مَتّی 2
2
آمییَنِ مُغا
1عیسی دِ زِمانِ سلطَنَت هیرودیسِ پادشا دِ بِیتلِحِم دِ وُلاتِ یهودیَه وِ دنیا آما، دِ او مِوقَع چَنتا مُغ که آیِما خیلی حَکیمی بییِن وُ دِ سِتارَ شِناسی سَر رِشتَه داشتِن اَ سَر زِمینِ شرق وِ اورشَلیم آمان. 2وُ پُرسییِن: «او بَچَه که دِ مقامِ پادشا یهودیا وِ دنیا آمییَ کجانَ؟ وِرَ ایکه طُلوعِ سِتارَ اونِه دِ مشرق دی یِیمو وِرَ پَرَسِشش آمی یِیم.» 3وَختی که هیرودیسِ پادشا ایی خَوَرِ شِنُفت پَریشو شُد وُ تمام مَردِم اورشلیم هَم وا او پریشو شوئِن. 4پَ هیرودیس همه سَران کاهِنا وُ معلِمایی که تورات وِ مردِم دَرس مِدان جمع کِرد وُ اَ اونا پُرسی:«مسیح موعود دِ کُجا باید وِ دنیا بیا؟» 5اونا جُواو دان: «دِ بِیتلِحِمِ یهودیَه، وِرَ ایکه میکای نبی دِ ایی بارَه ایجور نوِشتَه:
6”تُو ای بِیتلِحم که دِ سَرزِمینِ یَهودایی،
تُو دِ مین فَرمانرواآ یهودا اَ هوچکامِشو كمتر نیسی،
وِرَ ایکه اَ تُو فَرمانرَوایی ظُهور مُکُنَه
كه قُومِ مَه اسرائیلِ نِه چُوپُنی مُکُنَه.“»
7پَ هیرودیس او مردای حَکیمِ نِه که اَ سَرزِمینِ شرق آمیَ ویِن مَخفیونَ وَرِ خُیِش خواس وُ اَزِشو پُرسی سِتارَ چِه وَختی وِ اونا ظاهِر شیَ. 8اوسِه اونانِ وِ بِیتلحم فِرسا، وُ وِ اونا گُفت: «بَرید وُ وا دقت دُم او بَچَه بییَردید. هَمی که اونِ جُسید وِ مَه خَوَر بَیید تا مَنَم بیامُ اُونِه پَرسِش کُنِم.» 9مُغا بَعدِ شِنُفتَن صُوَتای پادشا اِفتان را وُ ستارِ ایی نِه كه دِ مشرق دیَ ویین جِلوتَر اَ اونا مِرفت تا آخِر سَر کِه دِ بالا جایی كه بَچَه بی، وایسا. 10اونا وا دییِن سِتارَ خیلی خوشال شوئِن. 11هَمی که آمان مینِ خونَه وُ بَچَه نِه واردِ نِنَش مریم دیِیِن، رو دِ زِمی هَشتِن، او بَچَه نِه پَرسِش کِردِن.اوسِه صَنوقچِه آ خُیِشُونِه وا کِردِن وُ پیشکشیا، طِلا، كُندُر وُ مُرنِ وِ اونا تَقدیم کِردِن. 12وُ وِرَ ایکه دِ خِوُ وِاونا گُفته شیَ ویی كه وَرِ هیرودیس وُرنیَردَن اَ را دیَری وِ سَرزِمینِ خُیِشُو وُریَشتِن.
فَرار وِ مصر
13بَعدِ رفتَن اونا، فرشتَه خداوند دِ خِوُ وِ یوسف ظاهر شد وُ گُفت: «وُری، بَچَه وُ نِنَشِه وُردارُ وِ مصر فِرار کُ وُ دِ اونچو بَمُو تا که وِت خَور بَیِم، وِرَایکه هیرودیس دِ دُمِ بَچه میَرده تا اونِه بَکُشَه.» 14پَ یوسِف شَبونَه وُریسا، بَچه وُ نِنَشه وُرداشت وُ راییِ مصر شُد. 15وُ تا وَخت مَرگِ هیرودیس پادشا دِ اونچو مُن. وَ ایی اتفاق اِفتا تا چییِ كه خداوند وِ زِوونِه هوشَع نبی گُفته بی وِ انجام بَرَسَه کِه«پسر خُیِمِه اَ مصر خُنِم.»
16وَختی که هیرودیس فَمِس که مُغا فریبِش دییَن سخت عصبانی شد وُ آیِم فِرسا تا تمام بَچه آ پسر که دِ بیت لِحم وُ دِ تَمامِ او سَرزِمی بییِن بَکُشَن، بَچه آ دو سالَه وُ کُوچوکتَر، دُرُس طبق او وَختی که اَ ستارَشِناسا شِنُفتَه بی. 17اوسِه چیی که اَ زِوونِه اِرمیای نبی گُفته شیَ وی وِ انجام رَسِس که:
18«صدایی دِ رامَه وِگوش رَسِس
صدا گورگَه وُ شیوَنی بُلَن.
راحیل وِرَ پسراش مِگورگَه
وُ نِمِخا تسلی بیرَ
وِرَ ایکه بَچِه آش دیَه نیسِن»
وُریَشتِن اَ مصر
19بَعدِ مَرگِ هیرودیس پادِشا فِرشتَه خداوند دِ مصر وِ خِوُ یوسف آما ، 20وُ گُفت: «وُری، بَچَه نِه واردِ نِنَش وُردار وُ وِ سَرزِمین اسرائیل وُریَرد وِرَ ایکه اونایی که قَصد جُونِه بَچَه نِه داشتِن، مُردِنَ.» 21پَ یوسف وُریسا، بَچَه وُ نِنَشِه وُرداشت وُ وِ سَرزِمین اسرائیل وُریَشت. 22امّا هَمی که شِنُفت آركلائوس وِ جا بُواَش هیرودیس دِ وُلاتِ یهودیَه حُکومَت مُکُنَه، تَرسِس وِ اونچو بَرَ مُطابّقِ هُشداری کِه دِ خِوُ وِش دیَه وین،رایی وُلاتِ جَلیل شد. 23دِ شَری وِ اسم ناصرَه ساکن شد. وَ کَلام پِغمَرا حقیقَت پیا کِرد که گفته ویین: «ناصری خُنَه مِشَه.»
Currently Selected:
مَتّی 2: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
