مَتّی 15
15
لزوم پاکی درون
1اوسِه گروهی اَ علمای فِرقِۀ فَریسی وُ معلما تورات اَ اُورشلیم وَرِ عیسی آمان وُ گُفتِن: 2«چُنَ شایِردات آداب وُ رُسومِ مشایخِمونِه مِشکِنَن؟ اُونا دَسا خُیِشُونِه قبلِ خوردن غِذا نِمِشُورَن!» 3عیسی دِ جُواو اونا گفت: «چُنَ شما وِرَ حفظ آداب وُ رسومِ خُیِتُو حُکم خدانِه مِشکِنید؟ 4وِرَ ایکه خدا ایجور فرمایش کِردَ: ”بُواَ وُ نِنَه خُیِتِ احترام بَل وُ اَ اونا دَسگیری کُ“ وَ ”هرکَه وِ بُواَ یا نِنَه خُیِش ناسزا بُوئَه باید كُشتَه بَشَه.“ 5اما شما مُوئید اَیَر کسی وِ بُواَ وُ نِنَش بُوئَه: ”هر کمکی که ممکن بی اَ مَه دریافت کنید وَخف خدا مِشَه،“ 6دِ ایی صورت، وِ او واجب نیسا وِ بُواَ خُیِش احترام بَلَ وُ کُمَکِش کُنَه.ایجوری شما وِرَ حفظِ آداب وُ رسومِ خُیِتو کلام خدانِه باطل مُکُنید. 7شما ای ریاکارا! اِشعیای نبی دِبارَه شما چِه خو گُفتَه اوسِه که گُفت:
8”ایی قُوم وا لویاشو وِ مَه احترام مَلَن
امّا دِلاشو اَ مَه دُورَ.
9عبادَت اونا بی فایدیَ،
وُ تعلیمِشو چیی غیرِ احکامِ بشَری نیسا.“»
10اوسِه اوجماعَتِ نِه هِنا کِرد وَرِ خُیِش وُ گفت: «وِ مَه گوش کنید وُ بَفَمید. 11انسان وا او چیی که مُخُورَ نَجِس نِما بلكِه اوچی كه اَ دوُنِش میا دَر اونَ که آیِمِنِه نِجِس مُکُنه.» 12اوسِه شایِرداش آمان وَرِشُ گُفتِن: «مینی که ایی حرف تُو سخت وِ علمای فرقه فَریسی بَر خُوردَ؟» 13عیسی جُواو دا: «هَر نهالی كه بُواَ آسِمُونیِ مَه نكاشتَ وا اَ ریشَه مِکِنییهَ، 14اونانِ وِ حال خُیِشُو بَلید. اونا راهنماآ کورَن، وختی کوری عصا کِشِ کورِ دیَری با هر دو مِفتَن دِ چاه.» 15اَما پطرس گُفت: «ایی مَثَلِ نِه وِرَ ایما توضیح بَ.» 16عیسی جُواو دا: « میَر شمانَم هَنی درک نِمُکُنید؟ 17مَه نِمِنید كه هر چی اَ راءِ دونِتو مُخورید،مِرَ وِ شِکَم وَ بعد دَفع مِشَه؟ 18امّا اُو چیائی که اَ دُو دِرمیا اَ دل سرچشمَه مِیرَه، وُ اینَ اوچیایی که آیِمِنِه نَجِس مُکُنه. 19وِرَ ایکه افکارِ بَد، قتل، زِنا، بی عفتی، دُزی، شهادت دورو وَ تُهمَت، اَ دِل سرچَشمَه مِیرَن. 20ایناَ که آیمِ نِجِس مُکُنه نَه غِذا خُوردِن وا دَسِ نَشُشتَ!»
اِیمان زَنِ غیر یهودی
21عیسی او محلِنِ ترک کِرد وَ وِ سرزمین صور و صیدون رَفت. 22یِه رو زَنی كَنعانی اَ اَهالی اونچو آما وَرِش وُ وا حَوار گُفت: «ای آقا ای پسر داوود نبی، وِ مَه رحم کُ! یِه دیوی دُختَرِمِه سخت اسیر کِردَه.» 23امّا عیسی هوچ جُوآوی وِ او نَدا تا ایکه شایِرداش آمان وَرِشُ اَ عیسی خواهِش کِردِن، گُفتن: «اونِه مُرَخص کُ، وِرِ ایی که وا حَوار دُمِه اِیما میایَ.» 24عیسی دِ جُواو گُفت: «مَه فقط وِرَ گوسوَنا گُم شیَ قُومِ اسرائیل فِرسیَ شیَم.» 25امّا او زَ آما نوآ عیسی زانو زا گُفت: «ای آقا وِ مَه کمک کُ!» 26عیسی دِ جواو او زَ گفت: «دُرِس نیسا که نونِ اَ دَسِ بَچِاآ بَسونیم وُ بَنازیم وَرِ سِی یا.» 27او زَ گُفت: «دُرُسَه، آقا امّا سِی یا هَم اَ خُردِآ غِذایی كه اَ سُفرَه صاحوِشو مِفتَه مُخُورن!» 28اوسِه عیسی وِ او زَ گُفت: «ای زَ اِیمان تُو عظیمَ! هَموجور که ماخای وِرَت بَشَه!» وَ دَرجا دُختَر او شفا پیا کِرد.
خوراک دییَن وِ چار هِزار نَفَر
29عیسی اَ اونچو رفت وُ دِ لوءِ دریاچۀ جلیل افتا را وِ تَپِه ایی رَسِسُ اونچو نِشِس. 30جمعیتِ زیادی آمان وَرِشُ وا خُیِشُو لَنگا وُ کورا وُ افلیجا وُ لالا وُ مریضای دیَرِ نِه اُوُردِن وُ هشتِنِشو جِلُو پا عیسی وُ عیسی اونانِ شفا دا. 31مردِم وَختی که دییِن،گُنگا صُوَت مُکُنَن افلیجا سالِم مِشَن لَنگا را مِرَن وُ کُورا مویینَن شگفت زیَه شوئِن وَ خدای اسرائیلِ جلال دان.
32عیسی شایِردا خُیِشِه هِنا کِرد وُ گفت: «دلِم وِ حال ایی مردِم مِسوزَه، وِرَ ایکه ایسِه سه روزَ که وا مَنَن وُ چییِ وِرَ خُوردَن نَرَن. نِماخام اونانِ گُسنه رایی کُنِم نَکُنَه دِ را اَ پا دِران.» 33شایِرداش گُفتِن: «دِ چِنی جا دور اِفتیِ ایی چِجور مِتونیم ایقَد نو پیا کنیم تا اییجور جمعیتی بَخورَن وُ سیر بان؟» 34عیسی پُرسی: «چَن تا نو دارید؟» گُفتِن: «هَف تا نونُ چَن تا ماهی كوچوک» 35عیسی وِ مردِم گُفت تا رو زِمی بَنیشَن. 36اوسِه او هف تا نُو وُ چَن تا ماهی نِه گرفت وُ بَعدِ شُكرگذاری، اُونانِ تیکهَ کِرد،دا وِ شایِرداش وُ شایِردا هم وِ او جماعَت دان. 37هَمه خُوردِن وُ سیر شوئِن وُ شایِردا هف تا سَوَد هَم اَ خُردِآ باقی مُنَه جمع کِردِن. 38تعدادِ مردِمی که غذا خُوردِن،غیرِ زَنا وُ بَچاآ چار هزار مرد بی. 39وَختی که عیسی مردِمِ نِه مُرخص كِرد، سُوارِ قایق شد وُ وِ سرزِمین مَجَدان رَفت.
Currently Selected:
مَتّی 15: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
