لوقا 7
7
شفای غلامِ افسر رومی
1بَعدِ ایکه،عیسی تمام صُوَتاشِ وا مَردِم خِلاص کِرد، رَفت وِ مینِ شَرِ کَفَرناحوم. 2یه افسر رومی بی، غُلامی داشت كه وِرَش خیلی ارزشمند بی. ایی غُلام ناخوش وُ دِ حال مُردَن بی. 3هَمی که افسر دِ بارَه عیسی شِنُفت عده ای اَ مشایخِ یهودِ فِرسا وَرِش تا ازِش بَخوان بیا وُ غلامِشِ شفا بَیهَ. 4اونا آمان وَرِ عیسی خیلی وِش التماس کِردَن وُ گُفتِن: «او مرد اَرزِش اینِ دارَ که ایی لُطفِه نِه وِش کُنی. 5وِرِ ایکه مِلَّتِ اِیمانِ دوس دارَه وُ او بی كه كنیسَه نِه وِرَمو ساخت.» 6عیسی واشُو رَفت.وُ هَمی که رَسِس نَزیکا خونَه، او افسر دوساشِ وا ایی پِیغُوم فِرسا كِه: «آقا خُیِتِه زَمَت نَ وِرِ ایکه مَه قابل نیسِم كِه تو بیایی زیر سقف خونَم. 7وُ وِرِ هَمی،خُیِمهِ قابل نِمِنِسِم که شخصاً بیام خدمتِت؛ فقط کَلامی بُ وَ غُلِام مَه شفا پیا مُکُنَه. 8وِرِ ایکه مَه خُیِم زیر اقتدار کِسی هِسم وُ سَروازیاییَم زیر اقتدار خُیِم دارِم. وِ یكی مُوئِم، ”بَرو“ مِرَ وُ وِ یکی دیَر مُوئِم ”بیا!“ میا وَ وِ غلامِم مُوئم ”فِلان کارِ کُ!“ وِ جا میارَ.» 9عیسی هَمی که اینانِ شِنُفت خیلی تعجب کِرد آما وُ وِ جمعیتی كِه پشت سَرِش میامان رو کِرد وُ گُفت: «وِ شما مُوئِم، كِه مَه حتی دِ مینِ قوم اسرائیلَم ایجور ایمانی نِیدَم.» 10هَمی که قاصدا وُریَشتِن وِ خونَه، غُلِام نِه سِلامت دییِن.
زِنَه كِردَنِ پسر بیوَه زَ
11مدتّی بَعد عیسی راییِ شَری شد وِ اسم نائین. شایِردا واردِ عده زیادی اَ مَردِم واش بییِن. 12وَختی که رَسِس نَزیکِ دروازِه شَر، دیی جنازهای نِه مِوُرَن که تَک پسر یِه بیوَه زَنی بی. عدۀ زیادی اَ مَردِمِ شَر واردِ او زَ بییِن. 13هَمی که عیسی خداوند او نِنَه نِه دیی، دِلِش وِرَش سُخت وُ وِش گُفت: «گورگَه نَکُ!» 14بَعد عیسی رَفت نَزیکُ دَسِ خُیِشِه هَشت رو تابوت اونا که تابوتِ نِه مِوُردِن وایسان. عیسی گُفت: «ای جِوُو وِ تو مُئِم وُری.» 15او مُردَه راس نِشِس وُ شروع کِرد وِ صُوَت کِردَنُ عیسی اونِه وُرییَشتُن وِ نِنَش. 16همَه زَرتِلاک شوئِن وَ خدا نِه جلال دان گُفتِن: «نبی بزرگی دِ مینِمُو پیا شیَ.» وُ هَمی جور مِگُفتن: «خدا وِ دییَنِ قُوم خُیِش آمیَی.» 17خَوَرِ کاری كِه عیسی کِردَ وی دِ سَراسر یهودیَه وُ تمام اطرافِ او منطقه پیچِس.
سؤال یحیی
18شایِردا یحیی تمام ایی چیانِه وِش خَور دان. پَ یحیی دو تا اَ شایِرداشِ خواس، 19وُ وا ایی پِیغُوم رِاییشو کِرد وَرِ عیسی خداوند: «آیا تو همونی كِه قِرارَه بیا یا چِش وِ را یِکی دیَر بَمونیم؟» 20وَختی که او دو تا آمان وَرِ عیسی وِش گُفتِن: «یحیی تعمید دهندَه ایمانِ فِرسا وَرِت تا بَفَمَه آیا تو هَمونی كِه قِرارَ بیا یا باید چِش وِ را یِکی دیَر بَمونیم؟» 21هَمو موقَع عیسی عده زیادی نِه كِه اسیرِ ناخُوشیا، بلایا وُ ارواح بَد بییِن شفا دا وُ عده زیادی اَ کورا نِه بینا کِرد. 22عیسی دِ جُواو قاصِدا گُفت: «برید وُ او چیی كِه دییِین وُ شِنُفتِین وِ یحیی بُوئید كِه چطُور كورا بینا مِشَن شَلا را مِرَن جُذامیا شفا مِیرنُ كَرا مِشنوئَنُ مُردِآ زِنَه مِشَن وُ وِ فُقَرا خَوَرِ خُوشِ پادشایی خداوند،اعلام مِشهَ. 23خوشال اونِی که دِ بارَه مَه دو وِ شَک نَوا.»
24بَعدِ ایکه قاصدا یحیی رفتِن عیسی دِ بارَه یحیی شروع کِرد وِ صُوَت کِردَن وُ گُفت: «وِرَ دییَنِ چِه چیی رفتَه وییِن وِ بیاوُو؟ وِرَ دییَنِ نِیای که وا باد مِجُمَّ؟ 25پَ وِرَ دییَنِ چه چیی رَفتِین؟وِرَ دییَنِ مردی که لِواسِ لطیفی وَرش بی؟ بی گُمو آیِمایی كِه لواسا شائونَه مُکُنن وَرشو وُ زِنِهئی پر زَرق وُ برقی دارَن دِ قصرا پادشاآ وِ سَر مُورَن. 26پَ وِرَ دییَنِ چه چیی رَفتید دَر؟ یِه پیغمَر؟ بله،مَه وِ شما مُوئِم کِسی که اَ پیغمَر هَم بالاتَرَ. 27او مردیَ كِه دِبارَش دِ نوشته آ مقدس آمیَی:
”ایسِه قاصدِ خُیِمهِ پیش اَ تو مِفِرسِم
او راءِ تونِ پیش پات آمادَه مُکُنَه.“
28وِ شما مُوئِم كِسی بزرگتَر اَ یحیی،اَ نِنَه وِ دنیا نِیامیَ. وا ایی حال، دِ پادشایی خدا او که اَ همَه کوچوکترَ اَ یحیی بزرگتَرَ ..»
29هَمی که تمام مَردِم وُ حتی خَراجگیرا صُوَتا عیسی نِه شِنُفتِن تصدیق کِردَن که راهِ خدا حقَ،وِرِ ایکه اَ دَسِ یحیی تعمید گِرِفتَه ویِن. 30اما علمای فرقَه فَریسی وُ فُقَها وا تعمید نَگِرفتَنِ اَ دَسِ یحیی، هَدَفی نِه كِه خدا وِرَشو داشت رَد کِردَن.
31اوسِه، عیسی گُفت: «مرَدِمانِ ایی نسلِ نِه وِ چه چیی تشبیه کُنِم؟ انگار ایجورَن، 32مِثِ بَچِه آیی که دِ بازار مِنیشَن وَ همدیَرِنِه حِنا مُکُنَن موئَن:
”وِرَتو نی زی یِیم نَرَقصِسین!
نوحهَ خونی کردِیم، نَگورگِسین!“
33وِرِ ایکه یحیی تعمید دهندَه آما، كِه نَه نُو مُخورهَ وُ نَه شِراو مِنوشهَ وُ شما مُوئید: ”او دیو دارَه.“ 34پسر انسان آمیَ که هَم مُخورهَ وُ هَم مِنوشهَ شما مُوئید: ”سِیلِش کنید یِه مردِ شِکَمو،عرَقیُ شِراوی،رِفیقِ خراجگیرا وُ گُناکاراَ.“ 35امّا دُرُسی هَر حکمتی نهِ نَتیجهای که وِ بار مییارَه نِشُو مِیَه.»
بخشیَه شییَنِ زَنی گُناکار
36یِه رو یكی اَ علمای فَریسی، عیسی نِه وِرَ خُوردِن غِذا دعوت کِرد. پَ عیسی رَفت وِ خونۀ او فَریسی وُ نِشِس سَرِ سُفرَه. 37دِ مینِ او شَر، زَن بدکاره ای زِنِهئی مِکِرد. وَختی که فَمِس عیسی دِ خونِۀ او فَریسی مِهمُونَ، ظرفِ مَرمَری پر اَ رِوغن خُوش عطری، وا خُیِش اُوُرد. 38وُ هَموجور که مِگورگس وایسا پشتِ سَرِ عیسی نَزیکِ پاآش. او وَخت وا اشکِ چِشاش پاآ عیسی نِه شُشتُ اونان وا موآش خشک کِرد وُ پاآ عیسی نِه ماچ کِردُ وِشو روغن مالُن. 39هَمی که صاحِو خونَه یعنی او فَریسی اینِنِ دیی، وا خُیِش گُفت: «اَیَر ایی مرد وِ راسی یِه پیغمَر بی، مینِس ایی زَ که دَس مَلَ قَش چه کِسیَ وُ چطُور زَنیَ؛ مینِس که ایی زَنِ بدکاره اییَ.» 40عیسی وِ فَریسی گُفت: «شَمعون، ماخام چیی وِرَت بُئِم» شَمعون گُفت: «بَفَرما، استاد.» 41عیسی گُفت: «یکی اَ دو نفر طَلب داشت، اَ یكی وِ قدِ یِه سال و نیم مَعاشِ یِه کارگری طَلب داشت وُ اَ او یکی قدِ یِه ماه و نیم. 42وَختی که او دو نفر چیی نَشتَن كِه وِش بَیَن طَلبكار هر دوتاشونِ بَخشی. ایسِه وِ گُمونِت کامینشو صاحوِ پولِ بیشتَر دوس دارَه؟» 43شَمعون جُواو دا: «وِ گِمُونِم اونِی که قرض بیشتَری داشتُ وِش بَخشیَ شُد.» عیسی وِش گُفت: «قضاوتِت دُرِسَ.» 44وُ هَنی رو کِرد طرف زَ وُ وِ شَمعون گُفت: «ایی زَنِ نِه مُویینی؟ مَه آمیَم وِ خونت وَ تو وِرَ شُشتَنِ پاآم اِوُ نیاوُردی. اما ایی زَ پاآ مَنِه وا اشکاش شُشتُ وا موآش خشک كِرد. 45تو رومهِ ماچ نُکِردی اما ایی زَ اَ موقعی که مَه آمام داخل لحظه ایی اَ ماچ کِردَنِ پاآم دَس وُر نِمَرَ. 46تو وِ سَرِمِ روغن نَزایی اما او پاآمِه روغَن مالی کِرد. 47پَ وِتو مُوئِم، گُناآ ایی زَ که خیلیَم زیادَه آمُرزیدَ شُد وِ ایی خاطر بیشتَر محبت کِرد. امّا اونِی که كمتَر آمرزیدَ شُد کمتَرَم محبّت مُکُنَه.» 48او وَخت عیسی وِ او زَ گُفت: «گُناآت آمرزیدَ شُد.» 49بَعد اونایی که وا عیسی نِشِسَه ویِن سَرِ سُفرَه وِ هم گُفتِن: «ایی كیَ كِه حتی گُناآ نِه مِوَخشهَ؟» 50عیسی وِ او زَ گُفت: «ایمانِت تونِه نجات دیَه بَرو وِ سِلامت.»
Currently Selected:
لوقا 7: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
