لوقا 11
11
چِجور دعا کنیم
1یِه رو عیسی دِ جایی دعا مِکِرد. وَختی که دعاش خِلاص شُد، یكی اَ شایِرداش وِش گُفت: «آقا هَموجور که یحیی دعاکِردَنِ وِ شایِرداش تَعلیم دا تونَم دعاکِردَنِ وِ ایما تَعلیم بَ.» 2عیسی وِاونا گُفت: «هر وَخت دعا مُکُنید بُویید:
”ای بُوآ
اسم تو مقدس با؛
پادشایی تو بیایَ.
3نونِ روزانِۀ اِیمانِ هَر رو وِمُو بَ.
4وُ گُناآ اِیمانِ بَوَخش،
اِیمانَم تَمامِ قَرضدارا خُیِمونِ مِوَخشیم.
وُ اِیمان دِ اِمتِحان قِرار نَ.“»
5اوسه وِشو گُفت: «کیَ اَ شما که رِفیقی داشتَه وا وُ نِصفهشُو بَرَ وَرِش وُ وِش بُوئَه: ”ای رِفیق، سه تا نُو وِم قَرض بَ، 6یكی اَ رِفیقام اَ سفر رَسِسَ وُ آمییَ خونَهم، چیی نَرَم بَلِم وَرِش،“ 7وُ او اَ مینِ خُونَه وِش جُواو بَیَه: ”دَس اَ سَرِم وُردار! دَر قُفلَ وُ مَنو بَچاآم دِ مینِ رختِخُوایم وُ نِمِتونم وُریسِم چیی وِت بَیِم.“ 8وِ شما مُوئِم، كِه حتی اَیَر وِ خاطِرِ رِفاقَت وُرنَسَه که چیی وِش بَیهَ ، وِ خاطر جِسارَت وُ سِماجَتِ او وُرمیسَه وُ هَر چیی نیاز رِفیقشَ مِیَه وِش.
9پَ وِ شما مُوئِم بَخوایید، كِه وِ شما داده مِشَه بَجورید که پیا مُکنید بَکوئید که دَر وِ روتو وا مِشَه. 10وِرِ ایکه هَر کهَ باخا وِش دادَه مِشهَ وُ هَر که بَجورَه، پیا مُکُنَه وَ هَر کهَ بَکوئَه دَر وِ روش وا مِشَه. 11کامی اَ شما، بُواِییَ كِه وَختی پسرش ازِش ماییی بَخوا وِ جا ماییی، ماری بَیَه وِش؟ 12یا اَیَر تُرمُغ بَخوا عَقروی بَیه وِش؟ 13پَ اَیَر شما وا ایکه بَدید مینید باید چیا خویی بَئید وِ بَچاآتو چَنی بیشتَر بُواِ آسِمُونی شما، روحالقدُسِ نِه وِ اونایی كِه ازِش بَخوان عطا مُکُنَه.»
عیسی وَ بَعَلزَبول
14عیسی یِه دیوِ لالی نِه اَ یکی مِکرد دَر. هَمی که دیو رَفت دَر، مردِ لال شروع کِرد وِ صُوَت کِردَن وُ مردِم حیروشیَ وین. 15اما عده ایی گُفتِن: «او وِ کمکِ بَعَلزَبول که رئیس دیواَ، دیوانِ مُکُنَه دَر.» 16دِ حالی که عده ایی دیَرم وِرَ امتِحان کِردَنِ عیسی،وِش اصرار مِکِردِن وُ یِه نِشونِۀ آسِمُونی اَزِش ماخاسِن. 17امّا عیسی که فکراشونِ مینِس وِ اونا گُفت: «هَر مملکتی که وِ ضد خُیِش وُریسَه، نابود مِشَه وَ هَر خونِهای كِه وِ ضد خُیِش وُریسَه، مِرُمَه. 18همیجورَم اَیَر شِیطُو وِ ضد خُیِش وُریسَه، حکومتش چِجور پایدار مِمُونَه؟ وِرِ ایکه شما اِدِعا مُکُنید كِه مَه وِ کمکِ بَعَلزَبول دیوا نِه مُکُنِم دَر.» 19اَیَر مَه وِ کمک بَعلزَبول دیوا نهِ مُکُنِم دَر، شایِردا شما وِ کمکِ چه کِسی اونانِ مُکُنن دَر؟ پَ اونا وِتو داوَری مُکُنَن. 20امّا اَیَر مَه وا کَلِّک خدا، دیوا نِه مُکُنِم دَر، پَ پادشایی خدا آمیَ وِ روتو. 21وَختی که مرد زورمندی كِه کامل مُسَلَح با اَ کاخِ خُیِش پاسِبونی مُکُنَه مالُ مِنالِش دِ اَمانَ. 22امّا وَختی که یکی زوردارتَر اَ او وِش حمله کُنَه وَ وِش غالو با سِلاحی نِه که او مرد وِش دلخُوش کِردَ ازِش مِسُونَه وُ غَنیمَتِشِ قِس مُکُنَه. 23هَر که وا مَه نَوا وِ ضِد مَنَه وَ هَر که وا مَه جَمع نَکُنه اَ هم مِتوچَ.
24وَختی که روحِ بد اَ یکی میا دَر، وِ جایا خُشک وُ بی اُو وُ عَلف مِرَ تا جایی وِرَ فِراغت پیا کُنَه. امّا وَختی که جایی پیا نِمُکُنهَ وا خُیِش مُوئَه: وُرمیَردِم وِ خونهای كِه اَزِش آمیَم دَر. 25پَ وَختی که مِرَسَه اونچو وُ خُونَه نِه جارو کِردَه وُ مُرتب مُوینَه، 26مِرَ وُ هفت تا روحِ بدتَر اَ خُیَشَم مییارَه، اوسِه همه شو میان دِ مین خونَه وُ دِ اونچو اُتراق مُکُنَنُ آخِر سَر، حال و روزِ او شخص بدتَر اَ اَوَلِش مِشَه.
27دِ حالیکه عیسی ایی حرفانِ مِزا، زَنی اَ مینِ جمعیت وا صدایی بُلن گُفت: «خوش وِ حال او زَنی كِه تونِه وِ دنیا اُوُرد وَ وِتو شیر دا.» 28امّا عیسی دِ جُوآو گُفت: «نَه، برعَکس!خوش وِ حال اونایی که كلامِ خدا نِه مِشنوئَن وَ اونِ نِه وِ جا میارَن.»
نِشُونَه یونس نبی
29وَختی که وِ شُمارِ جمعیت اضافَه مِشُد عیسی گُفت: ایی نسل، چِه نسلِ بَدیَ نِشونه ای ماخا امّا نِشونه ای وِاونا دادَه نِمِشهَ مَیَر نِشُونیِ یونس نَبی. 30وِرِ ایکه هَموجور كِه یونس نَبی وِرَ مردِمِ نینوا نِشونِه ای بی، پسر انسان هَم نِشونِه ای مِشهَ وِرَ مردِم ایی نسل. 31ملكۀ جِنوب هَم دِ روزِ داوری وا ایی نسل زِنَه مِشهَ وَ مَحکومِشو مُکُنَه وِرِ ایکه او اَ او سَرِ دنیا آما تا حكمتِ سُلیمانِ بَشنُوئَه، دِ حالی که کِسی اینچُونَ اَ سلیمانَم بزرگتَر. 32مردِمِ نینوا دِ روزِ داوری وا ایی نسل زِنَه مِشَن مَحکومِشُو مُکُنَن وِرِ ایکه مردِمِ نینوا وِ خاطر پیغُومِ یونس توبَه کِردَن، اما ایسِه کِسی بزرگتَر اَ یونس اینچونَ.
چِش چراغِ بَدَنَ
33هوشکَه چراغی نِه روشن نِمُکُنهَ تا اونِ نِه قایِم کُنَه یا بَلَش دِ زیر سَوَدی بلکه چراغ نِه رو چراغدُونی مَلَ تا هَر که میا مین اتاق روشنایی نِه بُویینَه. 34چِشِ تو، چراغِ بدنِتَ. اَیَر چِشِت سالم با، تمام وجودت پر مِشهَ اَ روشنایی. اما وَختی که چِشات فاسد بان، تمام وجودت پر مِشهَ اَ تاریکی. 35پَ حواسِت با، نَکنه روشنایی كِه دِ تونَ تاریكی با. 36اَیَر تَمام وجودت پُر با اَ روشنایی وَ هوچ جایی ازِش دِ تاریكی نَوا تمام وجودِت اَ روشنایی مِدُرُنجهَ. مِثِ وَختی که نور چِراغ مِفتَه روت وُ وِت روشنایی مِیَه.
سَرزَنِش رهبران مذهبی وُ فقها
37عیسی هَنی داشت صُوَت مِکرد که یكی اَ علمای فرقَه فَریسی اونِه وِرَ خُوردَن غِذا دعوت کِرد. پَ عیسی رَفت وِ خُونَه او وُ نِشِس سَرِ سُفرَه. 38امّا وَختی فَریسی دیی که عیسی دَساشِ قبلِ خوردِن غِذا نَشُشت، تعجب کِرد 39اوسِه عیسی خداوند وِش گُفت: «شما فَریسیا، رو پیاله وُ دُوریانِ پاک مُکُنید دِ صورتیکِه باطِنِتُو پر شیَ اَ طمع وُ شِرارَت. 40ای نادونا مَیَر اونِی که ظاهرِ آفَریدَه باطِنِه هَم نِیافَریده؟ 41پَ اَ هَرچی که داخِلِ ظَرفاَ صَدَقَه بَئید که همَه چی وِرَتو پاک بَشهَ.»
42«وای و حال شما ای فریسیا! شما اَ نعنا وُ پونهَ وُ همَه جور سبزی دهیِک میئید امّا عدالت وُ محبّت خدا نِه نادیده مِیرید. اینانِ باید وِ جا میاُوُردیت بی ایکه اونانِ نادیدَه بِیرید.» 43«وای وِ حال شما ای فریسیا! وِرِ ایکه دوس دارید بَنیشید دِ بهترین جای کنیسَه، وَ دِ کوچاآ وُ بازار مردِم، وِتُو سِلام کُنَن. 44وای وِ حال شما! شما مِث قبرا بی نِشُونی هِسید كِه مردِم نَدونِسَه روشو را مِرَن.»
45یكی اَ فقها دِ جُواو عیسی گُفت: «ای استاد تو وا ایی صُوَتات وِ اِیمانَم توهین مُکُنی.» 46عیسی جُواو دا: «وای وِ شما ای فُقها، وِرِ ایکه بارا سنگینِ مَلید رو شونَه مردِم امّا خُیِتو حاضر نیسید حتی کَلِّکِتونِ وِرَ کمک بَلید وِ او بار. 47وای وِ شما كِه وِرَ انبیایی كِه وِ دَسِ اجدادِتُو كُشتَه شیَن مَقوِرَه مِسازید! 48پَ ایجوری شما کارا اونانِ تصدیق مُکنید اونا انبیانِ کُشتَن وُ شما مَقوِرَشُونِه مِسازید. 49وِرِ اینَ كِه حكمتِ خدا فرمایِش مُکُنَه: ”مَه وِرَشو پیغمَرا وُ رسولانِ مِفِرسِم امّا عده ایی نِه مُکُشَن وُ عده ایی نِه عِذاو میَن،“ 50تا، خِون تمام پیغمَرایی که اَ اولِ جهان تا ایسه رِختِسَه، دِ گَردِن ایی نسل با، 51اَ خِون هابیل گِرِفته تا خِون زكریایِ نَبی كِه مابِینِ مذبَح وُ محراب کُشتَه شُد. بَله،وِ شما مُوئِم کِه، ایی نسل وِرَ تمام اینا حِساو پَس میَه. 52وای وِ شما ای فقها! وِرِ ایکه شما كِلید دَرِ شناختِ حَقیقَتِ نِه واگیر کِردِید،خُیِتو نِمرید داخل وُ جِلو اوناییَم كِه ماخا بَرَن داخل مِیرید.»
53وَختی که عیسی رَفت دَر، معلما تورات وُ فریسیا عیسی نِه سخت هَشتِن دِ تَنگنا وُ اونِ تحریک کِردَن که دِبارَه خیلی چیا صُوَت کُنه، 54وُ دِ كِرِش بییِن كِه او نِه وا صُوَتاش بَنازَن دِ دام.
Currently Selected:
لوقا 11: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
