مَرقُس 1
1
یَحییِ تعمید دَهَندَه، را نِه وِرَ مسیح آماده مُکُنَه
1شروع خَوَرِ خُوش دِبارَه عیسی مسیح، پسر خدا
2دُرُس هَموجور که دِ کِتاوِ اِشعیای نَبی آمییَ:
«ایسِه قاصد خُیِمهِ قبلِ تُو مِفِرسِم
که راتِ آمادَه مُکُنهَ»
3«صدا او که دِ بیاوُو حَوار مُکُنه:
”راءِ خداوند نِه آمادَه کنید!
راآ اونِه هَموار کُنید.“»
4یحییِ تعمیددَهَندَ دِ بیاوُو ظُهور کِرد، وُ وِرِ مَردِم موعِظَه مِکِرد وِرِ آمُرزِشِ گُناآشو تعمیدِ توبه بیرَن. 5تمامی مَردمِه سرزِمین یهودیَه وُ تمام مَردِمُونِ اورشلیم، مِرفتن وَرِش وُ وِ گُناآشو اعتراف مِکِردِن وُ دِ رودخونهَ اُردُن اَ دَسِش تعمید میرفتِن. 6یحیی لِواسی اَ پشم شتر مِکِرد وَرش وُ کمروَنِه چرمیایی مِوَست وِ قَش وُ ملخ وُ عسلِ صَرایی مُخورد. 7او موعظه مِکرد وُ مِگُفت: «بَعدِ مَه کَسی قَوی تَر اَ مَه میا که مَه حتی قابل نیسِم خم بَشِم وُ بَنِه اُرِسیاشِ وا کُنِم. 8مَه شمانِه وا اِوُ تعمید دیَم امّا او شمانِه وا روحالقدس تعمیدتو مییَه.»
تعمیدِ عیسی
9دِ او روزا عیسی اَ ناصرۀ جلیل آما وُ دِ رودخونهَ اُردُن وِ دَسِ یحیی تعمید گرفت. 10هَمی که عیسی اَ اِوُ میاما دَر دِ هَمو مِوقَع دیی آسِمو وا شُد وُ روحِ خدانِه دیی که مِثِ کَفتری میا دامو وِ روش. 11وُ صدایی اَ آسِمو آما که: «تُو پسر عزیز مَنی؛ مَه اَ تُو خیلی خُوشنودِم.»
اِمتِحان کِردَنِ عیسی
12روحِ خدا فِورَن عیسانِه بُرد وِ بیاوُو. 13عیسی چِل رو دِ بیاوُو بی وُ شِیطُو اِمتِحانِش مِکِرد. او وا جُونِوَرایِ وحشی سَر مِکرد وُ فرِشته آ وِش خِدمت مِکِردن.
عیسی خدمتِشِ شروع مُکنَه
14بَعدِ گرفتار شییَن یَحیی، عیسی رَفت وِ وُلاتِ جلیل. او خَوَرِ خُوشِ پادشایی خدانِه اعلام مِکِرد، 15وُ مِگفت: «وَختِش رَسِسَ وُ پادشایی خدا نَزیک شییَ. تُوبَه کنید وُ وِ ایی خَور خُوش ایمان بیارید.»
اوَلین شایِردا عیسی
16وَختی که عیسی اَ کنار دریاچَه جلیل رَد مِشُد شَمعون وُ بِرارِش آندریاسِ نِه دیی که تور مِناختن دِ دریا، وِرِ ایکه صیاد بییِن. 17عیسی وِ اونا گُفت: «دِ دُمِ مَه بیاید وُ مَه شمانِه صیاد مَردِمون مُکُنِم.» 18اونا فِورَن توراشونه هَشتِن وُ دِ دُمِ او را اِفتان . 19هَمی که کَمی که رَفت جِلو، یعقوب پسر زِبِدی وُ بِرارِش یوحنانِه دیی که دِ قایقِی توراشونِه راسِریس مِکِردَن. 20فِورن هِناشو کِرد. اوسِه اونا بُواَشُ زِبِدینِه واردِ کارگرا دِ قایق تَرک کِردَن وُ دِ دُمِ عیسی اِفتان را.
شفای مردی که روحِ ناپاک داشت
21اونا رفتِن وِ کَفَرناحوم. وَختی که روز شَبّات رَسِس، عیسی فِورن رَفت وِ کنیسَه وُ شروع کِرد وِ تعلیم دییَن. 22اونا اَ تعلیمِش شِگِفت زیَه شُوئِن وِرِ ایکه وا اقتدار تعلیم مِدا نَه مِثِ معلمایِ تورات. 23هَمو وَخت، دِ مینِه کنیسَشُ مردی بی که روح بَد داشت. او مرد حَوار کِرد: 24«ای عیسیِ ناصری، وامُو چِه کار داری؟ یعنی آمییِی نابودمو کُنی؟ مینِم تو کی یی! تُو هَمو قدّوسِ خدایی!» 25اَمّا عیسی تَشَر زا وِ روحِ بد وُ گُفت: «دُنگ نَکُ، بَرو ازِش دَر!» 26اوسِه روح بد او مَردِنِه سخت اِناخت وِ لَرزَ وُ وا جیغ و وِلنگ اَزِش دراما ، 27تمام مردِم جوری شِگِفت زیَه شیَ وییِن که اَ هم مِپُرسیِن: «ایی چیهَ؟ چه دَرس تازه وُ چه اقتِداری! او حَتی وِ ارواح بَد هم دستور مییَه وُ اونا اَ اَزِش اطاعت مُکُنن.» 28پَ چیی نیذَشت که آوازَش پیچِس دِ سَراسَر اطراف منطَقِۀ جلیل.
شفای خُسورَماِ پطرس وُ بعضیای دیَر
29وَختی که عیسی اَ کنیسَه دِرآما واردِ یعقوب وُ یوحنا رَفت وِ خونَه شَمعون وُ آندریاس. 30خُسورَما شَمعون طُو داشت وُ اِفتیَ وی دِ مینِ جا. اونا فِورَن عیسانِه اَ اَحوالش خَوَردار کِردَن. 31ایسِه عیسی رَفت بالا سَرِ او زَ وُ دسِشِه گِرِفت اونِه بُلَن کِرد طُوش قطع شُد وُ شروع کِرد وِ پذیرایی کِردَن اَ اونا.
32سَرِ شُو، موقِع اَفتو نِشی تمام مریضا وُ دیو زیَآنِه اُوِردِن وَرِ عیسی. 33تمام مَردمِ شَر دَرِ حیاط او خونَه جَمع شیَ ویِن! 34عیسی عده ای که گِرفتارِ مَرَضاِ جُور وا جُور بییِن شفا دا وُ هَمیجور دیوایِ زیادینِه کِرد دَر، امّا نِیزاشت دیوا چیی بُوئَن وِرِ ایکه اونِه مِشناختِن.
دعای عیسی دِ خَلوت
35شَفَقِ صُو که هَنی هوا تاریک بی، عیسی وُریسا وُ اَ خُونَه رفت دَر، رَفت وِ جای پِرتی وُ اونچو شروع کِرد وِ دعا کِردَن. 36شَمعون وُ اونایی که واردِش بییِن اِفتان وِ جُسَنِش. 37وَختی که پیاش کِردِن، وِش گُفتِن: «هَمَه دُمِ تُو میَردَن!» 38عیسی وِشو گُفت: «بیاید تا بَریم وِ داهاتا اَطراف تا اونچونَم مُوعِظَه کُنِم چون وِرَ هَمی آمییَم.» 39اوسِه اِفتا را،دِ سَراسَر جلیل دِ کَنیسَه آشو مُوعظه مِکِرد وُ دیوانِ مِکِرد دَر.
شفا مَردِ جُذامی
40یِه مَردِ جُذامی آما وَرِ عیسی، زانو زا وُ وا عیزِ التماس گُفت: «اَیَر بَخوای مِتونی مَنِه شَفا بَیی.» 41عیسی دِلِش وِرَش سُخت، دَسِشِه دِراز کرد وُ دَس هَشت دِ قَ او مرد وُ وِش گُفت: «ماخام،شفا بِیر!» 42دَرجا جذام اَزِش رفت دَر وُ شفا گِرِفت. 43عیسی فِورَن اونِه مُرخَص کِرد وُ وا تاکیدِ زیاد 44وِش گفت: «حَواسِت با که دِ ایی بارَه وِ کِسی چیِئی نُوئی؛ بلکه بَرو وَ خُیِتِه نِشُونِ کاهن بَ وُ وِرِ شفا گِرِفتَنِت او پیشکِشیایی که موسی امر کِرد، تقدیم کُ تا وِرَشو نشونِه ایی با که شفا گِرِفتِی.» 45امّا او مرد هَمی که رفت دَر بی پَروا دِ ایی بارَه صُوَت کِرد وُ ایی خَوَرِنِه پخش کِرد اَ ایی رو عیسی دیَه نَتُونِس آشکارا بیا وِ شَر، بَلکه مِمُن دِ جایا پِرتی دور اَ شَر. وا ایی حال، مردِم اَ هر طرف میامان وَرِش.
Currently Selected:
مَرقُس 1: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
