مَتّی 28
28
رستاخیز عیسی
1بعدِ روزِ شَبّات،دَم صُو اولین روزِ هفتَه، مریمِ مَجدَلیّه وُ او یکی مریم وا هم رفتِن وِر دییِنِ مَقوِرَ. 2یِیهو زِمی لَرزَه شدیدی شُد وِرَ ایکه یکی اَ فرِشتَه خداوند اَ آسِمو آما دامو وُ رفت سمت مَقوِرَ وُ سنگِنِ اَ بِراوَرِ مَقوِرَ کناری غَلتُن وُ نِشِس روش. 3رو فرِشتَه مِثِ برقِ آسِمو مِدُرُنجِس وُ لواسِش مِثِ برف، سفید بی. 4نِگَبانا اَ ترس مِلرزِیِن وُ مثِ مُردَه اِفتان رو زِمی! 5اوسِه فرِشتَه وِ زَنا گفت: «زَلَتو نَرَ مینِم كه دِ دُمِ عیسیِ مصلوب میَردید. 6او اِینچو نیسا هَموجوری که خُیِش گفته وی زِنَه شیَ! بیِاید جایی نِه که او خُفتیَ وی بُیینید. 7وَ فِورَن بَرید وِ شایِرداش بُئید كه ”او اَ مردِ آ زِنَه شیَ وَ قبلِ شما وِ شرِ جلیل مِرَ و دِ اونچِو اونِه مُویینید.“ سیل کُنید مَه وِ شما گفتِم!»
8پَ زَنا وا تَرس وُ شادی زیاد، فِورَن اَ مَقوِرَه رایی شوئِن وُ وَرِ شایِردا رفتِن تا ایی اتِفاقِ وِشو خَوَر بَیَن. 9ییهو عیسی واشو رو وِ رو شُد وُ گفت: «سِلام وِ شما!» زَنا جِلُو آمان اِفتان وِ پاآش اونِ پَرسِش کِردَن. 10اوسِه عیسی وِ اونا گفت: «زَلَتو نَرَ بَرید وُ وِ بِرارام بُئید كه بَرَن وِ جلیل. دِ اونچِو مَنه مُویینَن.»
گزارِشِ نِگبانها
11هَنی زَنا دِ مینِ را بییِن، که عده ایی اَ نِگبانا رفتِن شَر تمام او چیایی که اتفاق اِفتیَ وی وِ سَران کاهِنا گُفتِن. 12سَران کاهنا هَم بعد ایکه وا مشایِخِ قوم ملاقات کِردِن وِ مَشوِرَتِ اونا پول زیادی وِ سَروازا دان، 13وُ گُفتِن: «وِ مَردِم بُئید که ”شایِردا عیسی شَبونَه آمان وُ وَختی که اِیما دِ خِوُ بییم جنازَه اونِه دُزین.“ 14اَیَر ایی خَوَر وِ گوشِ والی بَرَسَه، اِیما خُیِمُو اونِه قانَع مُکُنیم تا وِرَ شما مشکلی پیش نَیا.» 15نگَبانا پول نِه گِرفتِن وُ طبق چی که وِشو گُفتَه ویین کِردِن. وَ ایی داستان تا وِ امرو دِ مینِ یهودیا شایِعَ.
ماموریت بزرگ
16اوسِه او یازَه شایِرد رفتِن وِ جلیل، وِ رو كُویی كه عیسی وِشو گفتَه وی، 17هَمی که اونچو عیسانِه دییِن، او نِه پَرسِش کِردِن، امّا بعضیاشو شَک کِردِن. 18اوسِه عیسی آما نَزیکُ وِشو گفت: «تمام اقتدار دِ آسمُونو وُ زِمی دادَ شیَ وِ مَه. 19پَ بَرید وُ تمام مِلَتا نِه شایِردِ مَه کنید وَ اونانِ وِ اسم بُواَ وُ پسر وُ روحالقدس تعمید بَئید ، 20وُ وِشو تعلیم بَئید تا همَه چیائی که وِ شما دستور دییِمَ وِ جا بیارَن. بَنِسَواید ایسِه مَه همیشَه تا آخِر ایی دورَه وا شُما هِسِم.»
Currently Selected:
مَتّی 28: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
