لوقا 5
5
اولین شایِردا عیسی
1یِه رو که عیسی وایسیَ وی دِ لوءِ دریاچَه جِنیسارِت وُ مَردِم اَ هَر طرف وِش زور میاوُردِن تا كَلام خدا نِه بَشنوئَن ، 2عیسی دِ لوءِ دَریاچَه دوتا قایق دیی که ماهیگیرا اَزِش آمیَ وییِن دَر وُ سرگَرمِ شُشتَنِ توراشُو بییِن. 3عیسی وِ یِكی اَ قایقا كِه وِرَ شَمعون بی، سُوآرِ شدُ ازِش خواس که كمی اَ خشکی دور بَشَه وُ هُموجور که نِشِسَه وی دِ قایق، شروع کِرد وِ تعلیم دیَن وِ مَردِم. 4هَمی که صُوَتاش خِلاص شد وِ شَمعون گُفت: «قایقِ نِه بُر وِ جای عمیق اِوُ وُ تورا نِه وِرَ گِرفتِنِ ماییی بَنازید دِ اِوُ.» 5شَمعون دِ جُوآوِش گُفت: «استاد ایما تَمام شُو،سخت زَمَت کَشییِیم وُ چیی نَگِرِفتیم،اَما ایسِه كِه تو موئی مَه تورا نِه مِنازِم دِ اِوُ.» 6اونا ایجور کِردَن وُ اِنقَد ماییی صید کِردَن كِه نَزیک بی توراشُو بَدِرَ. 7وِ همکارا آ خیِشُو كِه دِ او یِکی قایق بییِن اِشارهَ کِردَن كِه بیان كمکِشُو. اونا آمانُ هر دوتا قایقِ نِه پُر کِردَن اَ ماییی جوری که نَزیک بی قایقا بَرَن زِیرِ اِوُ. 8وَختی که شَمعونِ پطرس اینِنِ دیی، اِفتا وِ پاآ عیسی وُ گُفت: «ای خداوند، ازِم دور با، وِرِ ایکه مَه گُناکارِم.» 9وِرِ ایکه خُیِش وُ هَمکاراش اَ ایی صیدی كِه کِردهَ وین حیرَت زیَه شیَ وین. 10همکارایِ شَمعون، یعقوب وُ یوحنا پسرا زِبدی هَم، همو حالِ نِه داشتِن. عیسی وِ شَمعون گُفت: «زَلَت نَرَ اَ ایی وِ بَعد وِ جا ماییی مَردِمِ نِه صید مُکُنی.» 11هَمی که قایقاشُو نِه اُوُردِن وِ خشکی تمام ایی چیا نِه هَشتِن وُ دُمِ عیسی اِفتان را .
شفای مرد جذامی
12یِه رو دیَه هَمی که عیسی دِ یکی اَ شَرا بی، مردی آما که جُزام تمام بدنِشِه گِرِفتهَ وی. هَمی که او جذامی عیسی نِه دیی، سجدَه کِرد وُ وا عیزِالتماس گُفت: «خداوند، اَیَر بَخایی مِتونی مَنِه شفا بَیی!» 13عیسی دَسِ خُیِشِه دِراز کِرد وُ دَس هَشت قَش وُ گُفت: «ماخام،شفا بِیر!» درجا اَ جذام شفا گِرِفت. 14او وَخت عیسی وِش دستور دا كِه ایی جَریانِه وِرَ كِسی تعریف نَکُنَه! بَلکه وِش گُفت: «بَرو خُیِتِه وِ كاهن نِشُو بَ وَ او قُروُنی كِه موسی وِ رسم پاک شیَن اَ جُذام دستور دیَه پیشکش کُ تا وِ اونا نِشُو بَیَه شَفا پیا کِردِی» 15اَما وا ایی همَه، خَوَرِ کارای عیسی بیشتَرُ بیشتَر پیچِس، جوری که جماعتای زیادی جمع مِشوئِن وَرِش تا صُوَتاشِ بَشنوئَن وَ اَ مِرَضاشُو شفا بیرَن. 16اَما عیسی وِ جایی دور اَ مردِم مِرَفت تا دِ تَنایی دعا کُنَه.
شفایِ یِه افلیج
17دِ یکی اَ او روزا هَموجور که عیسی تعلیم مِدا علمای فِرقِۀ فَریسی وُ مُعَلِما تورات نِشِسَه ویِن اونچو . اونا اَ اورشلیم وُ تمام داهاتا وُلاتِ جلیل وَ یهودیَه آمیَ وین اونچو. قدرتِ خداوند وِرَ شفای مریضا وا عیسی بی. 18دِ ایی موقَع چَن تا مرد یِه مَردِ اِفلیجی نِه رو یِه تختی اُوُردِن. اونا تَقِلا مِکِردَن اونِ بیارَن داخل وُ بَلَنِش جِلو رو عیسی. 19اما وِ خاطر ازدحامِ جمعیت نَتُونِسِن رایی پیا کُنَن كِه اونِ نِه بیارَن داخِل. پَ رفتِن بالا پشت بُو وُ سُفالا نِه هَشتِن کنار وُ اونِه وا دُشَکِش اَ مینِ سُفالا سقف فِرسان دامو وُ هَشتَنِش دِ مینجا جمعیت وَرِ رو عیسی. 20عیسی هَمی که ایمانشو نِه دیی گُفت: «مرد،گُناآت آمُرزیدَه شُد!» 21معلما تورات وُ علمای فَریسی وا خیِشُو مِگُفتن: «ایی كیهَ كِه کفر مُوئَه؟ غیرِ خدا چه کِسی مِتُونهَ گُناآنِه بَوَخشَه؟» 22هَمی که عیسی فَمِس وِ چی فکر مُکُنَن وِشُوگُفت: «چُنَ دِ دلِتو ایجور فکر مُکُنید؟ 23گُفتِن کامینشو آسُوتِرَ؟ ایکه ”گناآت آمُرزیدَه شد“ یا ایکه ”وُریس وُ را بَرو“؟ 24امّا وِرِ ایکه بَنِسَواید که پسر انسان رو زِمی اقتدارِ آمُرزیَن گُناآنِه دارَه» پَ رو کِرد وِ او مرد اِفلیج وُ گُفت: «وِ تو مُوئِم وُری،دُشَکِتِ وُردار وُ بَرو وِ خونَت!» 25دَرجا او مرد دِ جلو روشو اَ جا وُریسا، دُشَکی نِه كِه روش خُفتیَ وی وُرداشتُ هَموجور که خدا نِه جَلال مِدا رَفت وِ خونَش. 26همَه حیرت کِردَن وُ خدا نِه جلال مِدان وُ وا تَرسی که اِفتیَ وی وِ جُونِشو مِگُفتن: «امرو چیا عجیوی دییِیم.»
دعوت لاویِ خَراجگیر
27بَعدِ ایکه عیسی اَ او خونَه دِرآما دَر، خَراجگیری نِه دیی وِ اسمِ لاوی كِه نِشِسَه وی دِ دَکَه خراجگیری. عیسی وِش گُفت: «دُمِ مَه بیا.» 28لاوی هَمه چی نِه هَشت وَ وُریسا وُ اِفتا دِ دُمِ عیسی.
29لاوی وِرَ عیسی دِ خونَه خُیِش مِمُونی بزرگی گِرِفت. عدۀ زیادی اَ خراجگیرا وُ مَردِمِ دیَر وارد عیسی وُ شایِرداش سَرِ سُفرَه نِشِسَه ویِن. 30امّا علمای فَریسی وُ بعضی اَ معلما تورات که اَ دارُ دَسَه فَریسیا بییِن، وا ناراحتی وِ شایِردا عیسی گُفتِن: «چُنَ شما واردِ خراجگیرا وُ گُناکارا مُخورید وُ مِنوشید؟» 31عیسی دِ جُوآوِشو گُفت: «مریضا وِ طبیب نیاز دارَن نَه آیِما سالم. 32مَه نیامیَم تا آیِما صالح، بلکه آمیَم گُناکارا نِه وِ توبَه دعوت کُنِم.»
سوال دِبارَ روزَه
33وَ اونا وِش گُفتن: «شایِردا یحیی بیشتَر اوقات روزَه مِیرَن وُ دعا مُکُنَن شایِردا علمای فَریسی هَم ایجور مُکُنَن امّا شایِردا تو همیشَه مُخُورن وُ مِنوشَن» 34عیسی وِاونا جُواو دا: «مَیَر شما مِتُونید دوسا داما نِه وَختی که داما واشُونَ مَجبور کنید روزَه بِیرَن؟ 35امّا زِمانی میا كِه داما اَ اونا گِرِفتَه مِشَه دِ او روزا اونا روزَه مِیرَن.» 36عیسی وِرَشو ایی مَثَلِنَم اُوُرِد: «هوشکَه اَ یِه لِواسِ نِوُ، تیکه ای نِمِوُرهَ تا وا او لِواسِ نیمداری نِه وَسلهَ کُنَه. اَیَر ایجور کُنه هَم او لِواسِ نِوُ مِدِرَ وُ هَم وَسلِۀ نِوُ وا لِواسِ نیمدار جور نِما. 37وُ همیجور هوشکه شِراو تازه نِه دِ مَشکا کُنَه نِمِرِزَ. اَیَر بَرِزَ، شِراو تازهَ مَشکا نِه مِتوقُنَه شِراو هدَر مِرَ وُ مَشکائَم اَ بین مِرَن. 38بَلِه،باید شِراو تازه نِه دِ مشکایِ نِوُ رِخت. 39هوشکَه بَعدِ خُوردِن شِراو کُنَه، شِراو تازهَ نِمِخا وِرِ ایکه مُوئَه، شِراو کُنَه بِهتَرَ.»
Currently Selected:
لوقا 5: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
