لوقا 15
15
مَثَلِ گوسوَنِ گُم شیَ
1خَراجگیرا وُ گُنا کارا هَمَه شو جَمع مِشوئِن وَرِ عیسی تا صُوَتاشِ بَشنوئَن. 2علمای فِرقِۀ فَریسی وُ مَعَلِما تورات غُرِلُند مِکِردِن وُ مِگُفتن: «ایی مرد، گُنا کارا نِه قوول مُکنه وُ واشُو هَمسُفرَه مِشهَ!»
3او وَخت عیسی ایی مَثَلِنِ وِرَشو اُوُرد: 4«کامیناتو صدتا گوسوَن داشتَه وا وُ وَختی که یكی ازِشو گُم با او نَوَد وُ نُه تا گوسوَنِ دیَرِ نِه دِ صَرا وِل نِمُکُنهَ تا وِرَ جُسَن او که گُم شیَ بَرَ تا پیاش کُنَه؟ 5وُ هَمی که گوسوَن گُم شیَ نِه پیا كِرد وا شادی مَلَش رو شونِش، 6وُ وَختی که میا وِ خونَه هَمَه رَفیقا وُ همسایه آشِ حِنا مُکُنه وُ مُوئَه: ”وا مَه شادی کُنید گوسوَنِ گُم شیَ مِه پیا کِردَم.“ 7مَه وِ شما مُوئِم، كِه همیجور یِه گُناكار كِه توبَه مُکُنَه جَشن وُ شادی بزرگتَری دِ آسِمُو وِ پا مِشَه تا وِرَ نود وُ نُه تا آیِمِ صالح كِه نیازی وِ توبه نَرَن.
مَثَلِ سکۀ گُم شیَ
8وُ کامی زَنیَ که ده تا سکَه نقرَه داشتَ وا اَیَر یكیشِه گُم کُنه چراغی روشن نِمُکُنهَ وُ گُلَ گُلَ خونَه نِه جارو نِمُکُنهَ وُ خو نِمجورَه تا پیاش کُنَه؟ 9وُ وَختی که پیاش كِرد همه رَفیقا وُ همسایه آش حِنا مُکنه وُ مُوئَه: ”وام شادی کنید سکَه ایی که گُم کِردَ ویم پیا كِردَم.“ 10مَه وِ شما مُوئِم، كِه همیجور وِرَ یِه گُناه كار كِه توبَه مُکُنَه دِ مینِ فرشتَه آ خدا، جَشن وُ شادی بَر پا مِشهَ.»
مَثَلِ پسر گُم شیَ
11او وَخت عیسی گُفت: «مردی دوتا پسر داشت. 12یِه رو پسر كوچوکتَر وِ بُواَش گُفت: ”بُواَ قسمتی نِه که اَ دارایی تو وِ مَه مِرَسَه ایسِه بَش وِم.“ پَ بُواَ داراییشِه ما بِینِ او دوتا قِس كِرد. 13بَعدِ مُدَتی پسر كوچوکتَر همَه چی نِه وُرداشتُ راییی سرزمینی دور شُد، وُ ثروتِ خُیِشِه اونچو وا عیاشی وِ باد دا. 14وُ وَختی که هَر چی داشت، خرج كِرد، قَحطی سختی اِفتا دِ او سَرزِمی وُ سَخت اِفتا وِ دَستَنگی. 15پَ رَفتُ کارگرِ یكی اَ مَردم او سَرزِمی شد. او مرد اونِ نِه فِرسا وِ مزرعَه خُیِش تا وِ خوکا غِذا بَیَه. 16پسر آرزو داشت شِکَمِشِ وا خوراکِ خوكا سیر کُنَه امّا هوشکه وِش چیی نِمِدا. 17آخِر سَر وِ خیِش آما وُ گُفت ”خیلیَ کارگرا بواَم غِذا وِ حد کافی وَ حتی اضافیَم دارَن امّا مَه دِ اینچو نَزیکَ اَ گُسنِهای بَمیرِم. 18پَ وُرمیسِمُ مِرِم وَرِ بُواَمُ وِش مُوئِم: بُواَ مَه دِ حقِ خدا وُ دِ حقِ تو گُنا کرِدَم. 19مَه دیَه قابل ای نیسِم كِه پسر تو خُنَه بَشِم. وا مَه مِثِ یكی اَ ایی کارگرات رفتار کُ.“
20پَ وُریسا وَ رایی خُونِۀ بُواَش شد. هَنی خیلی تا خُونَه مُنه وی كِه بُواَش اونِه اَ دور دیی، دلِش وِ حالِش سُخت، دُوئِس رفت نوآش،گِرِفتش دِ بَغَل وُ اونِه ماچ کِرد. 21پسر گُفت: ”بُواَ مَه دِ حقِ خدا وُ دِ حقِ تو گُنا کرِدَم. دیَه قابل ایی نیسِم كِه پسر تو خُنهَ بَشِم.“ 22امّا بُواَ وِ غُلاماش گُفت: ”زو بَرید. قَبا خوئی بیارید وُ وَرِش کنید انگشتری دِ کَلِّکِش وُ اُرِسی پاش کنید. 23او گوسالَه پروارِ نِه بیارید وُ سر بَوُرید تا بَخوریم وُ جَشن بیریم، 24وِرِ ایکه ایی پسر مَه مُردَ وی، ایسِه هَنی زِنَه شیَ گُم شیَ وی الانَ پیا شیَ.“ پَ شروع کِردَن وِ جَشن وُ شادی .
25وَ امّا پسر بزرگَ سَرِ زِمی بی وُ وَختی که وُریَشت هَمی که وِ خُونَه نَزیک شد، رِنگِ ساز وُ دُهُل وُ رَقصِه شنُفت. 26یكی اَ نوكرا نِه حِنا كِرد وُ پُرسی: ”جریان چیَه؟“ 27نوكر وِش گُفت: ”بِرارِت آمییَ وُ بُواَت وِرِ ایی که او نِه هَنی سالم و سِلامت پیا کِردَ او گوسالَه پروارِ نِه وِرَش سَر بُری.“ 28امّا پسر بزرگَ عَصبانی شُد وُ نَخواس بیا مینِ خُونَه. بُواَش آما دَر وُ التماسِش کِرد. 29امّا او دِ جُواو بُواَش گُفت: ”سِیل کُ مَه دِ همه ایی سالا مِثِ غُلام وِت خِدمَت کِردَم وُ هوچ دستور تو نِه نَناختِم رو زِمی، امّا وا ایی حال تو هوچ وَخت یِه بزغاله اییَم وِ مَه ندایی تا وا رَفیقام جَشن بِیریم. 30امّا ایسِه كِه ایی پسرت وُریشتَه بَعدِ ایکه تمام ثروتِ تو نِه وا لکاتِه آ وِ باد دا،وِرَش گوسالَه پروارِ نِه سَر بُرییِیی.“ 31بُواَش وِش گُفت: ”رولَه، تو همیشَه وا مَنی وُ هَر چی مَه دارِم وِرَ تونَ. 32امّا ایسِه دُرُسِش اینَ که جَشن بِیریم وُ شادی کُنیم وِرِ ایکه ایی بِرارِت مُردَ وی، وَ الانَ زِنیَه گُم شیَ ویُ ، پیا شیَ !“»
Currently Selected:
لوقا 15: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
