انجیل یوحنا 9
9
شَفایِ کور مادَرزاد
1عیسی دِ را که مِرفت کورِ مادرزادینِه دیی. 2شایِرداش اَ او پُرسیِین: «استاد نتیجَه گُناِ کیَه که ایی مرد کور وِ دنیا آمییَ؟ گُنا خُیِشَه یا نِنَه وُ بُواَش؟» 3عیسی جُواو دا: «نه اَ خُیِشَه، وُ نَه اَ نِنَه وُ بواَش؛ بَلکه ایجور شد تا کارای خدا دِ او دیار با. 4تا روزَ باید کارا او که مَنِه فِرسیَ وِ اَنجام بَرَسُنیم؛ شُو نَزیک مِشهَ که دِ او کِسی نمِتُونَه کار کُنَه. 5تا زِمانی که دِ جَهانِم، نور جَهانِم» 6اینِنِ گُفت وُ تُفکَه رو زِمی اِناختُ گِل دُرِس کِرد وُ اونِ مالی رو چِشا او مرد . 7وُ وِش گُفت: «بَرو وَ خُیِتِ دِ حوض سْیلوآم (هَمو حوضی که وِش فِرسیَه موئَن) بَشُور.» پَ او مرد وِ اونچو رَفت وُ چِشاشِ شُشت، اَ اونچو بینا وُریَشت.
8همسایه آ وُ کِسایی که اَ قبل اون دِ حال گدایی دییَ وین پُرسیِین: «مَیَر ای هَمونی نیسا که مِنیشِس وُ گدایی مِکِرد؟» 9بعضیا گُفتِن: «همونَ» بعضیا گُفتِن: «شبیشَه.» امّا او خُیِش وا تاکید مِگُفت: «مَه هَمونِم.» 10پَ اَ او پُرسیِین: «چِجور چِشات وا شد؟» 11جُواو دا: «مردی عیسی نام گِلی دُرِس کِرد وُ مالُی رو چِشام وُ گُفت ”وِ حوض سْیلوآم بَرو و بَشُورِش.“ پَ رَفتِم شُشتِم وُ بینا شُوئِم.» 12اَ او پُرسیِین: «او کُجانَ؟» جُواو دا: «نِمِنِم.»
13اوسهِ او پیانِ که قبل تِر کور بی، وَرِ علمای فِرقَه فَریسی اُوُردِن. 14او روز که عیسی گِل نِه دُرِس کِردَه وی وُ چِشا اون وا کِردَه وی، شَبّات بی. 15اوسِه فَریسیا هم اَ او مرد پرس و جو کِردِن که چِجور بیناییشِ وِدَس اُوُردَه. او جُواو دا: «رو چِشام گِل مالی وُ شُشتِم وُ ایسِه موئینِم.» 16اوسِه بعضی اَ فَریسیا گُفتِن: «او پیا اَ طرف خدا نیسا وِرِ ایکه شَبّاتِ نِه نیا نِمَرَه.» اما بعضیا دیَه گُفتِن: «چطُور شخصی گُنا کار مِتونهَ ایجور نِشونَه وُ مُعجِزِه ایی کُنَه؟» وُ مابینِشو دُو دَسِه ایی اِفتا. 17پَ یِه دفعه دیَر اَ او پُرسیِین: «اَ اونچِو که او چشا تُونِه وا کِردَه تو خُیِت دِ بارَه او چی مُوئی؟» او مرد جُواو دا: «پِیغَمَریَ»
18امّا سَران یهودیا هَنی باور نَشتَن که او کور بیهَ وُ بینا شیَ تا ایکه نِنَه وُ بواَشِه خواسِن. 19وُ اَ اونا پُرسیِین: «آیا ایی پسر شمانَه، هَمو که مُوئید کور وِ دنیا آمیی وی؟ پَ چجوری ایسِه مِتُونهَ بُویینهَ؟» 20اونا جُواو دان: «مینیم که پسر ایمانَ وُ مینیم که کور وِ دنیا آمیَ وی. 21امّا اینِنِ که چجور بینا شیَ یا چه کِسی چِشا اونِ وا کِردهَ اِیما نِمِنیم. اَ خُیِش بَپرسید. او بالغَ وُ خُیِش دِ بارَه خُیِش مِتونهَ بُوئَه.» 22نِنَه بواَش ایی ایجور گُفتِن وِرِ ایی که اَ یهودیا مِترسِسِن. وِرِ ایکه یهودیا قبل تِر توافُق کِردَ وین که هرکی اعتراف کُنَه عیسی هَمو مسیحَ اون اَ کنیسه بنازَن دَر. 23وِرِ هَمی نِنَه وُ بواَش گُفتن «او بالغَ؛ اَ خُیِش بَپرسید.»
24پَ وِرَ بار دُوم او مردِنِ که قبل تِر کور بی، هِنا کِردِنُ وِش گُفتن: «جلالِ نِه وِ خدا بَ! ایما مینیم که او مردِ گُنا کاریَ.» 25جُواو دا: «گُنا کار یا گُنا کار نَویِنشِ نِمِنِم. اَما فقط یه چی مینِم ایکه کور بییِم، وُ ایسِه بینا شییِمَ.» 26پُرسیِین: «وا تو چه کار کِرد؟ چِجور چِشاتِه وا کِرد؟» 27جُواو دا: «مَه که وِ شما گُفتِم امّا شما گوش نِمیئید چُنَ ماخایید هَنی بَشنُویید؟ مَیَر شما هم ماخایید شایِردش بَشید؟» 28اونا دِشنامِش دان گُفتن: «تو خُیِت شایِرد اونی! ایما شایِرد موساییم. 29ایما مینیم خدا وا موسی صُوَت کِردَه امّا ایی شخصِ، نِمِینیم اَ کُجانَه.» 30او مرد دِ جُواوشو گُفت: «عجیبَه! نِمِینید اَ کُجانَ وا ایی که او چِشا مَنه وا کِردَه. 31ایما مینیم که خدا دعای گُنا کارانِ نِمِشنُوئَه، امّا اَیَر کِسی خدا پَرَس با وُ خواسِ اونِه وِجا بیارَه، خدا دعا اون مِشنُوءَ. 32اَ شرُوعِ دنیا تا ایسِه شِنُفتهَ نَشیَ که کِسی چِشا کورِ مادرزادینِه وا کِردَ وا. 33اَیَر ایی مرد اَ طرف خدا نَوی، کاری اَ او بَر نِمیاما.» 34اونا دِ جُواو گُفتن: «تو که سر تا پا دِ گُنا زادَ شیی،ایسِه وِ ایمانَم دَرس میی؟» پَ اوُنِه اِناختن دَر.
35هَمی که عیسی شِنُفت که او مردنِ اِناختَن دَر، اونِه پیا کِرد وُ اَ او پرسی: «آیا وِ پسر انسان ایمان داری؟» 36او مرد جُواو دا: «ای آقا بُ کیهَ تا وِ او ایمان بیارِم.» 37عیسی وِ او گُفت: «تو اونِه دییی! هَمونَ که هَمی الانَ وا تو صُوَت مُکُنهَ.» 38گُفت: «ای آقا ایمان دارِم.» وُ دِ بِراوَرش رو هَشت وِ زِمی .
39عیسی گُفت: «مَه وِرِ داوری وِ ایی دنیا آمییَم تا کورا بینا وُ بینایا کور بَشَن.» 40بعضی اَ فَریسیا که وا او بییِن، وَختی اینِنِ شِنُفتِن پُرسیِین: «یعنی ایمانَم کوریم؟» 41عیسی وِشو گُفت: «اَیَر کور بیید گنایی نَشتید امّا ایسِه که ادعا مُکُنید مُویینید بارِ گُناآتو دِ گردَنِ خُیِتُونَ.»
Currently Selected:
انجیل یوحنا 9: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
