مَتّی 8
8
شفایِ مِرد جُذامی
1وَختی عیسی اَ كُو آما دامو جِماعتا زیادی دِ دُمِش رایی شوئِن. 2دِ ایی مُوقَع مردی جُذامی آما وَرِش دِ بِراوَرش زانو زَا وُ گُفت: «ای آقا اَیَر بَخایی مِتُونی مَنِه شَفا بَیی.» 3عیسی دَسِه خُیِشِ دِراز کِرد، وُ اونِه لمس کِرد و گُفت: «ماخام شفا بِیر!» وُ دَرجا مَردَ اَ جُذامُش شفا گِرِفت. 4اوسه عیسی وِش گُفت: «وِ تو موئِم دِ ایی بارَه وِ کسی چییِ نُویی، بَرو وُ خُیِتِه وِ كاهِن نِشُو بَ وَ او پیشکشیی که موسی تعیین کرِدَه، تقدیم کُ تا وِرَ اونا شهادت با.»
ایمان یِک نِظامی رومی
5وَختی که عیسی داخلِ شَرِ كَفَرناحوم شُد یِه افسَرِ رومی آما وَرِشُ وا عیزِ التماس 6وِش گُفت «آقا خادِمِم افلیج دِ خُونَه خُفتیَ وُ خیلی درد مِکَشَه.» 7عیسی گفت: «مَه میام وُ اونِه شفا میِم.» 8اَما افسَر جُواو دا: «آقا مَه لایِق نیسِم كه زیر سقف مَه بیای. فقط کلامی بُ که خادِمِم شفا میرَ، 9وِرَ ایکه مَه خُیِم مَردی هِسِم زیر اَمرِ کسایی. سروازاییَم زیرِ دَس خُیِم دارِم. وِ یِكی مُئِم ”بَرُو“ مِرَ، وُ وِ یِکی دیَر مُئِم ”بیا،“ میایَه. وِ غلام خُیِم مُئِم ”اینِه وِ جا بیار“ وِ جا میارَ.» 10عیسی وَختی صُوَتا اونِه شِنُفت تعجب کِردُ وِ کسایی كه دِ دُمِش میامان گفت: «وِ راسی وِ شما مُوئِم، ایجور اِیمانی حَتی دِ اسرائیل هم نِیدَم. 11وِ شما موئِم كه خِیلیا اَ شرق وُ غرب میایَن وُ دِ پادشایی آسِمو، وا ابراهیم وُ اسحق وُ یعقوب سَرِ یِ سِفرَه مِنیشیَن، 12امّا اولادای ایی پادشایی اَ تاریکی وِ بیرون اناختَه مِشَن جایی که گورگَه وُ دِنُو قِروچَه اَ» 13اوسِه وِ او افسَر گفت: «بَرو! مطابق اِیمانِت وِ تُو دیَه با.» دِ هَمو آن خادِمِش شفا گِرِفت.
شفای خِسوره ما پِطرُس وُ عدَه زیاد دیَر
14وَختی عیسی وِ خُونۀ پطرس رفت دی که خِسورَماش طُوو كِردَه وُ اِفتیَ دِ رَختِخُو 15عیسی دَسِ اونِه گِرِفت وُ طُش قطع شُد.او زَ وُریسا هَشت وِ پَذیرایی کِردَن اَ عیسی.
16دَمِ اِیوارَه،خیلی اَ دیو زیَه آنِه اُوُردِن وَرِش وُ او وا كلامش اَرواح نِه اَ اونا کِرد دَر وُ همهَ مَریضانه شفا دا، 17تا ایجوری، پیشگویی اِشعیای نبی وِ انجام رَسِس که:
«او دَردای ایمانِ وُرداشت
وَ مَرَضامونِ گِرفت وِ خُیِش.»
بهای پیروی اَ عیسی
18هَمی که عیسی دیی عده زیادی جمع شیین دورِش امر کِرد: «بَریم او طرف دریا.» 19اوسه یِكی اَ معلما تورات آما وَرِش وُ گُفت: «ای استاد هرجا بَری میام دُمِت.» 20عیسی دِ جُواو گفت: «روُاآ لُونَه دارَن و مُرغا هوا آشیُونَه، امّا پسر انسان جایی وِرَ سر هَشتِن نَرَ،» 21شایِردی دیَه وِش گُفت: «ای آقا اول اِجازَ بَ بَرِم بُوامِ وِ خاک بَسپُرِم.» 22امّا عیسی وِش گفت: «دِ دُمِ مَه بیا وُ بَل مُردِاآ مُردِاآشونِ وِ خاک بَسپُرَن.»
آرام کِردَنِ دریای طوفانی
23اوسِه عیسی سُوآرِ قایق شد وُ شایِرداشَم دِ دُمِش رفتِن. 24یِیهو دِ دریا توفانِ قِوویینی وُرِیسا جوری که نزیک بی مُوجا قایقِنِه غرق کُنَن. امّا عیسی دِ خُآو بی. 25شایِردا آمان اونِ بیار کِردِن وُ گُفتِن: «ای آقا داریم غَرق مِشیم؛ نجاتِمو بَ!» 26عیسی جُواو دا: «اِی كم اِیمانا چُنَ زَلَتو مِرَ؟» اوسِه وُریسا وِ بادُ وُ مُوجا تَشَر زا وُ آرامِشِ کامِل حاکم شد. 27اونا شِگِفت زیَه اَ هَم مِپُرسین: «ایی چِجور شَخصیَ؟ حَتی بادُ وُ امواجَم اَزِش فَرمو مورَن.»
شفای دُوتا چِل
28وَختی که عیسی وِ وُلاتِ جَدَریان، دِ اوطرف دریا رَسِس،وا دُوتا مردِ دیو زیَه رو وِ رو شد که اَ قَبرِسو میامان دَر. اونا اینقد خطرناک بییِن كه هوشکه نِمِتونِس اَ او را رَد با. 29اونا حَوار کِردِن: «ای پسر خدا وا ایما چِکار داری؟ آیا آمیی تا قبلِ وَخت ، اِیمان عِذاو بَیی؟» 30کمی دورتَر اَ اونا گلَه بزرگی خُوک داشتِن خوراک مخوردِن. 31دیوا وا عیزِ التماس وِ عیسی گُفتِن: «اَیَر منازیمو دَر بَفِرسِمو مینِه گلَه خُوکا.» 32عیسی وِشو گفت: «بَرید!» دیوا دِرآمانُ رفتِن مینِه خُوکا وُ تَمام گلَه اَ سَرِ تَپَه وِ دریا هجوم بُردِن وُ دِ آو هَلاک شوئِن. 33خوکبانا فِرار کِردِن وُ وِ شَر رفتِن وُ تمام ایی اِتفاقا نِه وُ بِخوصوص او چیِئی که وِرَ او دیو زیَه آ اتفاق اِفتیَ وی نِه وِرَ مردِم تعریف کِردَن. 34اوسه هَمَه مردِمِ شَر وِرَ دیئِنِ عیسی آمان وُ وَختی که او نِه دیئِن وِش التماس کِردِن او سَر زِمی نِه ترک کُنه.
Currently Selected:
مَتّی 8: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
