مَرقُس 13
13
نِشُونیا آخِرِ ایی زِمان
1وَختی که عیسی اَ معبد مِرفت دَر یکی اَ شایِرداش وِش گُفت: «استاد سیل کُ! چه سنگای با شِکوهی وُ چه بناآی با شِکوهی!» 2عیسی وِش گفت: «تمام ایی بناآی بزرگِ نِه مُویینی؟ سنگی وِ رو سنگی دیَر وِجا نِممُونَه، بلکه هَمشو مِرُمیَن.»
3وَختی که عیسی دِ کُوءِ زیتُو نِشِسَه وی رو وِ رو معبد خداوند، پطرس وُ یعقوب وُ یوحنا وُ آندریاس دِ خلوت ازِش پُرسییِن: 4«وِ ایما بُ کِی ایی اتفاقا مِفتَه وُ نشُونه نَزیک شییَنِ ایی اِتِفاقا شیَ؟» 5عیسی وِشو گُفت: «حَواسِتو با تا کِسی اَ را وِ دَرتو نَکُنَه. 6خیلیا وِ اسم مَه میان، مُوئَن ”مَه هَمونِم“ وُ خِیلیانِه اَ را وِ دَر مُکُنن. 7وَختی که دِباره جنگا مِشنُویید وُ خَوَرِ جنگا وِ گُوشِتُو مِرَسهَ هَراسو نَشید. ایی باید اتفاق بِفتَه، امّا هَنی آخِرِ کار نَرَسِسَه. 8مِلَتی وِ ضِد مِلَتی دیَر وُ مملکتی وِ ضِد مملکتی دیَر وُرمِیسَن. دِ جایا مُختَلِف زِمی لَرزَ میا وُ قَحطیا مِشَه. امّا اینا فقط مِثِ شروع دَردِ زایمانَ.
9وَ امّا شما حَواسِتو وِ خُیِتُو با، وِرِ ایکه وِ خاطر مَه شُمانِه مییَن وِ مَحکَمه آ وُ دِ کَنیسِه آ میوَنَنِتُو وِ فِلَک دِ بِراوَرِ والی آ وُ پادِشا آ وایمیسید تا وَرِ اونا شهادت بَئید. 10اول باید ایی خَور خُوش پادشاییِ خدا وِ تمام مِلَتا اعلام با. 11پَ هر وَخت که شُمانِه گرفتار کُنن وُ بُورَنِتُو وِ مَحکِمَه، پیشاپیش دِلدِهول نَوایید که چی بُوئید بلکه هَرچیی که دِ او ساعت وِ شما گُفته مِشهَ هَمونِ بُویید وِرِ ایکه او که صُوَت مُکُنَه شما نیسید بَلکه روحالقدُسَ. 12بِرار، بِرارِنِه وُ بُواَ، اولادِنِه میَه وِ کشتَن. اُولادا وِ ضد نِنَه وُ بُواَشو وُرمِیسَنُ اونان مییَن وِ کشتَن . 13همه وِ خاطر اسم مَه اَ شما نفرت پیا مُکنن امّا هرکَه تا آخِر طاقت بیارَ، نجات پیا مُکُنَه.
14امّا همی که او ”مکروهِ ویرانگرِ“ دِ جایی که نباید،سَرِ پا بُویینید - او که دارَ مِخونَه حواسِش با - اوسِه اونا که دِ وُلاتِ یهودیَه هِسِن، فِرار کُنن وِ کوُآ ؛ 15هرکَه دِ سَرِ بونِ خونَه با، وِرَ وُرداشتِنِ چییِ، نیا دامو وُ نَرَ مینِه خونَه، 16هرکَه دِ سَرِ زِمینَ وِرَ وُرداشتن رَداش وُرنیَردهَ وِ خونَه. 17وای وِ حال زَنایی که آبستنَن وُ زنا شیردِه دِ او روزا! 18دعا کنید که ایی چیا دِ زِمِسُو نَوا. 19وِرِ ایکه دِ او روزا اوجور مصیبتی اِتفاق مِفتَه که اَ اَوَلِ ایی دُنیا که خدا آفَریدَه تا ایسِه مِثِش نَویَه وُ هوچ وَخت هَم نِما. 20وَ اَیَر خداوند او روزانه کوتا نِمِکرد هوچ بَشری جُونِه سالم وِدَر نِمِوُرد امّا وِ خاطر برگزیدآیی که خُیِش اونان انتخاب کِردَه، او روزانِه کوتا کِردَه. 21دِ او زِمان اَیَر یکی وِ شما بُوئَه: ”سِیل کُ، مسیح موعود اینچُونَ“ یا ”سیل کُ، اونچُونَ!“ باور نَکنید. 22وِرِ ایکه کِسایی وِ اسم مسیح موعود وُ پیغمَرا دُرویی وُرمیسَن، نِشُونه آ وُ معجِزاتی مُکُنن تا اَیَر بَشَه برگزیدِآنِ اَ را دِرارَن. 23پَ حَواسِتو با، وِرِ ایکه پیشاپیش تمام اینانِ وِشما گفتِم.
24امّا دِ او روزا بعد او مصیبت
”خورشید تاریک مِشَه
وُ ماه دیَه نور نمِیهَ.
25سِتارِه آ اَ آسِمو مِفتَن دامو
وُ قُدرتای آسِمُونی میان وِ لَرزهَ.“
26اوسِه مَردِم پسر انسانِ مُوینَن که وا قُدرَت وُ جلالِ عظیمی دِ ابرا میایَ. 27او فِرشتِه آنِ مِفِرسَه وُ برگزیدِآی خُیِشِ دِ چار گوشۀ جهان اَ او سَرِ زِمی تا ایی سَرِ آسِمو، جمع مُکُنَه دورِ هَم.
28ایسِه،اَ درخت اَنجیل ایی درسنِه یاد بِیرید: هَمی که شاخِه آش جِوونَه مِزِنَه وُ بَلگ میَه مِفَمید که تُواِسُو نَزیکَه. 29وِ ایی ترتیب همی که بُویینید ایی چیا اِتفاق مِفتَه، بَفمید که پادشایی خدا نَزیکَه، بلکه وایسیَ دَم دَر. 30وِ راسی وِشما مُوئِم که تا تمام اینا اِتفاق نِفتَه، ایی نسل اَ بین نِمِرَ. 31آسِمُونو زِمی اَ بین مِرَ امّا صُوَتای مَه اَ بین نِمِرَ.
انتظارِ وِرِ وُریَشتِن مسیح
32اَما اَ او روز وُ او ساعت هوشکَه خَور نَرَ غیرِ بُواِیِ آسِمونی؛ حتی نَه فِرشته آ آسِمونی وُ نَه پسر . 33پَ هوشیار بَمونید بیار بَمونید وِرِ ایکه نِمِنید او زِمان کِی مِرَسَه. 34او زِمان مِثِ مردیَ که رَفته وا وِ سفر وُ دِ دَمِ رَفتن،خونَشِه بَسپُرَ وِ خادِماش وُ وِ هر کامِشو وظیفهایی بییَه وُ وِ دربُونَم دستور دیَه که بیار بَمُونَه. 35پَ شمانَم بیار باید وِرِ ایکه نِمِنید صاحِو خونَه کی میا،شُو یا نِصفه شُو، وَختِ خُروس خُو یا دَم اَفتُو. 36نَکُنَه که او یِیهو بیا وُ شُمانِه دِ خِوُ بُوینهَ. 37او چیی که وِشما مُوئِم، وِ همه مُوئِم: بیار بَمُونید!»
Currently Selected:
مَرقُس 13: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
