مَرقُس 16
16
زِنَه شیَن عیسی
1بَعدِ روزِ شَبّات، مریمِ مَجْدَلیّه وُ سالومه وُ مریم نِنِۀ یعقوب، سِدر وُ کافور خَرییِن تا بَرَن وُ جِنازه عیسانِه تَدهین کُنَن. 2پَ دِ روزِ اَوَل هفتَه، دَم صُو رَفتِن طِرَف مَقوِرَه. 3اونا وِ هم مِگُفتن: «ایسه کی سَنگِنِ وِرَمو اَ جِلو مَقوِرَه کنار مِزِنَه؟» 4امّا وَختی سِیل کِردِن، دییِن او سنگ که خیلی هَم قِویین بی، اَجِلُو مَقوِرَه غَلطِسی کناری. 5هَمی که رفتِن داخل مَقوِرَه، جِوُونی نِه دییِن که نِشِسَه وی طرف راسِ مَقوِره وُ رَدا سفیدی دِ وَر داشت، اونا زرتِلاک شوئِن ، 6جِوُو وِشو گُفت: «نترسید شما دُمِ عیسیِ ناصری میَردید که کَشیَنِش وِ صَلیب. او زِنَه شیَه اینچو نیسا. جایی که جِنازَشِه هَشتِید سیل کنید. 7ایسه بَرید وِ شایِرداش وُ وِ پطرس بُئید که او قبلِ شما مِرَ وِ جلیل؛ دِ اونچو اونِه نِه مُویینید هَموجور که قبلِ ایی وِتو گُفته وی.» 8پَ زَنا رفتِن دَر وُ اَ مَقوِرَه فِرار کِردِن،لرزَه اِفتیَ وی وِ جُونِشُ وَ حیرو شیَ وییِن ، اونا وِ هوشکَه چیی نَگُفتِن وِرِ ایکه زَلَشو مِرَفت.
9وَختی که عیسی صُوِ زو دِ روزِ اول هفتَه زِنَه شد، اوَل وِ مریم مَجْدَلیّه ظاهر شد، هَمونی که عیسی هَفتا دیوِ نِه ازِش کرِدَ وی دَر. 10مریم هَم رَفتُ وِ شایِردا عیسی که عذادار بییِن وُ مگورگِسن خَوَر دا. 11امّا اونا وَختی که شِنُفتِن عیسی زِنَه شیَ وُ وِ مریم ظاهِر شیَ، باور نَکِردَن.
12بَعدِ اینا عیسی خُیِشِه وا ظاهری دیَر وِ دُو نَفَر اَ اونا که وِ طرف داهاتا مِرفتن نِشُو دا. 13او دُوتا وُریَشتِن وُ باقینِه اَ ایی جَریان واخَور کِردِن، امّا حَرفِ اونانَم باور نَکِردِن.
14بَعد عیسی خُیِشِه وِ او یازدَه نَفَر، هَموجور که مشغولِ نو خوردَن بییِن نِشُو دا وُ اونانِ وِ خاطر بی اِیمانی وُ سَختدِلیشو سرزنش کِرد، وِرِ ایکه صُوَتا اونایی که اونِه بَعدِ زِنَه شییَنِش دییِن، باور نَکِردَن. 15اوسِه وِ اونا گُفت: «وِ سَراسر دُنیا بَرید وُ ایی خَوَرِ خُوشِه اِنجیلِ وِ تمام مَردِم دنیا اعلام کنید. 16هر کَه اِیمان بیارَه وُ تعمید بیرَ، نجات پیا مُکُنَه. امّا هر که ایمان نیارهَ مَحکوم مِشَه. 17وَ ایی نِشونه آ واردِ ایماندارا هِسا : وِ اسم مَه دیوانِ مُکُنَن دَر وُ وِ زوونا جدید صُوَت مُکُنن، 18وَ وا دَساشو ماران مِیرن وُ اَیَر زهر کُشَندَ هم بَنوشن بِلایی نِمِیرَشو وُ دَساشُونِه وِ مریضا مَلَن وُ اونا شفا پیا مُکُنن.»
19اوسِه عیسی خداوند بَعدِ ایی که ایی صُوَتانِ وِشو گُفت بالا بُردَ شُد وِ آسِمُو وُ نِشِس وِ دَس راسِ خدا. 20اونا رفتِن دَر وُ دِ همه جا موعظه مِکِردَن، وُ خداوند وِ کاراشو بَرِکَت مِدا وُ کَلامِشون وا نِشُونه آیی که واردِشو بی، تائید مکِرد.
Currently Selected:
مَرقُس 16: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
