مَتّی 10
10
رسالتِ دوآزَ شایِرد
1اوسِه عیسی دُوآزَ شایِردِ نِه وَرِ خُیِش هِنا کِرد وُ وِشو اقتدار بَخشی تا ارواحِ پَلیدِنِ بَکُنَن دَر وُ هر مرَض وُ دَردینِه شفا بَیَن. 2اینَ اسم او دُوازَ رسول : اَوَل، شَمعون مَعروف وِ پطرس وُ بِرارِش آندریاس؛ یعقوب پسر زبِدی وُ بِرارِش یوحنا؛ 3فیلیپُس وُ بَرتولما؛ تُوما وُ مَتّای خَراجگیر؛ یَعقُوب پسر حَلفای وُ تَدّای؛ 4شَمعون غَیور وُ یهودا اَسخَریوطی كِه وِ عیسی خیانت کِرد.
عیسی دُویازَ شایردِشِ رایی مُکُنَه
5عیسی ایی دُوازَ نَفَرِ فِرسا وُ وِ اُونا یاد دا: «وَرِ غیرِ یهودیا نَرید وُ داخلِ هوچ شَری اَ شَرا سامِریا نَشید، 6بلکه وَرِ گوسوَنای گُم شیَه قُومِ اسرائیل بَرید. 7وَختی که مِرید ایی پیغُومِ اعلام کنید که پادشایی آسِمو نَزیکَ. 8مَریضانه شفا بَئید مُردآ نِه زِنَه کُنید جُذامیانِه شَفا بَئید وُ دیوانِ بَکُنید دَر. بی عوض گرفتِیید بی عوضم بَیید. 9هوچ طِلا یا نُقرَه یا مِس دِ کَمَروَناتُو وا خُیِتو نُرید ، 10وُ وِرَ سفر هوچ بارکولَه یا پیرَن اضافَ یا اُرِسی یا چودَس وُرنَرید وِرَ ایکه كارگر مُستَحَقِ دَسمُزِ خُیِشَه. 11وِ هر شَر یا داهاتی كه داخل مِشید آیِمِ لایِقی بَجُورید وُ تا وَختی که دِ او شَرید بَمونید دِ خُونَش. 12هَمی که داخلِ خُونه ایی شوئین ”سِلام کُنید“. 13اَیَر او خونَه لایق با،بَلید صلح وُ سِلامَِتی که وِرَش گُفتید وِ رو او خونه قِرار بیرَ، اما اَیَر لایق نیسا بَلید او صلح وُ سِلامَتی وِ خُیِتُ وُریَردَه. 14اَیَر کسی شُمانِه قَوول نَکنَه وَ یا وِ صُوَتاتو گوش نَکُنَه وَختِ ترکِ او خُونَه یا شَر، خاکِ پایاتونِ بَتَکُنید. 15وِ راسی وِشما موئِم، دِ روزِ داوَری، تَحمُلِ مُجازات وِرَ سرزِمین سُدوم وُ عَمورَه آسوتِر مِشَه، تا وِرَ او شَر.
جُور و جفا
16حواسِتُ با، مَه شمانِ مِثِ گوسوَنا مِفِرسِم دِ مینِ گرگا پَ مِثِ مار هُوشیار باید وُ مِثِ كَبوتَر سادَه. 17اَ مردِم بر حَذَر باید. اونا شُمانِه وِ مَحکَمَه آ مِسپُرَن وُ دِ کَنیسه آخُیِشُو شُمانِه مِوَنن وِ فِلَک. 18وِ خاطِرِ مَه شُمانِه وَرِ والیا وُ پادشاآ مُورَن تا دِ براوَرِ اونا وُ دِ مینِ غیرِ یهودیا شهادَت بَیید. 19وَختی شمانِه تَسلیم مُکُنن دِلدِهول نَواید که چِطور یا چی بُوئید. دِ او زِمان او چیائی که باید بُئیِد وِ شما عطا مِشهَ. 20وِرَ ایکه گویندَ شما نیسید بلکه روحِ بُواَ آسِمونی شُمانَه كه وِ زِوونِه شما صُوَت مُکُنَه. 21بِرار، بِرارِنِ وُ بُواَ بَچَه نِه تسلیمِ مرگ مُکُنَه. اولادا وِ ضِدِ نِنَه بُواَ وُرمِیسَن وُ باعث کُشتَنشو مِشَن. 22هَمِۀ مردِم وِ خاطرِ اسم مَه اَ شما متنفر مِشَن. امّا هرکَه تا آخِر پایدار بَمُونَه، نِجات پیا مُکُنَه. 23وَختی دِ شَری ، وِشما آزار مِرَسُنَن وِ شَری دیَر فِرار کنید، بَنِسَوایید، که پیش ازی که بَتُونیِد وِ همه شَرا اسرائیل بَرید پسر انسان میایَ.
24نه شایِرد اَ استاد خُیِش بالاترَ وُ نَه غُلام اَ اَرواوِ خُیِش بَرتَر. 25وِرَ شایِرد ای کافیه که مِثِ استاد خُیِش بَشَه وُ وِرَ غُلِام که مِثِ اَرواوِ خُیِش بَشَه. اَیَر وِ رئیس خُونَه بَعَلزَبول بوئَن که ینی شیطو چَنی بیشتَر وِ اهل خونَه بَد موئَن؟
اَ چه کَسی باید ترسید
26پَ، اَ اونا نترسید هوچ چیِ پِنهُنی نیسا که آشکار نَوا وُ هوچ کار پوشِسِه ایی نیسا که دیاری نَوا. 27او چیائی که دِ تاریكی وِ شما گُفتِم دِ روزِ رُوشن اعلام کنید وُ او چیائی که محرَمانَه وِتو گُفته شد دِ لُو بُونا اعلام کنید. 28اَ کسایی که جِسمِ نِه مُکُشَن امّا نِمِتونَن روحِ بَکُشَن، نترسید، اَ او بَترسید كه مِتونَه هَم روح و هَم جسمِ شما نِه دِ جَنِم هِلاک کُنه. 29یعنی دُوتا مَلیچَه نِه وِ یِه پولِ سیا نمِفِرُوشَن؟ وا ایی هَمه، حَتی یِه مَلیچَه هَم بدونِ ارادۀ بُواِ آسِمونی شما رو زِمی نِمفتَه. 30حَتی مُوآ سَرِ شما وِ تمامی شِمُردِسَ، 31پَ نترسید وِرَ ایکه ارزِشِ شما اَ هزاروُ مَلیچَه بیشتَرَ.
32هرکَه دِ بِراوَرِ مَردِم مَنِه اِقرار کُنه مَنِم دِ بِراوَرِ بُواَ خُیِم که دِ آسِمُونَ اونِه اِقرار مُکُنِم، 33امّا هرکَه مَنِه وَرِ مَردِم حاشا کُنه مَنِم دِ بِراوَرِ بُواَ خُیِم که دِ آسِمُونَ اونِه حاشا مُکُنِم.
34گُمو نَکنید كه مَه آمیَم تا صُلحِ وِ رو زِمی بیارِم. نیامیِم تا صُلح بیارِم، بلكِه آمیَم تا شِمشیر بیارِم! 35وِرَ ای آمیَم تا:
پسر اَ بُواَ،
دُختَرِ اَ نِنَه
وُ عروسِ اَ خِسوره سوا کُنِم.
36دُشمَنا هَر کَه اهلِ خونَه خُیِش مِشَن،
37هرکَه بُواَ یا نِنَه خُیِشِه بیشتَر اَ مه دُوس داشتَ وا لایِقِ مَه نیسا وُ هركَه پسر یا دُختَرِ خُیِشِه بیشتَر اَ مَه دُوس داشتَ وا لایِقِ مَه نیسا. 38هرکَه صلیبِ خُیِشِه وُرنَرَه وُ دُم مَه نیا، لایِقِ مَه نیسا. 39هرکَه بَخوا جُونِه خُیِشِه حِفظ کُنه اونِنِ اَ دَس مِیَه و هرکَه جُون خُیِشِه وِ خاطِرِ مَه اَ دَس بَیَه اونِه حِفظ مُکُنَه.
40هرکَه شمانِ قَوول کُنه مَنِه قَوول کِردَه و هرکَه مَنِه قَوول کِرد، اونِ کِ مَنِه فِرسیَه قَوول کِردَه. 41هرکَه پیغَمَری نِه وِرَ ایکه پیغَمَر قَوول کُنه، پاداشِ یه پیغَمَر نِه میرَ و هرکَه آیمِ صالحِنه وِرَ صالح بیئَنِش قَوول کُنه پاداشِ یِه آیمِه صالحِ نِه میرَ. 42هرکَه وِ ایی کوچوکا وِرِ ایی که شایِردِ مَنََه حتی پیالِه ایی آوِ سَرد بَیه، وِ راسی وِ شما مُئِم، بی پاداش نِمُونَه.»
Currently Selected:
مَتّی 10: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
