انجیل یوحنا 8
8
1امّا عیسی وِ کُوءِ زیتُو رَفت.
بخشییدَن زنِ زِناکار
2صُوِ شَفَق عیسی هَنی وِ صحن معبد آما. دِ اونچو مردِم همه دُورش جَم شییِن وُ او نِشِسُ هَشت وِ تعلیم دیَنِشُو . 3دِ ایی وَخت، معلما تورات وُ علمای فرقَه فَریسی، زنی نِه که دِ حین زِنا گِرِفته وین اُوُردِن، وَ اون هَشتِن دِ مینجا مردِم، 4وُ وِ عیسی گُفتن: «استاد ایی زَ دِ حین زِنا دستگیر شیَ. 5موسی دِ شریعت وِ اِیما حکم کرِدَ که ایجُور زَنا سَنگسار بَشَن. ایسِه تُو شی مُوئی؟» 6اینِنِ گُفتِن تا اونِه امتحان کُنن وُ بُونِه ای وِرِ متهم کِردِنش پیا کُنن. امّا عیسی سرشِ اِناخت دامو وُ وا کِلِکِش رو زِمی مِنِوِشت. 7اَما وِرِ ایکه اونا هَموجور اَ او سؤال مِکِردن، عیسی سر بُلن کِرد وُ وِشو گُفت: «دِ مینه شما، هرکَه که گُنایی نَکِردَه، اوَلی سنگِ وِش بَزَنَه.» 8وُ هَنی سرِشِ اِناخت دامو وُ دِ رو زِمی مِنوشت. 9وا شِنُفتَن ایی حَرف، یِکی یِکی اَ بزرگ تا آخِری نَفَر اونچونِ ترک کِردِن ، همه رفتِن فقط عیسی مُن وا او زَ که رو وِ روش وایسیَ وی. 10اوسِه وُریسا وُ وِ او زَ گُفت: «ای زَ اونا کجائَن؟ هوشکه تونِه محکوم نَکِرد؟» 11زَ جُواو دا: «هوشکه ای خداوند.» اوسَه عیسی وِش گُفت: «مَنم تونِه محکوم نِمُکُنم. بَرو وُ دیَه گُنا نَکُ.»
اعتبار شهادت عیسی
12بَعد عیسی یه دَفَه دیَر وا مَردِم صُوَت کِرد، گُفت: «مَه نورِ جَهانِم هرکه اَ مَه پیروی کُنَه هوچ وَخت دِ تاریکی را نِمِرَ، بَلکه نورِ حیات نَصیوِش مِشَه.» 13پَ فَریسیا وِ او گُفتن: «تو خُیِت وِ خُیِت شهادت میئی، پَ شهادَتت اعتباری نَرَ.» 14عیسی دِ جُواوشو گُفت: «هر چَن مَه خُیِم وِ خُیِم شهادت میئِم، اَما شهادتِم مُعتَبَرَه، وِرِ ایکه مینِم اَ کجا آمییَم وُ وِ کجا مِرِم. امّا شما نِمِنید مَه اَ کجا آمییَم وُ وِ کجا مِرِم. 15شما وا معیارآ بَشَری داوری مُکنید امّا مَه کِسی نِه داوری نِمُکُنم. 16ولی حتی اَیَر هَم کُنُم،داوریِ مَه دُرُسَه، وِرِ ایکه تنا نیسِم، بَلکه بُواِ ایی که مَنه فِرسیَ هَم وا مَنَه. 17دِ شریعت شما نوشتِه شیَ که شهادت دوتا شاهد،مُعتَبَرَه. 18مَه خُیِم وِ خُیِم شهادت میئِم، وُ بُواِ ایی هم که مَنه فِرسیَ وِ مَه شهادت مییَه.» 19اوسِه وِ او گُفتِن: «بواِ تو کُجانَه؟» عیسی جُواو دا: «نه مَنه مِشناسید وُ نه بواِ مَنه. اَیَر مَنه مِشناختید، بُواِ مَنِه هم مِشناختید.» 20عیسی ایی صُوَتانِ وختی که دِ خَزانَه معبد تعلیم مِدا گُفت. امّا هوشکَه اونِه گِرفتار نَکِرد، وِرِ ایکه ساعت او هَنی نَرَسِسَ وی.
عیسی دِ بارَه مرگ خُیِش صحبت مُکُنهَ
21اوسه یِه بار دیَر عیسی وِشو گُفت: «مَه مِرِم وُ شما وِ جُسَنِ مَه مِفتید امّا دِ گُناآ خُیِتو مِمیرید.اونچو که مَه مِرِم شما نمِتونید بیاید.» 22پَ یهودیا گُفتن: «مَیَر قَصد کشتِنِه خُیِشِه داره که مُوئَه”اونچو که مَه مِرِم شما نمِتونید بیاید“؟» 23عیسی وِ شو گُفت: «شما اَ دامونید مَه اَ بالا. شما اَایی دُنیائید امّا مَه اَ ایی دنیا نیسِم. 24وِ شما گفتِم که دِ گُناآ خُیِتو مِمیرید، وِرِ ایکه اَیَر ایمان نیارید که مَه هَمونِم، دِ گناآتو مِمیرید.» 25وِ او گُفتِن: «تو چه کِسی هِسی؟» عیسی جُواو دا: «هَمو که اَ اَوَل وِ شما گفتِم. 26خیلی چیا دارِم که دِ بارَه شما بُوئِم وَ مَحکومِتو کُنِم. امّا او که مَنه فِرسیَ بر حقَ وَ مَه او چیی که اَ او شِنُفتِم، وِ دنیا بازگو مُکُنِم.» 27اونا نَفَمسِن که دِ بارَه بواِ آسِمونی واشو صُوَت مُکُنه. 28پَ عیسی وِشو گُفت: «اوسِه که پسر انسانِ بُلَن کِردید اوسهِ پِی مِورید که مَه، او هِسِم وَ اَ خُیِم کاری نِمُکُنِم بَلکه فقط او چیی نِه مُوئِم که بواَ وِ مَه یاد دیَه. 29وَ او که مَنه فِرسیَه،وا مَنَه. او مَنِه تنا نَنیائَ وِرِ ایکه مَه هَمیشَه او چیی که اونِه خوشال مُکُنَه انجام مییِم.» 30وا ایی صُوَتا خیلیا وِ او ایمان اُوُردِن.
حقیقت شمانِه آزاد مُکُنِهَ
31اوسِه عیسی وِ یهودیائی که وِ او ایمان اُوُردهَ وین گُفت: «اَیَر دِ کَلام مَه بَمُونید وِ راسی مِشید شایِرد مَه . 32وَ حقیقتِ نِه مِشناسید، وُ حقیقت شما نِه آزاد مُکُنَه.» 33وِ او جُواو دان: «اِیما اولادای ابراهیم هِسیم وُ هوچ وخت غُلام کِسی نَوی یِیم. پَ چِجورَ که مُوئی آزاد مِشیم؟» 34عیسی جُواو دا: «وِ راسی وِ شما مُوئِم، کِسی که گُنا مُکُنه،غُلام گُناهَ . 35غُلام همیشَه جاش مینِ خونَه نیسا امّا پسر همیشَه جاش دِ خونیَه. 36پَ اَیَر پسر شمانِه آزاد کُنَه وِ راسی آزادید.»
فرزندان حقیقی ابراهیم
37«مینِم که اولادای ابراهیم اید امّا دِ دُمهِ اینید که مَنِ بَکُشید وِرِ ایکه کلام مَه دِ شما جایی نَرَ. 38مَه اَ او چیی که دِ حضور بواَ دییمَ صُوَت مُکُنِم وُ شما او چیی که اَ بواِ خُیِتو شِنُفتید انجام میید.» 39گُفتِن: «بواِ اِیما ابراهیمَه.» عیسی گُفت: «اَیَر اولادای ابراهیم بییید مِثِ ابراهیم رفتار مِکردید. 40امّا شما دِ دُمِ کُشتِنِ مَنید وُ مَه او کِسی هِسِم که حقیقتی نِه که اَ خدا شِنُفتِم وِ شما بازگو کِردِم. ابراهیم ایی کارِنِه نَکِرد. 41شما اعمال بواِ خُیِتونِ انجام میید.»
وِ عیسی گُفتن: «اِیما حرومزاده نیسیم! یِه بواَ داریم، که دِ واقِع خداَ.» 42عیسی وِشو گُفت: «اَیَر خدا بواِ شما بی، مَنه دوس داشتید وِرِ ایکه مَه اَ طرف خدا آمییَم وُ ایسِه اینچونِم. مَه اَ طرف خُیِم نیامیَم بَلکه او مَنه فِرسیَ، 43چُنَ صُوَتا مَنه نِمِفَمید؟ وِرِ ایی نِمِتونید کلامِ مَنِه قَوول کُنید. 44بُواِ شما ابلیسَ وُ شما اَ بُواَتُو هِسید وُ دِ دُمهِ انجام خواسِه آ اونید. او اَ اَول قاتل بی وُ وا حقیقَت نِسبَتی نَشت وِرِ ایکه هوچ حقیقتی دِ او نیسا. هر وَخت دُورو مُوئَه، اَ ذات خُیِش مُوئَه؛ وِرِ ایکه دُروزِنَه وُ بُواِ دُروزِناَ. 45امّا وِرِ ایکه حقیقتِ نِه وِ شما مُوئم، شما حَرفِمِه باور نمُکنید. 46کامیناتو مِتونهَ مَنه وِ گنایی محکوم کُنَه؟ پَ اَیَر حقیقت نهِ وِ شما مُوئِم، چُنَ حَرفِمِه باور نمُکنید؟ 47هَرکه اَ خداَ حرفاِ خدانِه باور مُکُنَه عِلّت ایکه حَرفاِ مَنِه باوَر نمُکنید اینَه که شما اَ خدا نیسید.»
پیش اَ ایکه ابراهیم با مَه هِسِم
48یهودیا دِ جُواو گُفتن: «دُرُس نَگُفتیم که سامری هِسی وُ دیو داری؟» 49عیسی جُواو دا: «مَه دیو نَرَم بَلکه عزَتِ بواَ خُیِمهِ دارم امّا شما وِ مَه بیحرمتی مُکُنید. 50مَه دِ دُمِه جَلالِ خُیِم نیسِم. ولی کِسی هِسا که دِ دُمِه اونَه، وَ داوَر هَم اونَه. 51وِ راسی وِ شما موئِم، اَیَر کِسی کلام مَنه وِ جا بیارَه، مرگِنِه تا وِ ابد نِمُویینهَ.» 52یهودیا وِش گُفتِن: «ایسه دیَه یقین پیا کِردِیم که دیو زیِه یی! ابراهیم وُ پِغَمَرا مُردِن، وُ حالا تو مُوئی، ”اَیَر کِسی کلام مَنه نیا دارَ، طعم مرگِنِه تا ابد نِمِچَشَه!“ 53یعنی تو اَ بواِ اِیما ابراهیم هم بزرگتَری؟ او مُرد، وُ پِغَمَرا هَمشو مُردِن. خُیِتِه چه کِسی مینی؟» 54عیسی گُفت: «اَیَر مَه خُیِمهِ جَلالِ بییَم جَلالِ مَه ارزشی نَرَ. بواِ مَنَه که مَنِه جَلالِ مییَه هَمو که شما مُوئید خدای ایمانَ. 55هر چن شما او نِه نِمِشناسید امّا مَه او نِه مِشناسِم. اَیَر بُوئِم اونِه نِمِشناسِم مِثِ شما دُرو زِنِم. امّا مَه اونِه مِشناسِم وُ کلام اونِه وِجا میارِم. 56بواِ شما ابراهیم، شادی مِکِرد که روزِ مَنه بُویینَه وُ اونِه دیی وُ خوشال شد.» 57یهودیا وِش گُفتِن: «هَنی پَنجاسال نَری وُ ابراهیم نِه دییییَ؟» 58عیسی وِشو گُفت: «وِ راسی وِ شما موئِم، پیش اَ ایکه ابراهیم با مَه هِسِم!» 59پَ سنگ وُرداشتِن تا سنگسارش کُنَن امّا عیسی خُیِشِه قایم کِرد وُ اَ صَحنِ معبد دِرِما دَر.
Currently Selected:
انجیل یوحنا 8: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
