لوقا 16
16
مُباشِر مُتِقَلِب
1او وَخت عیسی وِ شایِرداش گُفت: «مرد دُولَتمندی بی که مُباشِری داشت. وِش خَوَر رَسِس که مباشر داراییِ تونِ وِ باد میَه. 2پَ مُباشرنِه خواسُ ،گُفت: ”ایی چِه چیائیَ كِه دِ بارَه تو مِشنوئِم؟ حِساو کِتاوِتِ کُ دیَه نِمِتُونی مباشِرِ مَه بایی.“
3مُباشر وا خُیِش فکر کِرد کِه: ”ایسِه كِه ارواب ماخا مَنِه اَ کار بَرکنار کُنه بایَد شی کُنِم؟ مَه كِه نَه جُونِ بیلزِیَن دارِم وُ اَ گداییَم عارِم میا. 4مینِم شی کُنِم،کِه وَختی مَنِه اَ ایی کارِ مِباشری بَركنار كِرد، کِسایی بان كِه مَنِه را بییَن وِ خونِه آ شو.“ 5پَ بدهكارا اروابِ نِه تَک وِ تَک خواس. وِ اوّلی گفُت: ”چَنی وِ ارواب مَه بدهكاری؟“ 6جُواو دا: ”صد خُمرَ روغن زِیتُو“، گُفت: ”بیا، ایی حِساوِ تونَ. زُو بَنیش وُ بَنویس پنجاه خُمرَ زُو با.“ 7اوسِه وِ دیَری گفُت: ”تو چَنی بِدِهکاری؟“ گُفت: ”صد خَروار گَنِم.“ وِش گُفت: ”بِیا ایی حِساو تونَه، بَنویس هشتاد خَروار!“
8ارواب مُباشرِ مُتِقَلبِ نِه وِ خاطر ایکه وِ زِرَنگی رفتار کردَ وی تحسین كِرد؛ وِرِ ایکه بَچِه آ ایی زِمونَه دِ کاراشو وا هَمدیَه اَ بَچه آی نور زِرنگتَرَن. 9پَ وِ شما مُوئِم؛ كِه مال فاسدِ ایی دنیا نِه وِرَ پیا کِردَنِ رَفیقا وِ کار بِیرید تا وَختی او مال اَ بین رفتا اونا شمانِه دِ خونه آ اَبَدی را بییَن.
10او که دِ چیا كوچوک اَمانتدار با، دِ چیا بزرگ هَم اَمانتدار مِشَه وَ او که دِ چیا كوچوک اَمانتدار نَوا دِ چیا بزرگ هَم اَمانتدار نِمِشهَ. 11پَ اَیَر وِرَ وِ کار بُردِنِ مال ناحقِ ایی دنیا اَمانتدار نَواید چه کِسیَ که او گنجِ حقیقی نِه بییَه وِ دَسِ شما؟ 12وَ اَیَر شما اَمانتدار مال یکی دیَر نَواید چه کِسیَ كِه مال خُیِتو نِه بَیَه وِتُو؟ 13هوچ غلامی وِ دوتا ارواب نِمِتُونه خدمت کُنه وِرِ ایکه یا اَ اولی بَئِش میا وَ دومی نِه دوس دارَه، یا سَرسپردَه اولیُ دوّمی نِه خار مُکُنَه. شما نَمِتُونید هَم بَنِّۀ خدا باید وُ هَم بَنِّۀ پول.»
14علما فِرقِۀ فَریسی که پول دوس بییِن، هَمی که ایی حرفانِ شِنُفتِن عیسی نِه وِ مَسقِرَ گِرِفتِن. 15عیسی وِاونا گُفت: «شما کِسایی هِسید كِه خُیِتو نِه وِ مردِم، صالح نِشُو میید امّا خدا اَ دِلِتُو خَوَر دارَه، وِرِ ایکه او چیائی که دِ چِشِ مَردِم قیمَتیَ دِ وَرِ خدا بی ارزِشَ.
16دورَه تُورات وُ انبیا، تا زِمانِ یحیی بییِن، اَ اوسِه وِ بَعد خَوَرِ خُوشِ پادشایی خدا اعلام شیَ، هَر کهَ تَقَلا مُکُنَه وِ زور را خیِشِ وِ مینِش وا کُنَه. 17وا ایی حال، آسُوتَرَ كِه آسمُونُو زِمی اَ بین بَرَ تا ایکه نقطهای اَ تُورات بِفتَه.
18هَر مردی كِه زَن خُیِشِه طِلاق بَیهَ وُ زَنِ دیَری بَخوا زِنا کِردَه وَ هَر كَه زَنی طِلاق گِرِفتَه نهِ بیرَه، زِنا مُکُنَه.
توانگر وَ ایلعازرِ فقیر
19مرد پولداری بی، كِه همیشَه لِواسِ گِرُو قِیمَتی وِ رَنگِ ارغوان وُ كَتُونِ نَرم،وَرِش مِکِرد، وُ هَر رو وا جَشنا چِشگیر خُوشگُذَرُونی مِکِرد. 20فقیری وِ نام ایلعازَر بی،کِه اونِه دَم دِیرا خُونَه او پولدار مِیزاشتِن،که تمامِ بَدَنِش زخمدار بی. 21ایلعازَر آرزو داشت وا خُردَ نُونایی که اَ سُفرۀ او پولدار مِمُن شِکَمِ خُیِشِه سیر کُنَه،حتی سِیا ئَم میامانُ زَخماشِ مِلیسین. 22دَسِ آخِر، او فقیر مُرد؛ وَ فرشتَه آ اونِه بُردِن وَرِ ابراهیم. او مرد پولدار هَم مُرد وَ هَشتِنِش دِ قَبر. 23دِ دنیای مُردَه آ مینِ عِذاوِ اونچو سِیلی کِرد وِ بالا وُ اَ دور ابراهیمِ نِه دیی که ایلعازَر کنارِشَ. 24پَ وا دُنگِ بُلن حَوار کِرد: ”ای بواَم ابراهیم، وِم رَحم کُ. ایلعازرِ نِه بَفِرس تا تُکِ کَلِّکِشِ وا اُو تَر کُنَه وُ زوُنِمِه حُنِک کُنه وِرِ ایکه مَه دِ مینِ ایی شعله آ آتِش عِذاو مِکَشِم.“ 25امّا ابراهیم گُفت: ”رولَه، وِ یاد بیار وَختی که زِنَه بییی تمام چیا خو نَصیوِ تو بی وُ تمام چیا بَد نَصیوِ ایلعازَر بی. اما ایسِه او دِ اینچو راحتَ وُ تو دِ عِذاوی. 26امّا غیرِ ایی، دَرَّه عمیقی مابِینِ اِیما وُ شمانَ. هَر که اَ اینچو باخا بیا وَرِ شما، نِمِتُونه اَ او رَد با وُ كِسی هَم نِمِتُونَه اَ اونچو وَرِ اِیما بیا.“ 27او پولدار گُفت: ”پَ ای بُواَ التِماسِت مُکُنِم، ایلعازَرِ بَفِرسی وِ خُونَه بُواَم، 28كِه مَه دِ اونچو پینش تا بِرار دارِم، تا اونان خَوَر کُنه،نَکنَه اونا هَم بیان وِ ایی مَحَلِ عِذاو.“ 29امّا ابراهیم گُفت: ”اونا موسی وُ انبیا نِه دارَن؛ پَ وِ اونا گوش بییَن.“ 30او مرد جواو دَا: ”نَه، ای بُواَ اَیَر كِسی اَ مُردَهآ بَرَ وَرِشو توبه مُکُنَن.“ 31ابراهیم دِ جُواو گُفت: ”اَیَر وِ موسی وُ انبیا گوش نییَن حتّی اَیَر كِسیَم بَعدِ مُردَن زِنَه بَشَه هَم باور نِمُکُنَن.“»
Currently Selected:
لوقا 16: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
