شایِرداش جُواو دان: «مُویینی که مَردِم ازدحام کِردَن اوسِه مِپُرسی، ”ایی کی بی دَس هَشت قَم؟“» 32امّا عیسی سِیلِ اطراف مِکِرد تا بُویینهَ کی ایی کارِنِه کِردَه. 33پَ او زَ که مینِس چی وِش گذَشتهَ هموجور که مِلَرزی،هَراسو آما اِفتا وِ پا عیسی وُ تمام حقیقَتِنِ وِ عیسی گُفت. 34عیسی وِش گُفت: «دختَر ایمانِت تُونِه شفا دیَه. وِسلامت بَرو وَ اَ ایی بِلا رها با!»
35عیسی هَنی داشت صُوَت مِکِرد که عده ای اَ خُونَه یایروس، رئیس کنیسَه، آمان وُ گُفتن: «دُختَرِت مُرد!دیَه چُنَ استادِ نِه مِنازی دِ زحمَت؟» 36عیسی هَمی که صُوَتای اونان شِنُفت وِ رئیس کنیسَه گُفت: «نترس فقط اِیمان داشتَه وا.» 37وُ اجازَ نَدا غیر پِطرس وُ یعقوب وَ یوحنا بِرارِ یعقوب، کَسی دیَر،دُمِش بَرَ. 38وَختی که رَسِسِن وِ خُونَه رئیس کنیسَه، عیسی دیی که جیغ وُ وِلنگیَ وُ عده ایی وا صدا بُلن مِگورگَن وُ شیون مُکُنن، 39هَمی که رَفت داخِل وِشو گُفت: «ایی چِه جیغ وُ وِلنگیَ چُنَ گورگَه وُ زاری مُکُنید؟ دختَر نمُردَه، بلکه خُفتیَ.» 40اونا وِش خَنِّسِن. اَمّا بَعدِ ایکه اونان کِرد دَر، بُواَ وُ نِنَه دختَر وُ همیجور شایِردایی نِه که وآردِش بییِن وا خُیِش بُرد داخل،جایی که دختَر بی. 41او وَخت دَسِ دختَرنِه گِرِفت وُ وِش گُفت: «تالیتا کوم!» یعنی: «دختَر کُوچوک وِتو مُوئِم وُری،» 42او فِورن وُرِیساُ اِفتا را. او دُختَر دُوآزَ سالَه بی. اونا اَ ایی جریان سخت شِگِفت زیَه شوئِن. 43عیسی وِ اونا وا تاکید دستور دا که نَلَن کِسی اَ ایی جریان خوَردار با، وُ وِشو گفت چیِئی وِرَ خُردَن بَیَن وِ دختَر.
Currently Selected:
مَرقُس 5: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
