لوقا 6
6
عیسی صاحوِ روزِ شبّات
1دِ یکی اَ روزا شبّات، عیسی اَ مینِ گَنِما رَد مِشُد. شایِرداش قوشَه گَنِمانِ مِچین وُ دِ كفِ دَساشو مِسایینُ مِخوردِن. 2اَما عده ایی اَ علمای فِرقِۀ فَریسی گُفتِن: «چُنَ شما كاری نِه مُکُنید كِه دِ روز شبّات جایز نیسا؟» 3عیسی دِ جُوآوشو گُفت: «مَیَر دِ نوشته آ مقَدس نَخُنِید داوود هَمی که خُیِش وُ یاراش گُسنَه شوئِن چی كِرد؟ 4او رَفت وِ خونِۀ خدا، نُونِ پیشکَش شیَ وِ خدا نِه وُرداشتُ خُورد وُ وِ یاراشَم دا،دِ صورتیکِه خُوردِن او نُونا،فقط وِرِ کاهنا جایزَ.» 5او وَخت عیسی وِاونا گُفت: «پسر انسان صاحوِ روزِ شبّاتَ.»
شفای مردی که دَسِش خشک شیَ وی
6عیسی دِ روزِ شبّاتِ دیری رَفت وِ كنیسَه وُ شروع کِرد وِ تعلیم دیَن. مردی اونچو بی كِه دَسِ راسِش خشک شیَ وی. 7معلما تورات وُ علمای فَریسی عیسی نِه زیر نَظَر داشتِن تا بُویینَن آیا او دِ روزِ شبّات شفا مِیهَ،تا بُونِه ای وِرَ مُتَهَم کِردَنِش پیا کُنَن . 8اما عیسی که اَ اَفکارِشو خَوَر داشت، وِ او مرد كِه دَسِش خشک شیَ وی گُفت: «وُریسُ وایس دِ مینجا.» اونَم وُریسا وایسا، 9عیسی وِاونا گُفت: «ماخام ازِتو چیی بَپُرسِم: یعنی دِ روزِ شبّات، خویی كِردَن جایزَ یا بدی كِردَن؟ نجات دیَنِ جُونی یا هِلاک كِردَنش؟» 10او وَخت سیلی کِرد وِ یِکی یکیشونُ وِ او مرد گُفت: «دَسِتِه دِراز کُ.» او دَسِشِه دِراز كِردُ دَسِش خو شُد. 11اما اونا سخت خشمگین شوئِنُ دِ مینِ خُیِشُو نِشِسِن وِ مشورت کِردَن که چی وِ سَرِ عیسی بیارَن.
دُوازَه رسول
12دِ یکی اَ او روزا عیسی وِرَ دعا رَفت وِ کُو وُ تمام شُونِه وِ دعا کِردَن وِ درگا خدا وِ صُو رَسُن. 13وَختی که روز شُد، شایِرداشِ خواسُ اَ مینِشُو، دُوازَه نفرِ نِه سَوا كِرد وُ اونا نِه رسول خُن: 14شَمعون كِه اسمِشِ هَشت پطرس وُ آندریاس بِرارِ پطرس، یعقوب وُ یوحنا، فیلیپُس وُ بَرتولما، 15متّی وُ توما، یعقوب پسر حَلفای وُ شَمعون معروف وِ غیور، یهودا پسر یعقوب ، 16وُ یهودا اَسخریوطی كِه وِ عیسی خیانت کِرد.
خُشالِ شما
17عیسی واردِ شایِرداش اَ كُو آما دامو وُ دِ جا هَمواری وایسا. عدۀ زیادی اَ شایِرداش وُ جمیعت زیادی اَ مَردِم اَ سَراسَر یهودیَه وُ اورشلیم و اَ شَرا بندری صور وُ صیدون، اونچو بییِن. 18آمیَ ویِن تا کَلام اونِه بَشنُوئَن وُ اَ مِرَضاشُو شفا بیرَن. اونا که اسیرِ ارواح بَد بییِن شفا میرفتِن، 19وُ هَر کهَ اَ مینِ جمیعت تَقَلا مِکِرد دَسِشِه بَزَنَه قَ عیسی وِرِ ایکه نیرویی اَزِش میاما دَر که هَمَه نهِ شفا مِدا.
20عیسی خیرَه شُد وِ شایِرداش وُ گُفت:
خُشالِ شما كِه فقیرید
وِرِ ایکه پادشایی خدا وِرَ شمانَه.
21خوشال شما كِه ایسِه گُسنِه اید
وِرِ ایکه شما سیر مِشید.
خوشال شما كِه ایسه مِگورگید
وِرِ ایکه شما خَنَّه میا وِ لِوُ آتو.
22خُشال شما وَختی که وِ خاطر پسر انسان، مَردِم اَ شما نفرت پیا کُنَن وُ شما نِه اَ مینِ خُیِشُو بَنازَن دَر وُ وِتُو ناسزا بوئَن وُ بَد نامِتو کُنَن . 23دِ او روزا اَ شادی پایکوبی کنید وِرِ ایکه پاداشِتُو دِ آسِمُو خیلی بزرگَه وِرِ ایکه اجدادِشُنَم دُرُس هَمی جور وا پیغمَرا رفتار مِکِردَن.
24اما وای وِ حالِ شما اِی دُولَتمندا
وِرِ ایکه شما تسلی خُیِتونِ گِرِفتِید.
25وای وِ شما كِه ایسه سیرید،
وِرِ ایکه شما گُسنِهئی مِکَشید.
وای و شما كِه ایسه مِخنید،
وِرِ ایکه شما عَذا مِیرید وُ مِگورگید.
26وای و شما وَختی که همَه اَزِتو تعریف مُکُنَن، وِرِ ایکه اجدادِ اونا دُرُس هَمی کارِانِ وا انبیای دُورویی کِردَن.
محبت وِ دُشمَناتو
27اَمّا وِ شما كِه صُوَتا مَنِه مِشنوئید مُوئِم: دُشمَنا خُیِتو نِه دوس داشتَواید وِ اونایی كِه اَ شما بَئِشو میا،خوئی کُنید، 28وِرَ اونایی كِه شما نِه لعنت مُکُنَن برکت باخاید وُ وِرَ اونایی كِه وا شما بدی مُکُنَن دعای خیر کنید. 29وَختی که یکی سیلی مِزِنَه دِ روت طرف دیَر روتَم وِرَش وُریَردُن وَختی که یِکی کورتیِ تنِتِ خواس پیرهنتَم وِش بَ. 30اَیَر یکی چیی ازِت بَخوا وِش بَ وُ همی که یکی او چیی كِه وِرَ تونَ واگیر کِرد اَزِش نَخوا وُریَردُونَش، 31وا مَردِم هَموجوری رفتار کُنید كِه ماخایید واتُو رفتار کُنَن.
32اَیَر فقط اونانِ دوس داشتَواید كِه شما نِه دوس دارَن، چِه فایدای وِرَتو دارَه؟ حتی گُناکارا هَم دوسدارا خُیِشو نِه دوس دارَن. 33وَ اَیَر فقط وِ اونا که وِتُو خوئی مُکُنَن خوئی کنید چِه فایدای وِرَتو دارَه؟ وِرِ ایکه گُناکارا هَم هَمی کارِ نِه مُکُنَن. 34وَ اَیَر فقط وِ اونایی قَرض بَئید كِه توقع عَوَض اَزِشو دارید دیَه چه چی وِتُو اضافَه مِشهَ؟ حتی گُناکارا هَم، وِ گُناکارا وا ایی اُمید قَرض مِیَن که بَسونَنِش پَس. 35اما شما، دُشمناتو نِه دوس داشتَواید وُ وِشو خوئی کنید وُ بدون توقع عَوَض قَرض بَئید كِه پاداشِ زیادی نِصیوِتُو ما وَ اولادایِ خدای متعال مِشید. وِرِ ایکه او دِ حَقِ ناشکرا وُ گناکارا مِرَوُونَ. 36پَ هَمی جور كِه بُواِ شما رحیمَ،شمانَم رحیم باید.
قضاوت دِبارَ دیَریا
37قضاوت نَكُنید وَ قضاوَت نِمِشید. محكوم نَكُنید وَ محكوم نِمِشید. بَوَخشید تا بَخشیَ بَشید. 38بَئید وِ شما دادَ مِشَه،پیمُونِهای پُراپُر وُ تَپُنَّ شیَ،تَکو دیَه شیَ ،لوریز دِ دامَنتو رِختَه مِشهَ،وِرِ ایکه وا هر پیمُونه ای كِه بَئید وا هَمو پیمُونَه عَوض مِیرید.
39عیسی ایی مَثَلِنَم وِرَشو اُوُرد: «مَیَر كوری مِتُونهَ راهنما كورِ دیَری با؟ مَیَر هَر دوتاشو نِمَفتَن دِ چاه؟ 40شایِرد اَ اوساش سَرتَر نیسا اما وَختی که تعلیم وُ تَربیتِش کامل با، مِثِ اوساش مِشهَ.
41چِجور پَرِ كَنِه دِ چِشِ بِرارِت مُویینی اَما تَنَه دِرَختِ نِه دِ چِشِ خُیِت نِمُویینی؟ 42چِجور مِتونی وِ بِرارِت بُوئی: بِرار، بَل او پَرِ کَنِ که دِ چِشِ تونَ دِرارِم دَر دِ صورتی كِه تَنَه دِرَخت نِه که مینِ چِشِ خُیِتَ نِمُویینی؟ ای ریاكار، اول تَنَه دِرَختِ نِه اَ چِشِ خُیِت دِرار؛ او وخت مِتونی دُرُس بُویینی كِه پَرِ کَنِه اَ چِشِ بِرارِت چِجور دِراری دَر.
درخت وَ میوَش
43هوچ درخت خوِیی میوۀ بد وِ بار نِمییارَه وُ درخت بد هَم میوۀ خو وِ بار نِمییارَه؛ 44هَر درختی اَ میوَش شناخته ما. اَ بوته ی خار، اَنجیل نِمِچِنَن وُ اَ بوته تمشک اَنگور نِمِچِنَن. 45مرد خو اَ خَزُونَه خوءِ دلِ خُیِش خوئی وِ بار مییارَه وُ مرد بد اَ خَزُونَه بد دِلِ خُیِش بدی وِ بار مییارَه، وِرِ ایکه زِوو چیی نِه مُوئَه که دِل اَزِش لُوریز با.
خونۀ رو تَختَ سنگ
46چُنَ مَنِه آقا،آقا حِنا مُکُنید ولی او چیی كِه وِ شما مُوئم نِمُکُنید؟ 47هَر کَه وَرِ مَه بیا وُ او چیائی كِه مُوئِم گوش بیرَ وُ وِ اونا عمل کُنَه,وِ شما نِشو مییِم که مِثِ چِه كِسیَ. 48مِثِ او مردیَ كِه وِرَ ساختِنِ خُونَهش، زمینِ چال کِرد وُ پِیِ او خونَه نِه رو تختَ سنگی هَشت. وُ وَختی که لَف آما وُ زا وِ او خونَه،نَتونِس اونِ اَ جا دِرارَ وِرِ ایکه محکم ساخته شیَ وی. 49اَما هَر که صُوَتا مَنِه بَشنوئهَ وُ وِ اونا عمل نَکنَه مِثِ مردیَ كِه خونَشِ رو خاک بدونِ پِی بنا کِرد.وَختی که لَف زا وِ او خونَه درجا خونَش رُمِّس وُ خِراوی بزرگی جا هَشت.»
Currently Selected:
لوقا 6: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
