مَرقُس 3
3
شفای مردی که دَسِش خشک شیَ وی
1عیسی یِ دفعه دیَه رَفت وِ کنیسَه. اونچو مردی بی که یِه دسِش خشک شیَ وی. 2اونا عیسی نِه زیر نَظَر داشتِن که بُویینَن دِ روزِ شَبّات او مَردِنِه شفا مییَه تا بونِه ای وِرِ مَحکوم کِردَنش پیا کُنن. 3عیسی وِ مردی که دسِش خشک شیَ وی گُفت: «بیا اینچو.» 4اوسِه اَ اونا پُرسی: «دِ روز شَبّات خُویی کِردَن جایزَ یا بدی کِردَن؟ نجات جونِه کِسی یا کُشتَن؟» اَمّا اونا ساکِت مُنِن. 5عیسی، وا عصبانیت سیلِی کِرد وِ اونایی که دُورِش بییِن وُ غَمگین اَ بیرَحمی اونا ، وِ او مرد گُفت: «دسِتِه دِراز کُ.» او دَسِشِه دِراز کِرد وُ دَرجا دسِش سالم شُد. 6اوسِه فَریسیا فِورَن رفتِن دَر وُ وا هَوادارا هیرودیس نَخشَه کَشییِن که چِجوری عیسانِه اَ مین وُردارَن.
جَمیعتی دِ دُم عیسی بین
7عیسی واردِ شایِرداش رَفت وِ طرف دریا. عدۀ زیادی اَ مَردِم جَلیل دِ دُمِش اِفتان را. 8وُ هَم، عدۀ زیادی اَ مردِمِ یهودیَه وُ اورشلیم وُ اَدومیه وُ نواحیِ اوطرف رودخونهَ اُردُن وَ دُورُ وَرِ صور وُ صیدون، وَختی که خَوَرِ تمام کارای عیسانِه شِنُفتِن آمان وَرِش. 9وِ خاطر زیادیِ جمعیت، عیسی وِ شایِرداش گُفت قایقی وِرَش آماده کُنَن تا مَردِم وِش زور نیارَن. 10وِرِ ایکه اَ اونچو که خیلیانِ شفا دیَه وی ، دَردمندا وِش هُجوم میاوُردِن تا دَس بَلن قَش. 11هر وَخت که ارواح بَد اونِ مِدین دِ بِراوَرش مِفتان وِ خاک وُ هَوار مِکردِن: «تُو پسر خدایی!» 12امّا او سخت منعشو مِکرد که وِ کِسی نُوئَن که او کیهَ.
انتخاب کِردِن دُوآزَه رسول
13عیسی اَ کُویی رَفت بالا وُ اونایی که دِ نظرِش بییِن هِنا کِرد وُ اونا آمان وَرِش. 14او دُوآزَه نَفرِ نِه انتخاب کِرد وُ اونانِ رسول خُن تا واردِش بان وُ بَفِرسَشو وِرَ موعظَه کِردَن، 15وَ ایی اقتدارِ نِه داشتهَ وان که دیوا نِه بَنازَن دَر. 16او دُوآزَه نَفری که انتخاب کِرد اینا بییِن: شَمعون هَمو که اسم اونِ هَشت پِطرُس؛ 17یعقوب پسر زِبِدی وُ بِرارِش یوحنا هَمونایی که اسمِشونِ هَشت «بوآنِرجِس»، یعنی «پسرا رعد »؛ 18آندریاس، فیلیپُس، بَرتولْما، مَتّی، توما، یعقوب پسر حَلْفای، تَدّای، شَمعون غیور، 19وُ یهودا اسْخَریوطی که عیسانِه تسلیمِ دُشمن کِرد.
20یِه رو دیَه عیسی رَفت وِ خُونَه وُ هَنی عدۀ زیادی جمع شوئِن،جوری که اونُ شایِرداش حتّی وَخت نُو خُوردِن نَشتِن. 21وَختی که کَسِ کارِ عیسی اینِنِ شِنُفتِن اِفتان را تا اونِه وُردارَن وا خُیِشُو بُورَن، وِرِ ایکه مِگُفتن: «ایی زیَه وِ سَرِش »
کُفر وِ روحالقدس
22معلمای تورات هَم که اَ اورشلیم آمیَ وین مِگُفتن: «ایی بَعَلزَبول که رَئیسِ دیواَ اونِ گِرفتَه،وُ دیوانِ وِ کمک او مِنازَ دَر.» 23پَ عیسی هِناشو کِرد وُ مَثَلایی وِرَشو اُوُرد وُ گُفت: «چجوری مِشَه شِیطُو، شیطُونِ بَنازَ دَر؟ 24اَیَر مَملِکَتی وِ ضد خُیِش تَجزیه با نِمِتُونهَ پایدار بَمُونَه. 25وَ هَمیجور اَیَر خونه ایی وِ ضِد خُیِش تَجزیه با، او خُونَه پایدار نِممُونَه. 26همیجور شیطُو اَیَر وِ ضِد خُیِش وُریسَه وُ تَجزیه با، نِمِتُونه دَوام بیارَ، بلکه رَسِسَه وِ آخِرِش. 27دِ واقِع،هوشکه نِمِتُونه بَرَ مینِه خُونۀ مردِ زورمندی وُ مال وُ مِنالِشِ غارت کُنه مَیَر ایکه اوَل او مرد زورمندِنِه بَوَنَه. اوسهِ مِتُونهَ خونَشِه غارت کُنَه.
28وِ راسی وِ شما مُوئِم که تمام گُناآ بنی بَشَر وُ هر کُفری که کُنید، مِوَخشییَه، 29امّا هر که وِ روحالقدس کُفر کُنَه هوچ وَخت بخشیدَ نِما بلکه محکوم وِ یِه گُناه ابدیَه.» 30ایی صُوَت عیسی وِ خاطر ایی بی، که مِگُفتن: «روحِ بَد دارَه.»
نِنَه وُ بِرارا عیسی
31اوسِه نِنَه وُ بِرارا عیسی آمان،وایسان دَر، یکی نِه فِرسان تا عیسانِه هِنا کُنَه. 32جِماعَتی که نِشِسَه ویِن دُورِ عیسی، وِش گُفتِن: «نِنَه وُ بِرارات وایسیَن دَر، دُم تو میَردن» 33عیسی جُواو دا: «نِنَه وُ بِرارام کیَن؟» 34اوسِه وِ اونا که نِشِسَه ویِن دُورِش، سِیلی کِرد وُ گُفت: «اینا نِنَه وُ بِرارامَن! 35وِرِ ایکه هر کهَ ارادِۀ خدانِه وِ جا بیارَ،نِنَه وُ بِرار وُ خُواَر مَنَه.»
Currently Selected:
مَرقُس 3: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
