مَتّی 14
14
قتل یَحیی تعمید دَهَندَ
1دِ او زِمان آوازَه عیسی وِ گوشِ هیرودیسِ حاکِم رَسس، 2وُ او وِ زیر دَسا خُیِش گُفت: «ایی یَحییِ تعمید دَهَندیَه که اَ بین مرده آ زِنَه شیَ، وُ وِرَ اینَه که ایجور معجِزاتی اَ او وِ ظُهور مِرَسَه.»
3وِرَ ایکه هیرودیس وِرَ خاطِرِ هیرودیا که پیش اَ ایی زَنِ برارِش فیلیپُس بی، یحیانِه گِرِفتهَ وی وُ اِناختهَ وی زندان ، 4وِرَ ایکه یحیی وِ او مِگفتَ «حلال نیسا تو وا ایی زَ بایی.» 5هیرودیس ماخاس یحیانِه بَكُشَه، امّا اَ مردِم مِترسِس وِرَ ایکه مَردِم یَحیانِ پیغَمَر مینِسِن.
6اَما هَمی که روز تولّد هیرودیس رَسِس دُختَر هیرودیا دِ مِهمُنی رَقصِصُ جوری دلِ هیرودیسِ شاد کِرد، 7که قسم خُورد هر چی بَخوا وِش بَیَه. 8دُختَر هَم وِ تحریک نِنَش گُفت: «سَرِ یَحییِ تعمیددَهَندَ نِه هَمی الانَ بَل داخل یه طَبقی وِم بَش.» 9پادشا ناراحت شد اما وِ پاس قَسَمی که خُورده وی وُ وِ احترامِ مِهمونای خُیِش دستور دا سَرِ یحیی نِه بَیَن وِش، 10او کسایی نِه فِرسا سَرِ یَحیانِ دِ زِندان اَ تَنش جدا کِردِن، 11وُ اونِ دِ طَبَقی اُوُردِن وِ دُختَر دان وُ اونَم اون وِرَ نِنَش بُرد. 12شایِردا یَحیی آمان وُ بدن یَحیانِ بُردنُ وِ خاک سِپُردِن اوسِه رفتِن وُ وِ عیسی خَوَر دان.
خوراک دادَن وِ پَینش هزار نفر
13وختی که عیسی اینِنِ شِنُفت سُوآرِ قایق شد اَ اونچو وِ جایِ خلوتی رَفت. امّا مردِم واخَور شوئِن وَ اَ شَرا خُیِشُو پا پیادَه دِ دُم او رایی شوئِن. 14هَمی که عیسی اَ قایِق پیادَه شد جمعیتِ زیادی نِه دیی وُ دلِش وِ حال اونا سُوخت، وَ مَریضاشُونِه شفا دا.
15نزیکِ اِیوارَه شایِرداش آمان وَرِش وُ گُفتِن: «اِینچو جا پِرتیَ وُ روزَم وِ آخِر رَسِسَ مرَدِمِنِه بَفِرس وِ دِهاتا ایی اطراف تا وِرَ خُیِشُو غِذا بَخَرَن.» 16اَما عیسی وِ اُونا گُفت: «لازم نیسا مردِم بَرَن. شما خُیِتُو وِ اونا غِذا بَئید.» 17شایِردا گُفتن: «اینچو جُز پَینش تا نونُ دُوتا ماهی چیی نَریم.» 18عیسی گُفت: «اونانِ بیارید وَرِ مَه.» 19بَعد وِ مردِم فرمود که رو چَمَنزار بَنیشَن. اوسِه پَینش تا نونُ و دُوتا ماهی نِه گِرِفت سیلِ آسِمو کِرد خدانِ شکر کِرد،نُونانِ تیکهَ كِرد وُ وِ شایِرداش دا وُ اُونائَم وِ مردِم دان. 20هَمه خُوردِن وُ سیر شوئِن وُ اَ خُردِآ باقی مُنَه، دُوآزَه سَوَد پر شد. 21تعداد اونایی که خوردِن بِجُز زَنا وُ بَچِاآ پَنیش هزار مرد بی.
را رفتن عیسی رو آو
22عیسی فِورن هَمی جور كه مَردِمِنِه مرخص مِکرد شایِردا خُیِشِ وادار کِرد سُوارِ کشتی بَشَنُ قبلِ عیسی وِ طرفِ دیَرِ دریا بَرَن. 23عیسی هَمی که مردمِ مرخص کرد، خُیِش رَفت کُوء تا دِ تَنایی دعا کُنه.هَمی که شُو شد،عیسی دِ کُوء تنا بی. 24دِ ایی موقَع، قایق اَ ساحل خیلی دور شیَ ویُ موجا سَخت مِزان وِ کشتی ، وِرَ ایکه باد خِلاف جهت قایق میاما. 25نَزیکِه ساعت چارِ صُو عیسی دِ حالی که رو اِوُ قدم مِزا رفت وِ سمتِ اُونا، 26وَختی شایِردا اونِه دِ حال را رَفتن رو اِوُ دییِن،زرتلاک شوئِن وُ وا صدا بُلَن گُفتِن: «ایی یِه روحَه»، 27امّا عیسی فِورن وِ اُونا فرمود: دلتو قرص مَنِم، نترسید.
28پطرس جُواو دَا:«ای خداوند، اَیَر خُیِتی، وِ مَه دَستور بَ تا مَنَم دِ رو اِوُ بیام وَرِ تو.» 29عیسی گفت:«بیا!» پطرس اَ کَشتی آما دامو وُ رو اِوُ وِ طرف عیسی رفت. 30اما وَختی شدتِ بادِنِ دیی، زرتلاک شد، دِ حالی که دِ مینِ اِوُ غرق مِشُد حَوار کِرد: «آقا نجاتِم بَ!» 31عیسی فَورن دَسِ خُیِشِ دِراز کرِد وُ اونِه گرفت وُ گفت: «ای كم اِیمان چُنَ شَک كِردی؟» 32هَمی که آمان مینِ قایق باد خُفتی. 33کسایی که دِقایق بییِن، عیسیانِه پرسِش کِردِن، گُفتن: «وِ راسی که تُو پسر خدایی.»
شفای بیماران دِ جِنیسارِت
34وُ وَختی که وِ ساحِلِ دیَری رَسِسِن، دِ سرزِمین جِنیسارِت پیادَه شوئِن. 35مَردِمونِ او محل عیسانِه شناختِن کَسایینِ وِ تمام او سرزِمی فِرسان وُ مَریضانه اُوُردِن وَرِ عیسی. 36اُونا اَ عیسی خواهش مِکردن اِجازَه بَیَه تا فقط دس بَلَن وِ گوشَه رَداش وُ هرکَه دس مِزا شَفا میرِفت.
Currently Selected:
مَتّی 14: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
