لوقا 14
14
شفا دِ روزِ شبات
1دِ یکی اَ روزا شبات، که عیسی وِرَ غِذا خوردَن رفتَ وی وِ خُونَه یکی اَ رهبرا فِرقَه فَریسی، اونایی که اونچو بییِن اونِه خُو زیر نَظَر داشتِن. 2مَردی رو وِ روش بی که بَدَنِش اُو اُوُردَ وی. 3عیسی اَ فقها وُ علمای فَریسی پُرسی: «مطابق شریعت دِ روزِ شبات شفا دیَن جایزَ یا نَه؟» 4امّا اونا ساکِت مُنِن پَ عیسی او مَردِنِه گِرِفتُ شَفاش دا وُ مرخَصِش کِرد. 5او وَخت رو كِرد وِاونا وُ گُفت: «کامینا تُو اَیَر پسر یا گِوُش دِ روزِ شبات بِفتَه دِ مینِ چاه، فُورن نِمیارَش دَر؟» 6اونا جُواوی وِرَ ایی سوال نَشتَن.
مَثَلِ جَشن عروسی
7وَختی که عیسی دیی، مِهمونا چجور بالا مجلسِ نِه وِرَ خُیِشُو میرَن ایی مَثَلِنِ وِرَشو گُفت: 8«وَختی که یکی، تو نِه وِ یِه جَشن عروسی دعوت مُکُنهَ دِ بالا مجلس نَنیش، وِرِ ایکه شاید یکی سَرشناستَر اَ تو دعوت شیَ وا ، 9او وَخت او که شما دوتا نِه دعوت کِردَ مییا وِت مُوئَه: ”جاتِه بَ وِ ایی آقا.“ او وَخت خجالت زیهَ مِری مِنیشی دامونِ مجلس. 10اما، وَختی که تونِه مِهمو مُکُنَن بَرو بَنیش دامونِ مجلس، تا,وَختی او که تونِ دعوت کِردَ ،آما وِت بُوئَه: ”رَفیقِم، بَفرما بَنیش او بالا.“ اوسِه وَرِ باقی مِهمونا که نِشِسَن سَر سُفرَه سَربُلَن مِشی. 11وِرِ ایکه هَر کهَ خُیِشِه بزرگ کُنه حقیر مِشَه وَ هَر کهَ خُیِشِه فروتَن کُنَه سَربُلَن مِشهَ.»
12او وَخت عیسی وِ صاحوِ مجلس گُفت: «وَختی که مِهمُونی ناهار یا شام میی رَفیقا وُبِرارا وُ قُومُوخویشا وَ یا همسایِه آ ثروتمندِتِ دعوت نَکُ ،نَکُنَه اونا هَم دِ عوضِش اَزِت دعوت کُنَن وَ هَموجور عَوَضِ خُیِتِه بِیری؛ 13پَ وَختی که مِهمُونی مِیی بیچارَفقیرا وُ فلجا وُ شَلا وَ كورا نِه دعوت کُ، 14که تو بَرِکَت مِیری ؛ وِرِ ایکه اونا هوچ چیی وِرَ عوضِ دیَه وِتو نَرَن وُ دِ روزِ قیامت که آیِما صالح زِنَه مِشَن عَوَضِ خُیِتِه مِیری.»
مَثَلِ مِهمُونی بزرگ
15یكی اَ مِهمونا که واردِ عیسی هَمسُفرَه وی، اینِنِ شِنُفتُ وِ عیسی گُفت: «خوشالِ اونی که دِ مِهمُونی پادشایی خدا نُو بَخورهَ.» 16امّا عیسی دِ جُواو گُفت: «مردی مِهمُونیِ بزرگی ترتیب دا وَ عدِه ی زیادی نِه دعوت کِرد. 17اوسِه وَختِ شام خادِمِشِ فِرسا تا وِ مهمونا بُوئَه، ”بیاید که همَه چی حاضرَ.“ 18امّا اونا همه شو یِه عُذر وُ بونِه ای اُوُردِن. یکی گُفت: ”زِمینی خَرییَمُ باید بَرِم اونِ نِه بُویینِم. خواهش مُکُنِم عُذرِمِه قَوول کُ.“ 19یکی دیَر گُفت: ”پینش جُفت گِوُ خَرییَم وَ همی الانَ مِرِم بُویینِم اونا چِطورَن. خواهش مُکُنِم عُذرِمِه قَوول کُ.“ 20وُ یکی هَنی گُفت: ”مَه وِ تازگی زَ خواسِمَ ،وِرَ ای نِمِتونِم بیام.“ 21وَختی که خادِم وُریَشت وُ ایی چیا نِه رَسُن وِ اروابِش، اَرواب خونَه عصبانی شُد وُ وِ خادم حُکم کِرد: ”زو بَرو وِ کوچه آ وُ بازارِ شَر وُ بیچارَفقیرا وُ اِفلیجا وُ كورا وُ شَلانِه بیار.“ 22خادِم گفُت: ”ارواب، دستورت اَنجام شُد امّا هَنیَم جا هِسا.“ 23پَ ارواب وِ خادِمش گُفت: ”بَرو وِ شاراها وَ کورَه راآ وُ بیرون اَ شَر،اِصرار کُ تا تمام مردِم، بیان وِ مِهمونیُ خونَه م پُر با. 24وِرِ ایکه وِ شما مُوئِم كِه هوچ کام اَ اونایی که دعوت کِردَه ویم طعم خُوراکا مَنِه نِمِچَشَن.“»
بهای پیرُوی مسیح
25جِماعتِ زیادی واردِ عیسی بی. او رو كِرد وِاونا وُ گُفت: 26«اَیَر هَر که وَرِ مَه بیا امّا اَ بُواِ وُ نِنَهُ زَنُ بَچَه، بِرارُ خُوار وُ حتی اَ جُونِ خُیِش دَس نَشورَه، نِمِتُنه شایِردِ مَه با. 27اونی که صلیب خُیِشِه وُرنَرَه وُ دِ دُمِ مَه نیا، نِمِتُونه شایِردِ مَه با.
28کامیناتو ماخا بُرجی بَسازَه، وَ اوّل نِمِنیشَه تا مخارجِ اونِ نِه بَرآوُرد کُنَه تا بُویینَه آیا اینقد دارَه که اونِه خِلاص کُنَه یا نَه؟ 29وِرِ ایکه اَیَر پِی اونِ بَلَ امّا دِ خِلاص کِردَنش وا بَمُونَه، او وَخت هَر کهَ بُویینهَ دَسِش مِنازَه، 30وُ مُوئَه: ”ایی مرد دَس وِ کارِ ساختَنِ بنائی بی امّا نَتُونِس خِلاصِش کُنَه!“
31یا کامی پادشاییَ كِه وِ جنگِ پادشا دیَری بَرَ بی ایکه اوّل بَنیشَه وُ فکر کُنَه كِه وا ده هزارتا سَرواز مِتُونهَ وا یِه لشکرِ بیست هزار نفری جنگ کُنَه؟ 32وَ اَیَر بُویینَه که نِمِتُونه واش رو وِ رو با، او خیلی زوتَر اَ ایکه قُشونِ دُشمن سَر بَرَسَه، نَمایندهای مِفِرسهَ تا رایی وِرَ صُلح پیا کُنَه.
33پَ اَ مینِ شما هَم هَر کامِتُو تا اَ تمام او چیی که دارَه، دَس وُرنَرَ نِمِتُونه شایِردِ مَه با.»
34«نَمَک چی خوییَ امّا اَیَر ایی نَمَک، خاصیتِ خُیِشِه اَ دَس بَیَه چِجور مِشهَ اونِه هَنی شور کِرد؟ 35دیَه نَه وِ کارِ زِمی مییا، نَه وِ دَردِ کود مُخورهَ بَلکه مِنازَنِش دور. هَر که گوشِ شنوا دارَه بَشنُوئَهَ.»
Currently Selected:
لوقا 14: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
