مَرقُس 12
12
مَثَل باغِوونای شَرور
1اوسِه عیسی وا مَثلا شروع کِرد واشو وِ صُوَت کِردَن وُ گُفت: «مردی تاکستانی دُرُس کِردُ دُورِش دیواری کَشیُ حُوضِ کُوچوکی وِرَ لِه کِردَن اَنگورُ وِرَ گرِفتِن شِراو دِش کَن وُ بُرجی وِرَ دیدَه بانی مینِش ساخت اوسِه تاکستانِ کِرا دا وِ چَن تا باغِوو وُ خُویِش رَفت سَفَر وِ مملکتی دیَر. 2دِ مُوسِم چیئَن اَنگور غُلامی فِرسا وَرِ باغِوونا تا سَهمِشِ اَ میوۀ تاکستان بَسُونَه. 3اونا غُلام نِه گِرفتنُ زان وُ دَسِ خالی رائیش کِردِن. 4اوسِه صاحِوِ باغ غُلامِ دیَری نِه فِرسا وَرِشو امّا باغِوونا سَرشِه اِشکِنان وُ واش وا بیشرمی رفتار کِردِن. 5هَنی غُلام دیَری نِه فِرسا امّا اونَم کُشتِن. وَ وِ هَمی صُورَت وا مابقیَم ایجور کِردِن؛ بعضی نِه زان وُ بعضی نِه کُشتِن. 6او یِه نَفر دیَرَم داشت که بَفِرسَ وَ او پسر عزیزِش بی. آخِر سَر اونِه رایی کِرد وُ وا خُیِش گُفت: ”عِزَتِ پسرمهِ نیا مَرَن.“ 7امّا باغِوونا وِ هم گُفتِن: ”ایی وارِثَ؛ بیاید اونِه بَکُشیم تا میراثش بَرَسَه وِ اِیما.“ 8پَ اونِه گِرفتِنُ کُشتِن وُ اَ تکستان اِناختِن دَر، 9ایسِه، صاحِوِ تکستان چی مُکُنَه؟ او میا وُ باغِوُونانهِ مُکُشَه، تاکستانِ مِیَه وِ کِسایی دیَر. 10مَیَر اینِنِ دِ کِتُآوا مقدّس نَخُنید که:
” سنگی که معمارا رَدِش کِردِن،
سنگ اصلی بَنا شیَ؟
11ایی کار خداوند بییَ
وُ دِ نظر اِیما عجیبَ“؟»
12اونا دِ دُمِ ایی بین تا عیسانِه بِنازن دِ گیر وِرِ ایکه فَمِسِن که ایی مَثَلِنِ دِبارَه اونا گُفت امّا اَ مَردِم مِترسِسِن پَ اونِه تَرک کِردِن وُ رَفتِن.
سؤال دِبارَه خراج دییَن
13اوسِه بعضی اَ علمای فرقۀ فَریسی وُ بعضی اَ طرفدارا هیرودیسِ فِرسان وَرِ عیسی تا اونِه وا صُوَتایِ خُیِش بنازَن دِ دام. 14اونا آمان وَرِ عیسی وُ گُفتن: «استاد مِینیم مرد رو راسی هِسی وُ اَ هوشکه نِمِترسی وِرِ ایکه گولِ ظاهِرِ نِمُخوری بلکه راءِ خدانِه وِ دُرِسی انجام میی. یعنی خراج دییَن وِ امپراطور جایزَ یا نَه؟ 15یعنی باید خراج بَییم یا نَه؟» امّا عیسی وِ ریاکاریشو پی بُرد وُ گُفت: «چُنَ مَنِه اِمتِحان مُکُنید؟ دیناری بیارید وِرَم تا اونِ بُویینِم.» 16سکهایی اُوُردِن. اَ اونا پُرسی: «نقش و اسم چه کسیَ رو ایی سکَه؟» اونا جُواو دان: «نقش وُ اسم امپراطور.» 17عیسی وِ اونا گُفت: «پَ مال امپراطورنِه بَیید وِ امپراطور وُ مال خدانِه وِ خدا.» اونا اَ صُوَتای او هَمیجور حیرو مُنِن.
سؤال دِبارَه زِنَه بییَن مُردِه آ
18اوسِه علمای فرقَه صَدّوقی که مِگُفتِن مُرد آ زِنَه نِمِشَن،آمان وَرِ عیسی وُ سؤالی ازِش پُرسیِن گُفتِن: 19«استاد،موسی وِرَ اِیما نِوِشت که اَیَر بِرارِ مردی بَمیرَه وُ بیوَش بَچِه ایی نَشتَوا او مرد باید وا,او بیوَنِه نکاح کُنَه تا نسلی وِرَ بِرارِش جا بَلَ. 20ایسِه هَفتا بِرار بییِن. بِرارِ اوَلی زَنی خواس وُ اُجاق کور مُرد. 21بِرارِ دُوم زَنِ بیوَه اونِ وِ نِکاحِ خُیِش دِراوُد ، امّا اونَم اُجاق کور مُرد. بِرارِ سِوُم هَم هَمی جور. 22وِ هَمی ترتیب، اَ هوچ کام اَ او هَفتا بِرار بَچِه ایی وِ جا نَمُن. آخِر سَر، او بیوَه هم مُرد. 23ایسِه دِ قیامت که مُردآ زِنَه مِشَن او زَ زَنِ کامیناشونَ وِرِ ایکه هر هَفتا بِرار وا او نِکاح کِردَه وین؟»
24عیسی وِ اونا گُفت: «مَیَر ایی صُوَتِ شما خُیِش وِ ایی دلیل نیسا که شما دِ اشتبایید وِرِ ایکه شما نَه نوشتِه آ مقَّدسنِ مینید وُ نَه قُدرتِ خدانِه؟ 25وِرِ ایکه وَختی که مُردِ آ زِنَه بَشَن نَه زَ ماخان وُ نَه شویَر مُکُنن بَلکه مِثِ فرشتِه آی آسِمو مِشَن. 26امّا دِبارَه زِنَه شیَن مُردِ آ مَیَر دِ تورات موسی نَخُنید که دِ حکایت بُوته آتِش خدا وِش چی گُفت: ”مَنِم خدای ابراهیم وُ خدای اسحق وُ خدای یعقوب“؟ 27خدا،خدای مُردِ آ نیسا بَلکه خدای زِنِه آءَ شما سَرتاپا دِ اشتِبایید!»
بزرگتَرین حُکم
28یکی اَ معلما تورات آما نَزیک وُ بحثشونِه شِنُفت. وَختی که دیی عیسی جُواو خُویی وِشو دا اَزِش پُرسی: «کامی اَ احکامِ خدا، اَ هَمَه مهمتَرَ؟» 29عیسی وِش گُفت: «مهمترین حُکم اینَ ”بَشنُو ای اسرائیل، خداوندْ خدای اِیما، خداوندِ یکتاست. 30خداوندْ خدای خُیِتِه وا تَمام دلُ وا تَمام جُو وُ وا تَمام فِکر وُ وا تَمام قُوَتِ خُیِت دوست داشته وا.“ 31دُومین حُکم ایِنَ: ”هَمسایَتِه مِثِ خُیِت دوست داشته وا.“ بزرگتَر اَ ایی دُوتا، حُکمی نیسا.» 32او معلمِ تورات وِش گُفت: «دُرِس گفتی استاد! وِراسی که خدا یکیَ وُ غیرِ او خدایی نیسا . 33وُ وا تَمامی دل وُ وا تمامی فَم وُ وا تمامی قوّت خُیِت دوست داشتَن،وُ همسایَتِه مِثِ خُیِت دوس داشتَن مهمتَرَ اَ تمام پیشکِشا سُوختنی وُ تمام قُروُنیا.» 34وَختی که عیسی دیی که عاقلانه جُواو دا وِش گُفت: «اَ پادشایی خدا دور نیسی.» اَ او وِ بعد هوشکه جُرأت نَکِرد چییِ ازِش بَپُرسَه.
مسیح پسر کیهَ؟
35وَختی که عیسی دِ مینِه صحنِ معبد تعلیم مِدا پُرسی: «چِجورَ که معلمای تورات موئَن مسیحِ موعود پسر داوود پادشاءَ؟ 36داوود، خُیِش وِ الهامِ روحالقدس،گُفتَه:
خداوند وِ خداوند مَه گُفت:
وِ دَسِه راسِ مَه بَنیش
تا اوسِه که دُشمناتِ بَنازم زیر پات.
37اَیَر داوود خُیِش، اونِه خداوند مِخونهَ او چِجور مِتُونهَ پسر داوود با؟» تمام جمعیت وا شوق وِ صُوَتای او گوش مِدان.
هشدار دِباره رهبرا دینی
38پَ دِ تعلیمِ خُیِش گُفت: «اَ معلما تورات دوری کنید که دُوس دارَن وا قَبای بُلَنی را بَرَن وُ مَردِم دِ کوچه وُ بازار وِشو سِلام کُنن، 39وُ دِ کنیسِه آ بِهترین جانِه داشتَ وان وُ دِ جَشنا بَنیشن دِ جایا بالای مجلسِ. 40اَ یِه طرف خونَه آ بیوَه زنانِ غارت مُکُنن وُ اَ طرف دیَر وِرِ خودنِمایی، دعاشُونِه طول مِییَن. مُکافات اینا خیلی سختتَر مِشَه.»
هدیۀ بیوَه زَن
41عیسی نِشِسَه وی رو وِ رویِ صنوقِ بِیتالمالِ معبد وِ سیل کِردِن مَردِمی که پول مِناختن دِ صَنوق پیشکِش. خِیلی اَ پولدارا پول زیادی مِناختِن. 42بیوَه زَنِ فقیری آما وُ دُو قِرُو، اِناخت دِ صَنوق. 43اوسِه عیسی شایِرداشِ هِنا کِرد وُ وِشو گُفت: «وِ راسی وِشما مُوئِم، ایی بیوَه زَ اَ تمام اونایی که پول اِناختِن دِ صَنوق، پولِ بیشتَری اِناختَه. 44وِرِ ایکه تمام اونا اَ اضافی دارایشُ دان امّا ایی زَ اَ دَستَنگی خُیِش، هر چی که داشت دا یعنی تَمام روزیشِه.»
Currently Selected:
مَرقُس 12: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
