مَرقُس 4
4
مَثَل بَرزِگَر
1یِه دفعه دیَر عیسی دِ لُوءِ دریا شروع کِرد وِ تعلیم دییَن. عده زیادی دُورِشِه گِرِفتَه وین جوری که ناچار رفتُ نِشِس دِ قایقی که دِ مینِ دریا بی، وَ تمام مردِم، لُوءِ دریا دِ خشکی بییِن. 2اوسِه وا مَثَلا چیا زیادی وِ اونا یاد دا. او دِ تعلیم خُیِش وِشو گُفت: 3«گوش بَئید! یِه رو بَرزِگری وِرَ پاشیَن دُو رفت دَر. 4وَختی که دُو مِپاشی بعضیاشو اِفتا دِ مینِه را وُ پرَندِآ آمان وُ اونان خُوردِن. 5بعضی اَ دُونا اِفتا رو زمینِ سِفتُ پر اَ سنگ که خاکِ زیادی نَشتا. پَ زو سبز شُوئِن وِرِ ایکه خاک عمقی نَشت، 6وَ همی که اَفتُو زا هَمَشو سُوختِن وُ خشک شوئِن، وِرِ ایکه ریشه نَشتِن. 7بعضیاشو اِفتان دِ مینِه خارا. خارا سبز کرِدِنُ اونانِ خَفهَ کِردِن وُ ثمری اَزِشو وِ دَس نیاما. 8باقی دُونا اِفتان رو زمینِه خُو وُ جَوُونَه زان سبز کِردِن وُ بار اُوُردِن، زیاد شوئِن،بعضی سی، بعضی شَصت وُ بعضی صد بِراوَر.» 9اوسِه عیسی گُفت: «هر کهَ گوش شِنوا دارَه، بَشنُوءَ.»
10وَختی که عیسی تنا بی او دُوآزَه نَفر وُ اونایی که دُورش بییِن، دِبارَه مَثلا ازِش پُرسیِین. 11وِ اونا گُفت: «دَرکِ راز پادشایی خدا وِ شما عطا شیَ امّا وِرَ مردمِ بیرون همه چی وِ صورت مَثَلَه؛ 12تا:
”سِیل کُنن امّا درک نَکُنَن
بَشنوئَن امّا نَفَمَن،
نَکُنَه وُرییَردَن وُ بخشیدَ بَشَن!“»
13اوسِه و اونا گُفت: «یعنی ایی مَثَلِ نِه نَفَمِسید؟ پَ چجوری مِتُونید مَثَلا دیَرِ نِه بَفَمید؟ 14بَرزِگر کلام نِه مِکارَه. 15بعضی اَ مَردِم مِثِ دُونا کنار رائَن اونچو که کلام کاشتَه مِشَه هَمی که کلام نِه مِشنُوئَن، شیطُو زو میا وُ او کَلامی نِه که دِ اونا کاشته شیَ مِدُزَ. 16بَقیَه مِثِ دُونا کاشته شیَ دِ لاوِلا سَنگاَن اونا کلام نِه مِشنُوئَن وُ زو اون وا شادی قَوول مُکُنن، 17اما وِرِ ایکه اَ خُیِشُو ریشه نَرَن فقط مدتِ کَمی طاقت میارَن. اَما هَمی که وِ خاطر کلام مِفتَن دِ سختی وُ عِذاو ایمانِشونِ اَ دَس مییَن. 18عِده ایی دیَر مِثِ دُونا کاشته شیَ دِ مینِه خارائَن؛ کلام نِه مِشنُوئَن، 19اما نگرانیا ایی دُنیا وُ زَرقُ بَرق مال وُ ثروت وُ هَوَسِ چیا دیَر دِ اونا رِخنَه مُکُنَه وُ کلام نِه دِ مینِشُ خَفهَ مُکُنه وُ دیَه وِ بار نمِنیشَن. 20امّا دُونی که دِ زِمینِ خُو كاشته شیَ کِسیَ که کَلام نِه مِشنوئَه وَ اونِ قَوول مُکُنَه وَ سی، یا شَصت یا صد بِراوَر ثمر میارَ.»
مَثَل چراغ
21عیسی وِشو گُفت: «مَیَر چراغِ نِه میارید تا اونِ زیر سَرپوش یا تختی بَلید؟ مَیَر اونِ نِمَلید رو چراغدُونی؟ 22وِرِ ایکه چیی پِنهُون نیسا مَیَر وِرَ آشکار شییَن وُ چیی پوشِسَه نیسا مَیَر وِرَ بَرمَلا شییَن. 23هَر کَه گوش شِنوا دارَه، بَشنُوءَ.» 24اوسِه هَنی وِشو گُفت: «حَواسِتو با چی مِشنُوئید. وا همو پیمُونِه ای که وزن کُنید،وا هَمو پیمُونَه وِرَتو وَزن مُکُنَن وُ حتّی بیشتَر. 25وِرِ ایکه وِ او که دارَه، بیشتَر مِیَن و اَ او که نَرهَ همونیَم که دارَه اَزِش میرَن.»
مَثَل دُونی که سبز مُکُنَه
26عیسی گُفت: «پادشایی خدا مِثِ مردیَ که رو زِمی دُو مِپاشَ، 27شُو وُ روز چه دِ خُآو با چِه بیار دُونا سبز مُکُنَن وُ بزرگ مِشَن. چجوریشِ نِمِنَه. 28زِمی خود وِ خود بار مییَه: اوَل ساقَه بَعد قوشَه سبز مُکُنَه اوسِه قوشَه پر مِشهَ اَ دُو. 29وَختی که دُو بَرَسَه، برزِگَر فُورن داس نِه وُرمَرَ وِرِ ایکه مُوسِم دِرو رَسِسَه.»
مَثَل دُونِ خَردَل
30عیسی یِه بارِ دیَر گُفت: «پادشایی خدانِه وِ چه چی مِتُونیم تَشبیه کنیم یا چه مَثَلی مِتونیم وِرَش بیاریم 31او مِثِ دُونِ خردَلَه. خَردَل، دُونِ کُوچوکیَ که دِ زِمی مِکارَن، 32امّا هَمی که کاشتَه شُد سبز مُکُنَه وُ اَ تمام گیا آ باغ بزرگتَر مِشهَ شاخه آش بزرگ مِشَن جوری که پرنده آ آسِمو میان وُ دِ سایۀ شاخه آش آشیونَه مِسازَن.»
33عیسی وا مثلا زیاد دیَری تا جایی که مِتونِسِن بَفَمَن، کلام خدانِه وِرَشو مِگُفت ، 34او بِغیرِ مَثَل چیی وِشو نِمِگفت امّا وَختی که وا شایِرداش تَنا بی، وِ اونا معنی مَثَلانِ مِگفت.
آرام کِردَنِ توفانِ دریا
35هَمو روز ایوارَه، عیسی وِ شایِرداش گُفت: «بیاید بَریم اوطرف اِوُ.» 36اونا جمعیتِ تَرک کِردَن وُ عیسانِه دِ هَمو قایقی که بی، وآردِ خُیِشُو بُردِن. چَن تا قایقِ دیَرم همراشو بی. 37یِیهو بادِ شدیدی وُرِیسا، موجا جوری وِ قایق مِزان که قایق داشت اَ اِوُ پر مِشُد. 38اما عیسی دِ عقب قایق، سرشِ هشتَ وی رو بالِش وُ خُفتیَ وی. شایِردا اونِه بیار کِردِن وُ گُفتن:«استاد تو باکِت نیسا که غرق بَشیم؟» 39عیسی وُرِیسا وُ توپِس وِ دریا گُفت: «دُنگ نَکُ! آرُوم بیر!» یِیهو باد خُفتی وُ هُمَه جا خیلی آرُوم شد. 40اوسِه وِ شایِردا خُیِش گُفت: «چُنَ ایجور زرتِلاک شوئین؟ مَیَر هَنیَم ایمان نَرید؟» 41اونا خیلی هَراسو شوئِن، وِ هم مِگُفتن: «ایی چِه کِسیَ که حتی باد وُ دریائَم اَزِش فَرمو مورَن!»
Currently Selected:
مَرقُس 4: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
