مَرقُس 11
11
داخل شییَن شاهانَ عیسی وِ اورشلیم
1وَختی که رَسِسِن وِ داهاتای بِیتفاجی وُ بِیتعَنْیا که دِ نَزیکِی اورشلیم دِ پا کُوءِ زیتُو بی، عیسی دُو نَفر اَ شایِرداشِ فِرسا، 2وُ وِشو گفت: «بَرید وِ دهاتی که نوآتونَ هَمی که رَسِسید کُرَه خَری نِه مُویینید بَسِسَ که تا ایسِه کِسی سُوارِش نَشیَ. اونِ وا کنید وُ بیاریتِش. 3اَیَر کسی ازِتو پُرسی: ”چُنَ ایجور مُکُنید؟“ بُوئید: ”خداوند اونِ لازم دارَه وُ زو مِفِرسش پس.“» 4«او دو تا رفتِن مین یِه کوچَه وُ کُرَه خَرِینِه جُسِن که بَسِسی دِ جِلو دَری. پَ اونِ وا کِردِن. 5هَمو موقع بعضیا که اونچو وایسیَ وین پُرسیِین: چُنَ کُرَه خَرِنِه وا مُکُنید؟» 6هَر دوشو هَموجور که عیسی وِشو گفته وی جُواو دان پَ هَشتِن بورَنِش. 7اوسِه کُرَه خرِنِه اُوُردِن وَرِ عیسی، رداآشونِ اِناختن رو کُرَخر وُ عیسی سُوار شد. 8خیلی اَ مردِمَم رداآشونِ پَن مِکِردَن سرِ را عیسی وُ عده اییَم شاخهآیی که اَ مینِه زِمینا بُریَ ویِن پَن مِکِردِن دِ راش . 9اونایی که دِ نوآ عیسی مِرفتن وُ اونایی که اَ عقب او میامان حَوار مِکِرَدن مِگُفتن:
«نجات بَ!»
«مارِکَ او که وِ نام خداوند میایَ!»
10«مارِکَ پادِشایی بُوا اِیما داوود که دِ راَ!»
«نجات بَ دِ عرشِ برین!»
11پَ عیسی آما وِ اورشلیم وُ رَفت وِ معبد.اونچِو هَمه چینِه خُو سیل کِرد، امّا وِرِ ایکه دیر وَخت بی واردِ او دُوآزَه نَفر رَفت وِ بِیتعَنْیا.
عیسی درخت اَنجیلینِه نُفرین مُکُنهَ
12صُواش، وَختی که اَ بِیتعَنْیا مِرفتن دَر، عیسی گُسنَش شد. 13اَ دور درخت اَنجیلی نِه دیی که بَلگ داشت؛ پَ رَفت نَزیک تا بُویینهَ مِتُونَه دِ قَش میوَه پیا کُنه. وَختی نَزیک شد، غیرِ بَلگ چیئی قَش پیا نَکِرد، وِرِ ایکه مُوسِم اَنجیل نَوی. 14پَ وِ درخت اَنجیل گُفت: «نَشَه ،که دیَه هوچ وَخت،هوشکَه اَ تُو میوَه بَخورَ!» شایِرداش اینِنِ شنُفتِن.
15وَختی که رَسِسِن وِ اورشلیم، عیسی رفت مینِه معبد وُ اونایی که دِاونچو مشغول کسب کار بییِن کِرد دَر. او میزای صرّافا وُ بَساط کَفتر فُرُوشا نِه چَپَ کِرد، 16وُ اِجازَه نَدا کِسی وِرَ حمل کِردِنِ جِنسی اَ مینِ صحنِ معبد رَد با. 17اوسِه وِاونا تعلیم دا وُ گُفت: «مَیَر دِ کِتاوِ انبیا نوشته نَشیَ کِه،
”خونِۀ مَه خونِۀ دعا وِرَ تمام مِلَتا خُنهَ مِشهَ؟“
امّا شما اون کِردِید ”لُونۀ دُزا“.»
18سران کاهنا وُ معلما تورات وَختی اینِنِ شِنُفتِن دِ دُمِ رایی وِرَ کُشتِنِش بین وِرِ ایکه ازِش مِترسِسِن وِرِ ایی که تمامِ مَردِم اَ تعلیما او دِ حیرت بیین. 19سَرِ اِیوارَه عیسی وُ شایِردا اَ شَر رفتِن دَر.
خشک بییَه نِه درخت اَنجیل
20دَم صُو دِ را او درخت انجیلِنِه دییِن که اَ ریشه خشک شیَ وی. 21پِطرُس وِ خاطِر اُوُرد وُ وِ عیسی گُفت: «استاد سیل کُ! درخت اَنجیلی که نُفرین کِردی خشک شیَ.» 22عیسی جُواو دا: «وِ خدا اِیمان داشتَواید. 23وِ راسی وِ شما مُوئِم، اَیَر یکی وِ ایی کُوء بُوئَه، ”اَ جا کَنَه با، بِفت وِ دریا،“ وُ شک نَکُنَه دِ دلِش بلکه اِیمان داشتوا که اُوچیی که موئَه اتفاق مِفتهَ،وِرَش اَنجام مِشهَ. 24پَ وِشما مُوئِم، هر چیی که دِ دعا بَخوایید وُ اِیمان داشتَواید که اون وِ دَس اُوُردید،وِرَتو انجام مِشهَ.
25پَ همی که وایمِیسید وِ دعا اَیَر اَ کِسی چیی وِ دل دارید اونِه بَوَخشید تا بُواِ شُمانَم که دِ آسِمونَ تخصیرا شما نِه بَوَخشَه. 26امّا اَیَر شما نَوَخشید بُواَ شُمانَم که دِ آسِمونَ تخصیرا شِمانِه نِمِوَخشَ.»
سؤال دِبارَه اقتدارِ عیسی
27اونا یِه دفعه دیَر آمان وِ اورشلیم. وَختی که عیسی دِ معبد را مِرفت سران کاهنا وُ معلما تورات وُ مشایخ آمان وَرِش، 28پُرسیِین: «وِ چِه اِقتِداری ایی کارانِ مُکنی؟ چِه کِسی اقتِدار اَنجام ایی کارانِ وِ تُو دیَه؟» 29عیسی دِ جُواوِشو گُفت: «مَنَم ماخام چیی اَ شُما بَپُرسِم. جُوآوِمِ بَئید تا مَنَم وِتو بُئِم وا چِه اقتِداری ایی کارانِ مُکُنِم. 30تعمید یَحیی اَ طرف خدا بی یا اَ طرف انسان؟ جُواو بَئید.» 31اونا دِ مینِه خُیِشُ مشورت کرِدِنُ گُفتن: «اَیَر بُئیم، ”اَ طرف خدا بی“، مُوئَه، ”چُنَ وِش اِیمان نیاوُردید؟“ 32اَیَر بُئیم، ”اَ انسان ....“» اونا اَ مردِم مِتَرسِسِن وِرِ ایکه تمام مَردِم یَحیانِ یِه پیغمَر مینِسِن. 33پَ وِ عیسی جُواو دان: «نِمِنیم.» عیسی گُفت: «مَنَم وِ شما نِمُوئِم وا چِه اقتِداری ایی کارانِ مُکُنِم.»
Currently Selected:
مَرقُس 11: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
