مَتّی 3
3
یَحیی هَموار کُنَندَ را مسیحِ موعود
1دِ او روزا یَحیای تعمید دَهندَه ظُهور کِرد. او دِ بیاوُونِه یَهودیَه مُوعِظَه مِکرد وُ 2مِگُفت: «تُوبَه کنید وِرَ ایکه پادشاییِ آسِمو نَزیکَه ا!» 3یَحیی همو كَسیَ كه اِشَعیای نبی دِبار او مِگُفت:
«صدا او که دِ بیاوُو هَوار مِزِنَه:
را خداوند آمادَ کُنید!
را آ اونِه هَموار کُنید.»
4یَحیی لواسی اَ پَشمِ شُتر دِ وَر داشت وُ کمر وَنی چرمی وِ كَمَرش مِوَست، وُ خُوراكِش ملخ وُ عسلِ صَرایی بی. 5تمام مردِم اورشلیم وُ تمام وُلاتِ یَهودیَه وُ تمام مَناطِق اطرافِ رودخونَه اُردُن،مِرَفتِن وَرِش، 6وُ وِ گُناآ خُیِشُو اعتراف مِکِردِن وُ دِ رودخونه اُردُن وِ دَسِ او تعمید مِیرِفتِن.
7امّا وَختی یَحیی دیی خیلیا اَ فِرقِۀ فَریسیا وُ صَدّوقیا میامان اونچو که او تعمید مدا وِ اونا گُفت: «ای افعی زادیا ! چِه کَسی وِ شما هُشدار دا تا اَ غَضبی که دِ نوآتونَ، بَگُریزید؟ 8پَ کارایی نِه انجام بَیید که توبه شمانِ نِشو بَیَه، 9وُ وا خویِتو نُویید ”بُواَ اِیما اِبراهیمَ.“ وِرَ ایکه وِ شما مُوئِم خدا مِتونَه اَ ایی سنگا وِرَ اِبراهیم بَچه آیی دُرُس کُنَه. 10هَمی ایسِه تیشَه وِ ریشَه دِرَختا مُخُورَ. هر دِرَختی كه میِوۀ خُویی وِ وار نیارَ ، مِوُرییَه وُ دِ آتِش اِناختَه مِشَه.
11مَه شمانِه وِرَ تُوبَه، وا اِوُ تَعمید مِییِم؛ امّا کسی که بَعدِ مَه میا اَ مَه قَوی تَره وُ مَه حَتی لایق نیسِم اُرِسیاشِ جِلو پاش جُفت کُنِم. او شمانِه وا روحالقدس وُ آتِش تعمید مِیَه. 12او آشیرِ خُیش دِ دَس دارَ وُ خَرمِنجا خُیِشِه پاک مُکُنَه وُ گَنِم خُیِشِه دِ اَمّار ذخیرَه مُکُنَه اما کَنِه دِ آتِشی که هوچ وَخت خاموش نِمِشَه مِسوزُنَه.»
تعمیدِ عیسی
13اوسِه عیسی اَ وُلاتِ جلیل وِ رودخونه اُردُن آما تا وِ دَسِ یَحیی تعمید بیرَ. 14یَحیی تَقَلا کِرد نوآشِ بیرَ وُ وِ او گُفت: «مَنِم که باید اَ دَسِ تُو تعمید بیرِم، ایسِه تو وَرِ مَه آمییی؟» 15عیسی دِ جُواو گُفت: «بَل ایسِه ایجور با وِرَ ایکه وِ ایی صورت او چیی که دِ نَظَرِ خدا دُرُسَ تمام کمال وِ جا میاریم.» پَ یَحیی رضایَت دا. 16هَمی که عیسی تعمید گرِفت فِوُرَن اَ اِوُ دِراما. دِ او مِوقَع آسِمو وا شد وُ روحِ خدانِه دی كه مِثِ کَفتَری آما دامو وُ وِ او قرار گِرِفت. 17اوسِه صدایی اَ آسِمو آما كه: «ایینَ پسر عزیزِم كه اَ او خیلی راضیِم.»
Currently Selected:
مَتّی 3: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
