مَتّی 9
9
شفای یِه شَل
1عیسی سُوارِ کشتی شد،رَفت او طرف دریا وِ شَرِ خُیِش.
2اوسه چَن نَفَری،یِه افلیجی نِه که رو نالی خُفتیَ وی اُوُردِن وَرِش عیسی وَختی ایمان اونانِ دیی، وِ مردِ افلیج گُفت: «دلِت قرص با رولَه گُناآت آمُرزیدَه شُد!» 3دِ ایی مِوقَع بعضی اَ معلما تورات دِ وَرِ خُیِشُو گُفتِن: «ایی مرد کفر مُوئَه.» 4عیسی که مینِس وِ چی فکر مُکُنَن گفت: «چُنَ اییجور فکر پلیدی وِ دِلِ را میید؟ 5گُفتِنِ کامی آسُوتِرَه: ایکِه ”ایکه گُنااآت بخشیدهَ شُد،“ یا ایکِه ”وُریسُ را بَرو“؟ 6اَما وِرِ اییکه بنِسَوایید که پسر انسان وِ رو زِمی اقتدار بَخشییَنِ گُناآنِ دارَ» وِ مرد افلیج گُفت: -«وُریس نالیتِ وُردارُ بَرو خُونَت.» 7مَرد وُریسا رَفت خونَه. 8وَختی مَردِم اینِنِ دییِن ترسِسِن وُ خدانِه جلال دان که ایجور اقتداری وِ انسان بَخشیَ.
دعوت اَ مَتّی
9وَختی که عیسی اونچونِ ترک مِکِرد، مردی نِه وِ اسم مَتّی دیی كه دِ محل خراج گیرو نِشِسَه ویی. وِش گُفت: «دِ دُمِه مَه بیا!» او مرد وُریسا وُ دُمِ او رایی شد.
10روزی که عیسی دِ خُونَه مَتّی سَرِ سُفرَه نِشِسَه ویی عده زیادی اَ خراج گیرا وُ گناکارا آمان وُ وا عیسی وُ شایِرداش همسُفرَه شُوئِن. 11وَختی که علمای فَریسی اینِنِ دییِن، وِ شایِردا عیسی گُفتن: «چُنَ استاد وا خراج گیرا وُ گُنا کارا غِذا مُوخُرَ؟» 12اَما عیسی وَختی اینِنِ شِنُفت گُفت: «آیِما سالِم وِ دُکتُر نیاز نَرَن. آیِما مریضَن که وِ دُکتُر نیاز دارَن. 13بَرید وُ معنی ایی کلامِ درک کنید کِه: ”مَه اَ شما قُربانی وُ پیشکَشی نِماخام بلکه رَحمَت ماخام.“ وِرَ ایکه مَه نیامیَم تا آیِما صالِحِنِه دعوت کُنِم بَلکه آمیَم تا گُنا کارانِ دَعوت کُنِم.»
سؤال دِبارهَ روزَه
14اوسِه شایِردای یَحییِ تعمید دَهَندَه وَرِ عیسی آمان وُ پُرسیِن: «چُن اِیمانُ فِرقِۀ فَریسیا روزَه مِیریم امّا شایِردا تُو روزَه نِمیرَن؟» 15عیسی وِ اونا جُواو دا:«مَیَر مِهمونا عروسی تا زِمانی که داما واشونَ عزاداری مُکُنَن؟ امّا روزایی میا که داما اَزِشو گِرفتَه مِشَه دِ او روزا روزَه مِیرَن. 16هوشکَه پارچه نُو نِه وِ لواسِ کُنَه وَصلَه نِمُکُنَه وِرَ ایکه وَصلَه اَ لِواسِ مِکِنیَه وُ دِرِسِه ایش بَدتِر مِشَه. 17وُ هَم، شِرآوِ تازَنِه که نِمِرِزَن دِ مَشکِا کُنهَ. مَشکا مِدِرَن وُ شرآوِ مِرِزَ وُ مَشکا اَ بین مِرَن بلکه شراوِ تازَنِه دِ مَشکا نُو مِرِزَن تا هر دوتا سالِم بَمُونَن.»
زِنهَ کِردَنِ یِه دُختَر وُ شفای یِه زَ
18د هَمو حال که عیسی ایی صُوَتانِه وِرشو مِگُفت ،ایسِه،یکی اَ سَرپرَسا کَنیسَه وَرِ عیسی آما دِ براوَرِش زانو زا وُ گفت: «دُختَرِم هَمی الانَ مُرد، وا ایی حال خواهِش مُکُنِم بیا وُ دَسِ خُیِتِ بَل روش،که او زِنَه مِشَه .» 19عیسی وُریسا وُ واردِ شایِرداش وا او رَفت. 20دِ هَمو وَخت زنی كه دُوآزَ سال اَ خونریزی عِذاو مِکَشی اَ پشتِ سرِ وِ عیسی نَزیک شد وُ دست هَشت قَ رَداش. 21او وا خُیَش گُفتَ وی: «اَیَر حَتی دَس بَلِم قَ رداش، شَفا میرِم.» 22عیسی وُریَشت اونِه دیی وُ گفت: «دختَرِم، دِلِت قرص، اِیمانت تُونِه شفا دیَه.» دِ او ساعت،زَ شفاگرفت. 23وَختی که عیسی آما وِ مینِ خونِۀ سَرپِرَسِ کَنیسَه. نوحَه خُونا وُ کِسایی نِه دیی که شیوَن مِکِردن، 24گُفت:« بَرید دَر.دُختَر نَمُردَه بلكِه دِ خِآوَ.» امّا اونا وِش خَنِسِن. 25وَختی مِردِم نِه کِردن دَر، عیسی رفت داخل وُ دَسِه دُختَرنِه گرفت و او دُختَر وُریسا. 26خَوَرِ ایی اتفاق دِ سَراسر او وُلات پیچِس.
شفای دُوتا کور و یِه لال
27هَمی که عیسی اَ اونچو مِرفت دَر، دُوتا مرد كور دِ دُمِش رفتِن وُ حَوار مِزان: «اِی پسر داوود نبی، وِ اِیما رَحم کُ!» 28هَمی که عیسی رفت مینِ خُونَه، او دُوتا مرد آمان وَرِش. عیسی اَ اُونا پُرسی: «ایمان دارید كه مَه مِتونِم ایی کارِنِه اَنجام بَیِم؟» جُواو دان: «بَله، آقا.» 29اوسِه عیسی دَس هَشت وِ چِشاشو وُ گُفت: «مطابق اِیمانتو وِرَتو اَنجام با» 30اوسِه چِشاشو وا شد. عیسی وا تاکید وِشو گفت: «حواسِتو با کِسی اَ ایی جریان واخوَر نَوا.» 31امّا اونا رفتِن دَر وُ تمامِ وُلاتِ نِه دِ بارَ ایی کارِ عیسی پُر کِردِن.
32دِ هَمو حال که اونا مِرفتن دَر،مردِ دیو زیَه ایی نه كه لال بی، اُوُردِن وِرِ عیسی. 33هَمی که عیسی دیوِنِه اَزِش کِرد دَر زِوونِ او مرد لال وا شد. مردِم حیرت کِردِنُ گُفتِن: «چِنی چیِئی هوچ وخت دِ اسرائیل دیده نَشییَ.» 34امّا علمای فرقَه فَریسی گُفتِن: «او وِ كمکِ رَئیس دیوا،دیوانِ مُکنه دَر.»
مَحصول زیاد وُ کارگَر کَم
35عیسی دِ تَمام شَرا وُ داهاتا مییَشتُ دِ کنیسِه آ تَعلیم مِدا وُ خَوَرِ خُوشِ پادشایی خدانِ اعلام مِکِرد وُ هَر مَرَض وُ دَردینِه شفا مِدا. 36عیسی وَختی که جَماعتا زیادینِ دیی، دلِش وِ حال اونا سُوخت وِرَ ایکه مِثِ گوسوَنای بی چُوپُو، پَریشُو حال وُ دَرمُندَه بییِن. 37پَ وِ شایِرداش گُفت: «مَحصول فَراوُنَه ولی كارگر كَمَ. 38پَ، اَ صاحِوِ مَحصول بَخوایید کارگَرایینِ وِرِ دِرو مَحصول خُیِش بَفِرسَه.»
Currently Selected:
مَتّی 9: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
