انجیل یوحنا 7
7
عیسی وِ عید خیمه آ مِرَ
1بعد ایی عیسی مُدَتی دِ وُلاتِ جلیل میَشت، نِماخواس دِ ولاتِ یهَودیَه بَمونَه، وِرِ ایکه سَران یهود دِ دُمِ کُشَتَنِش بییِن. 2وَختی عید خیمهآ که اَ عیدای یهود بی، نَزیک شُد. 3بِرارا عیسی وِش گُفتِن: «اینچونِ ترک کُ وُ وِ یهَودیَه بَرو تا شایِردات کارایی نِه که مُکنی بُوینَن، 4وِرِ ایکه هرکَه باخا بَشناسَنِش، مخفیونَ کار نِمُکُنهَ. تو که ایی کارانِ مُکُنی خُیِتِ وِ دنیا نِشو بَ.» 5وِرِ ایکه حتی بِراراشم وِش ایمان نیاوُرده وین. 6پَ عیسی وِشو گُفت: «هَنی وَختِ مَه نَرَسِسَه، امّا وِرِ شما هر وَختی مناسبَ. 7دنیا نمِتُونَه اَ شما متنفر با امّا اَ مَه نفرت دارَه، وِرِ ایکه مَه شهادت مییِم که کاراش بَدَ. 8شما خُیِتو وِرِ عید بَرید مَه وِ ایی عید نمیام، وِرِ ایکه وَختِ مَه هَنی نَرَسِسَه.» 9اینِنِ گُفت وُ دِ جلیل مُن.
10اما بَعدِ ایی که بِراراش وِرِ عید رفتِن اورشلیم خُیِش هم رفت اما نَه آشکارا بَلکه پِنهُونی. 11پَ یهودیا، دِ روزا عید،اونِ مِجُسِن وُ مِپُرسین: «او مرد کُجانَ؟» 12وُ دِبارَه او دِ مینِ مردِم پچ پچ زیادی بی. بعضیا مِگُفتن: «مرد خُوییَ» امّا بعضیا مِگُفتن: «نَه!او مرَدِمِنِه گُمرا مُکُنَه.» 13وا ایی حال، وِرِ ایکه اَ یهودیا مِترسِسِن هوشکَه دِ بارَه او آشکارا صُوَت نِمِکِرد.
14هَمی که نصف روزا عید رَفتَه وی ، عیسی وِ صحن معبد آما وُ هشت وِ تعلیم دییَن. 15یهودیا تعجب کِردِن مِپُرسین: «ایی مرد که دَرسِ شَریعت نَخُنهَ چِجور مِتونهَ ایجور عِلمی داشتَ وا؟» 16عیسی دِ جُواو اونا گُفت: «تعلیما مَه اَ خُیِم نیسا بَلکه اَ او کِسیَه که مَنه فِرسیَه، 17اَیَر کِسی وِ راسی بَخوا خواسِ خدانِه وِ جا بیارَه، مِفَمَه که ایی تعلیما اَ طرف خداَ یا مَه اَ خُیِم مُوئِم. 18او که اَ خُیِش مُوئَه، دِ دُمِ جَلالِ خُیِشَ امّا او که خواهان جَلال او کِسیَ که اونِه فِرسیَه راستگوَ وُ دِ او هوچ نادُرِسی نیسا. 19مَه موسی شَریعَتِنِه وِتو نَدا؟ امّا هوچ کامِتو اونِ وِ جا نِمیارَ وِرِ ایی که کمر وِ قتل مَه بَسیِن؟» 20مَردِم جُواو دان: «تُو دیو زِیِه ای! کیهَ که دِ دُمِه کشتَنِه تُو نَوا؟» 21عیسی دِ جُواو اونا گُفت: «مَه یه معجِزَه کرِدَم وُ شما هَمتو شِگِفت زیَه شوئید. 22موسی حکم ختنَه نِه وِتو دا (الوَته ایی حُکم نَه اَ موسی بَلکه اَ بواِ آ قُوم بی) وَ وِرِ اینَ که دِ روزِ شَبّات، شما پسراتونِ ختنَه مُکُنید. 23پَ اَیَر پسراتونِ دِ روزِ شَبّات هم ختنَه مُکُنید تا شریعت موسی نَشکِنیَه وِرِ شی تَش میرید اَ ایکه تمام بدن یِه آیِمِ نِه دِ روزِ شَبّات شَفا دام؟ 24وِ ظاهر داوری نَکید بَلکه وِ حق داوری کنید.»
25اوسِه بعضی اَ مَردِمِ اورشلیم گُفتِن: «آیا ایی هَمونی نیسا که قَصد کشتِنِش دارَن؟ 26سیل کنید چِجور آشکارا صُوَت مُکُنَه وُ وِش هوچی نِمُوئَن! یَعنی مُمکِنَه بزرگا قوم وِراسی فَمِسَه بان که ایی هَمو مسیحِ موعودَ؟ 27اِیما مِینیم ایی مرد اَ کجا آمیَ دِ حالی که وَختی مسیح بیا، کِسی نِمِنهَ اَ کجا آمییَ.» 28اوسِه عیسی مُوقع تعلیم دِ معبد وا صدا بُلن گُفت که: «مَنِه مِشناسید وُ مِینید اَ کجا آمیَم. امّا مَه اَ طرف خُیِم نیامامَ. او که مَنه فِرسیَ حقَ؛ وَ شما اونِه نِمِشناسید. 29امّا مَه اونِه مِشناسِم، وِرِ ایکه مَه اَ اونم وَ او مَنِه فِرسیَ» 30پَ خاسِن بَنازَنِش دِ گیر امّا هوشکَه وِش دَس دِراز نَکِرد، وِرِ ایکه ساعت او هَنی نَرَسِسَ وی. 31وا ایی حال، خیلی اَ او مردِم وِش ایمان اُوُردِن. اونا مِگُفتن: «مَیَر وَختی مسیحِ موعود بیا، بیشتَر اَ ایی مرد معجِزَه وُ نِشُونَه مُکُنَه؟»
32وِ گوش علمای فرقَه فَریسی رَسِس که مَردِم دِ بارَه او ایجور پچ پچ مُکُنن پَ سران کاهنا وُ فَریسیا، نِگبانا معبدِنِ فِرسان تا اونِه بِیرَن. 33اوسِه عیسی گُفت: «فقط مُدَت کَمِی وا شمانِم، وُ بَعد وَرِ اونی که مَنِه فِرسیَ مِرِم. 34مَنِه مِجورید امّا پیا نِمُکنید وُ جایی که مَه هِسِم، شما نِمِتونید بیاید.» 35پَ یهودیا وا هم مِگُفتن: «ایی مردکجا ماخا بَرَ که اِیما نِمِتُونیم اونِه پیا کُنیم؟ مَیَر ماخا وَرِ یهودیائی که دِ مِینِ یونانیا پَخشُ پِلائَن بَرَ وُ یونانیانِه تَعلیم بیَه؟ 36مَنظُورِش چی بی که گُفت ”مَنِه مِجورید اما پیام نِمُکُنید وُ جایی که مَه هِسِم شما نمِتونید بیاید“؟»
نَهرآی اِوُ حَیات
37دِ روزِ آخِر که روزِ بزرگ عید بی،عیسی وایسیَ وی وُ وا صدا بُلن گُفت: «هرکه تِشنیَه وَرِ مَه بیا وُ بَنوشَه. 38هرکه وِ مَه ایمان بیارَه، هموجور که نوشتَه مقدس مُوئَه، دِ دِلِ او،نهرآ اِوُیی جاری مِشهَ که حیات میَه.» 39ایی صُوَتِنِ دِ بارَه روحِ خدا گُفت،که اونایی که وِ او ایمان بیارَن، اونِه پیا مُکُنن وِرِ ایکه روحالقُدُس هَنی عطا نشیَ وی وِرِ ایکه عیسی هَنی جلال پیا نَکِردَ وی.
دو دَسِه گی مابین مردِم دِ بارَه عیسی
40عده ای اَ جماعت، وا شِنُفتَنِ ایی صُوَتا گُفتن: «و راسی که ایی مرد همو نَبیِ موُعودَ که موسی گُفتَه.» 41دیَریا مِگُفتن: «مسیحِ موعودَ.» امّا عده ایی دیَر پُرسین: «مَه مسیحِ موعود اَ جلیل میایَ؟ 42مَه نوشتَه مقدس نَگُفتَه که مسیح اَ نَسلِ داوود پادشاَ وُ دِ بِیتلحم، دِهی که داوود دِش زِنِه ایی مِکِرد، میا؟» 43پَ دِ بارَه عیسی دِ مینِ مردِم اختلاف اِفتا. 44عده ایی ماخواسِن اونِه بِیرَن امّا هوشکَه وِ او دَس دِراز نَکِرد.
45پَ نِگبانا معبد وَرِ سران کاهنا وُ فَریسیا وُریَشتِن. وُ اونا اَزِشو پُرسیِین: «چُنَ اونِه نیاوُردید؟» 46نِگبانا جُواو دان: «تا ایسِه کِسی مِثِ ایی پیا صُوَت نَکِردَ!» 47پَ فَریسیا گُفتن: «مَیَر شمانَم فریو خُوردِید؟ 48مَیَر اَ بزرگا قومُ فَریسیا کِسی هِسا که وِ او ایمان اُوُردَ وا؟ 49الوَتَه که نَه!امّا ایی مردِم که چیی اَ شریعت نِمِینَن مَلعونَن.»
50نیقودیموس، که اَ زوتَر وَرِ عیسی رفتَ وی وُ یکی اَ اونا بی، گُفت: 51«یَعنی شریعت ایما، بِدونِ ایکه اوَل حَرفا کِسینِه بَشنوءَ وَ بَفمه که چی مُوئَه اون محکوم مُکُنَه؟» 52دِ جُواو گُفتن: «مَیَر تونَم جَلیل یی؟ بَررَسی کُ وُ بُویین که هوچ پِیغَمَری دِ جلیل وُرنِیسایَ.» 53اوسِه هر کام رفتِن وِ خونَه خُیِشو .
Currently Selected:
انجیل یوحنا 7: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
