لوقا 24
24
زِنَه شییَنِ عیسی
1صُو شَفَق روزِ اولِ هفتَه، زَنا سِدر وُ کافور وُ روغَونا خُوشبوئی نِه که آمادَه کِردَ وییِن وا خُیِشُو وُرداشتِن وُ رفتِن وِ مَقوِرَه. 2وُ دییِن كِه سنگ اَ در مَقوِرَه غَلطِسَه وِ کناری. 3وُ وَختی که رفتِن مینِ مَقوِرَه، جنازه عیسی خداوندِ پیا نَکِردَن. 4اَ اتفاقی که اِفتیَ وی حیرو شوئِن که یِیهو دوتا مرد وا لواسا نورانی، وایسان وَرِشو. 5زَنا اَ ترس سَرِشُو نِه اِناختِن دامو امّا او دوتا مرد وِاونا گُفتِن: «چُنَ زِنَه نِه دِ مینِ مُردَهآ مِجورید؟ 6او اینچو نیسا بَلکه زِنَه شیَ!وِ یادِتو بیارید وَختی که دِ جلیل بی، چی وِتُو گُفتَه وی. 7گُفت که پسر انسان باید وِ دَسِ گُناکارا تسلیم بَشَه وُ وِ صلیب کَشیَه با وَ دِ روزِ سِوم زِنَه با.» 8اوسِه زَنا صُوَتا عیسی نِه وِ یاد اُوُردِن، 9وَ هَمی که اَ مَقوِرَه وُریَشتِن، همَه چی نِه وِ یازَه رسول وُ بقیه گُفتِن. 10زَنایی که ایی خَوَرِ وِ رسولُا دان مریم مجدلیَه، یوآنا وَ مریم نِنَه یعقوب وَ باقی زَنایی که واردِشو بییِن. 11امّا رسولا گفتِۀ زَنا نِه هِلَه پِلَه دونِسِن وُ حرفاشو نِه باوَر نَکِردَن. 12وا ایی همَه، پطرس وُریسا وُ دُوئِس وِ طرف مَقوِرَه وُ خم شد سِیل كِرد، امّا چیی غیر كَفِه نَدی. پَ هَموجور که اَ ایی جریان حیرَت کِرد وُریَشت وِ خونَه.
دِ راءِ عِمائوس
13همو رو، دو نفر اَ اونا مِرفتن وِ طرف داهاتی وِ نام عِمائوس، كِه دِ دو فَرسَخی اورشلیم بی. 14اونا دِ بارَه تمام ایی چیائی که اتفاق اِفتیَ وی وا هم صُوَت مِکِردَن. 15همو جور كِه وا هم سرگرمِ صُوَت کِردَن و گُفتِ لُفت بییِن، عیسی، خُیِش، آما وَرِشو وُ هَمرَاشو شد. 16امّا اونِه نَشناختِن وِرِ ایکه چِشاشو اَ ایکه اونِه بَشناسَن، بَسته شیَ وی. 17عیسی اَزِشو پرُسی: «دِ مینِ را دِبارَه شی گُفتُ لُفت مِکِردید؟» اونا وا قیافِه آ غَم زیَه ساکت وایسان. 18یكی اَ اونا كِه اِسمِش كِلِئوپاس بی جُواو دا وُ وِش گُفت: «مَری تو تَنا کِسِ غَریو دِ اورشَلیمی که اَ جریانا مینِ ایی روزا بیخَوَری!» 19عیسی اَزِشو پُرسی: «چِه چیی؟» اونا وِش گُفتن: «او چیائی که وِ سَرِ عیسی ناصری آما. او پِیغَمَری بی که دِ پیشگاءِ خدا وَ وَرِ تمام مَردِم، کارا وُ کَلام پر قدرتی داشت. 20وَ چجور سَران کاهنا وُ بزرگا ایما،اونِ دان تا وِ مرگ محکوم بَشَه وَ کَشی یِنِش وِ صلیب. 21امّا ایما اُمیدِمُو وِ ای بی که او هَمو کِسی با که قِرارَ اسرائیلِه رهایی بَیَه.عَلاوَ وِ ایی ایسِه سه روزَ که اَ ایی جریانا مِیزَرَ. 22اَ ایی گُذَشتَه عده ای اَ زَنایی که واردِمونَن ایمانِ حیرَت زیَه کِردَن. اونا امرو شَفَقِ صُوِ رفتِن وِ مَقوِرَه، 23وَ همی که جنازه عیسی نِه پیا نَکِردَن، آمان وِ اِیما گُفتِن فِرِشتِهآیی دِ رویا دییَن که وِشو گُفتِنَ،عیسی زِنیَه. 24اوسِه عده ای اَ رِفیقامُو رفتِن وِ مَقوِرَه وُ اوضاع نِه هَموجور که زَنا گُفتهَ وین دییِن امّا خُودِ عیسی نِه نِیدَن.» 25او وَخت عیسی وِشو گُفت: «اِی نادونا که دِلِ دیر فَمی وِرَ باوَر کِردَنِ صُوَتا انبیا دارید. 26مَیَر نباید كِه مسیحِ موعود، ایی عِذاوا نِه بُویینَه وَ اوسِه وِ جَلالِ خُیِش دِرا؟ » 27اوسِه شروع کِرد اَ نوشته آ موسی وُ تمام اَنبیا وَ هَر چیی نِه که دِ تمام کِتاوا مقدس دِبارَه خُیِش گُفته شیَ وی وِرَشو توضیح دا.
28اوسِه وَختی وِ داهاتی که مَقصَدِشُو بی نَزیک شوئِن عیسی وانِمود کِرد که ماخا بَرَ وِ جا دورتَری. 29امَا اونا اصرار کِردَن وُ گُفتِن: «وا ایما بَمُو، وِرِ ایکه چیی وِ آخِرِ روز نَمُنَّه وُ شُو نَزیکَه.» پَ عیسی رَفت داخل وُ واشُو مُن. 30وَختی که واشُو نِشِس سَرِ سُفرَه، نُونِ گِرِفت وُ برکت دا تیکهَ کِرد دا وِشُو. 31هَمو موقَع، چشاشو وا شُد وَ اونِه شناختِن اما او فُورن اَ جلو چِشاشو غِیو شُد. 32اوسِه اونا اَ هم پُرسیِن: «مَیَر وَختی که دِ را وامُو صُوَت مِکرد وُ کِتاوا مقدسِ نِه وِرَمو توضیح مِدا دِل دِ سینَمو نِمِتَپِس!» 33پَ فِورَن وُریسان وُ وُریشتِن وِ اورشلیم. دِ اونچو او یازَه رسولِ نِه پیا کِردَن که وا رفیقاشُو جمع شیَ وین وُ مِگُفتِن: 34«بله، وِ راسی که عیسی خداوَند زِنَه شیَ وَ خُیِشِه وِ شَمعون آشکار کِردَ.» 35اوسِه او دو نفر هَم گُفتِن که دِ مینِ را چِه چیی اِتفاق اِفتا وَ چجور عیسی نِه دِ موقَع تیکهَ کِردَنِ نُو اِشناختِنَ.
ظُهور عیسی وِ شایِردا
36وَ هَنی دِ ایی بارَه صُوَت مِکِردَن که عیسی خُیِش وایسا دِ مینِشُو وُ گُفت: «سِلام وِ شما!» 37اونا زَرتِلاک شوئِن وُ گُمو کِردَن كِه روح مُویینَن. 38عیسی وِاونا گُفت: «چُنَ ایجور پَریشُونید؟ چُنَ شَک وُ شُبهَه وِ دلاتو را میید؟ 39دَس وُ پاآمِه سِیل کنید،خُیِمِم. وِ مَه دَس بَزِنید وُ بُوینید روح که گوشت وُ اُسِخُو نَرَ امّا همیجور که مُویینید مَه دارِم.» 40اینِ نِه گُفت وُ دَس وُ پاآشِ نِشُونِشُو دا. 41اونا اَ زورِ خُشالی وُ حیرَت نَتُونِسِن باوَر کُنَن. پَ عیسی وِاونا گُفت: «یعنی چیی وِرَ خُوردِن دارید؟» 42مقداری ماییی کَواب کِردَ وِش دان. 43اونِه گِرِفت وُ دِ وَرِ چِشِشو خُورد.
44اوسِه وِاونا گُفت: «ایی هَمو چییَ که وَختی واتُو بییِم، مِگُفتم ایکه تمام چیائی که دِ توراتِ موسی وُ کِتاوا انبیا وَ زَبور دِبارَه مَه نوشته شیَ باید وِ اَنجام بَرَسَه» 45او وَخت فِکرِشُو نِه روشن کِرد تا بَتُونَن کِتاوا مقدسِ نِه بَفَمَن. 46وَ وِاونا گُفت: «دِ کِتاوا مقدس نوشته شیَ که مسیح عِذاو مِکَشَه وَ دِ روزِ سِوم اَ مُرد آ زِنَه مِشَه. 47وَ وِ اِسم او توبَه وُ آمرزِش گُنا آ وِ تمام مِلَتا اعلام مِشَه وَ شُروعِش اَ اورشلیمَ. 48شما شاهدا ایی چیایید. 49بَنِسَواید مَه او کِسی نِه که وَعدِۀ بُواَمَ،اَ آسِمُو مِفِرسِم روتو، پَ دِ مینِ شَر بَمُونید تا وَختی که ایی قدرتی که اَ آسِمُونَ شمانِ بِیرَ دِ وَر.»
وُریشتِنِ عیسی وِ آسِمُو
50او وَخت عیسی اونانِ نِه وِ بیرون شَر تا نَزیکی داهات بیت عَنیا بُرد وُ دَساشِ بُلن کِردُ برکتشُو دا، 51وُ هَموجور که برکتشُو مِدا اَزِشو سَوا شُد،وِ آسِمُو بالا بُردَه شُد. 52وَ همه شو اونِه پَرسِش کِردَن وُ وا شادیِ بزرگی وُریَشتِن وِ اورشلیم. 53وَ همیشه دِ معبد خداوند مِمُنِّن وُ خدانِه شکر وُ ستایش مِکِردَن.
Currently Selected:
لوقا 24: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
