انجیل یوحنا 10
10
چُوپُونِه خُو
1«وِ راسی وِ شما موئِم، او که اَ در طُویلَه گوسوَنا نَرَ داخل بَلکه اَ را دیَری بالا بَرَ دُز وُ رازَنَه. 2امّا اونی که اَ دَر میا داخل چُوپُونِه گوسوَناَ. 3دَربُو، درِ وِ رو او وا مُکُنهَ وُ گوسوَنا وِ صدای او گوش مییَن او گوسوَنا خُیِشِه وِ اسم هِنا مُکُنَه وُ اونانِ مُورَ دَر. 4وَختی تمام گوسوَنا خُیِشِه بُرد دَر، دِ جِلُو اُونا را مِرَ وُ گوسوَنا دِ دُمه او مِرَن وِرِ ایکه اونا صداشِ مِشناسَن. 5امّا هوچ وَخت دِ دُمه غَریوَه نِمِرَن بَلکه اَ او مِگُریزَن، وِرِ ایکه صدا غریوآنِه نِمِشناسَن.»
6عیسی ایی مَثلن وِرَشو گُفت امّا اونا نَفَمسِن چی وِشو مُوئَه.
7پَ یِه بار دیَر وِشو گُفت: «وِ راسی وِ شما مُوئِم، مَه وِرَ گوسوَنا، ”دَر“ هِسِم 8اونا که قبلِ مَه آمان هَمَشو دُز وُ رازَنَن، امّا گوسوَنا وِشو گوش نَدان. 9مَه ”دَری“ هِسِم وُ هر که اَ مه داخل بشهَ نجات پیا مُکُنَه وُ راحَت داخل میا وُ مِرَ دَر وُ زِمینی وِرَ چِرا پیا مُکُنه. 10دُز نِمیا مَیَر وِرِ ایکه بَدُزَ وُ بَکُشَه وُ نابود کُنَه مَه آمییَم تا اونا حیات داشتَ وان وُ ایی حیاتِنِ وِ فَراوُونی داشتَ وان.
11مَه چُوپُونِه خُوئی هِسِم. چُوپُونِه خُو جُونِشِه وِرِ گوسوَنا میَه. 12کِسی که وِرِ پول کار مُکُنَه مِثِ چُوپُو، نیسا وُ گوسوَنا مال او نیسِن، هر وَخت بُوینَه گرگ میا گوسوَنانِ رها مُکنه وُ مِگُریزَ گرگ وِشو حمله مُکُنه وُ اونانِ مِتوچُنَ. 13کِسی که وِرِ پول کار مُکُنهَ فرار مُکُنَه چون وِرِ پول کار مُکُنِهَ وُ دِلدِهول گوسوَنا نیسا. 14مَه چُوپونِه خُویِم. مَه گوسوَنا خُیِمهِ مِشناسِم وُ گوسوَنا مَه،مَنه مِشناسَن، 15هَموجور که بواَ مَنِه مِشناسَه وُ مَه بواَنِه مِشناسِم. مَه جُونِمِه وِرِ گوسوَنا مَلِم. 16گوسوَنایی دیَر هم دارِم که دِ ایی طُویلَه نیسن. اونا هم باید بیارِم وُ اونا هَم وِ صدا مَه گوش مییَن. اوسِه یه گَله مِشن وا یِه چُوپُو. 17بواَ، مَنِه وِرِ ایی دوس دارَه که مَه جُونِمِه مییِم تا اونِ هَنی بَسونِم پَس. 18هوشکه اونِ اَ مَه نِمیرَه، بَلکه مَه وِ میل خُیِم اون مییِم. اختیار دارِم اونِ بَیِم وُ اختیارِ دارِم اون هَنی بَسونِم پس. ایی حُکمنِه اَ بواَ خُیِم گِرِفتِمَ.»
19وِرِ ایی صُوَتا هَنی مینه یهودیا دُو دَسِه ایی اِفتا. 20خیلیا اَزِشو گُفتِن: «او دیو زیَه وُ چِلَ،چُنَ وِ او گوش میید؟» 21امّا دیَریا گُفتِن: « اینا صُوَتا یِه دیو زیَه نیسا. مَه دیو مِتونهَ چِشا کورِ وا کُنَه؟»
مَه وُ بُواَ یکی هِسیم
22دِ او مِوُقَع دِ اورشلیم جشن عیدِ وقف بی،که یادبودِ روزِ تقدیسِ معبدَ. زِمِسو بی 23وُ عیسی دِ صحن معبد دِ ایوونِ سلیمان را مِرَفت. 24یهودیا دُورش جَم شوئِن وُ گُفتُن: «تا کِی ماخای اِیمان دِ شَک نیا داری؟ اَیَر مسیحِ موعودی، آشکارا وِ اِیما بُ.» 25عیسی جُواو دا: «وِ شما گُفتِم امّا باور نِمُکنید. کارایی که مَه وِ اسم بواِ خُیِم مُکُنِم وِ مَه شهادت مییَن. 26امّا شما باور نِمُکُنید وِرِ ایکه اَ گوسوَنای مَه نیسید. 27گوسوَنا مَه صدای مَنِه مِشنوئَن مَه اونانِ مِشناسِم وُ اونا دِ دُمهِ مَه میان. 28مَه وِشو حیات ابَدی مییِم وَ هوچ وَخت هِلاک نِمِشَن کِسی اونانِ اَ دَس مَه نِمِتُونهَ بَدُزَ. 29بواِ مَه که اونانِ وِ مَه بَخشیَ اَ همه بزرگتَرَ وَ هوشکه نمِتُونَه اونانِ اَ دَس بواِ مَه بَدُزَ. 30مَنو بواَ یکی هِسیم.»
31او وخت یه بار دیَر یهودیا سنگ وُرداشتِن تا سنگسارش کُنَن. 32عیسی وِشو گُفت: «کارا خُو زیادی اَ طرف بواِ خُیِم وِتو نِشو دیَم. وِرِ کامینشو ماخایید سنگسارِم کنید؟» 33جُواو دان: «وِرِ کار خُو سنگسارِت نِمُکُنیم بَلکه وِرِ ایکه کُفر گفتی وِرِ ایکه انسانی وُ خُیِتِه خدا مِینی.» 34عیسی وِشو جُواو دا: «مَیَر دِ تورات شما نیاماَ که ”مَه گفتِم شما خدایانید؟“ 35اَیَر اونا که کلام خدا وِشو رَسِسَ، ”خدایان“ خُنهَ شیِنَ،وُ هوچ جا اَ نِوِشتِه آ مُقدَس اَ اعتِبار نِمِفتَه 36چِجور مِتُونید وِ کِسی که بواِ آسِمُونی وقف کِردَه وُ وِ دنیا فِرسیَه بُوئید کفر موئیی فقط وِرِ ایکه گفتِم پسر خدا هِسِم؟ 37اَیَر کارا بُواَمِه وِجا نمیارِم، کلام مَنِه باور نَکنید. 38امّا اَیَر اونان وِجا میارِم، حتی اَیَر کَلام مَنِه باور نِمُکُنید دَسِ کم وِ او کارا ایمان بیارید تا بَنِسَوایید وُ باوَر داشتَه وایید که بواَ دِ منَه وُ مَه دِ بواَ.» 39او وَخت هَنی خواسِن بَنازَنِش دِ گیر امّا اَ دَسشو فِرار کِرد.
40اوسه هَنی وِ اطراف رودخونَه اُردُن رفت اونچو که یَحیی قبل تِر تعمید مِدا وُ دِ اونچو مُن. 41خیلیا آمان وَرِش. اونا مِگُفتن: «هر چَن یَحیی هوچ نِشُونه وُ مُعجِزِای نَکِرد امّا هر چیی که دِ بارَ ایی مرد گُفت راس بی.» 42وَ خیلیا اونچو وِ عیسی ایمان اُوُردِن.
Currently Selected:
انجیل یوحنا 10: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
