انجیل یوحنا 5
5
شفای مرد عَلیل
1بَعد مُدَتی عیسی وِرِ یِکی اَ عیدای یهود، وِ اورشلیم رَفت. 2دِ اورشلیم، دِ وَرِ«دروازَ گوسوَن» حِوُضیَ که وِ زِوونِ آرامی که یهودیا وِش صُوَت مِکِردِن اون «بِیتحِسْدا» مِخونَن وُ پَینش تا اِیوُو دارَه. 3دِ اُونچو عِدِۀ زیادی اَ مَریضا مِثِ کورا وُ شَلا وُ مَفلوجا دِراز مِکَشین. وُ مُنتظِرِ حِرِکت اِوُ بییِن، 4وِرِ ایکه گُمو مِکِردِن هَرَزگایی فِرِشتِه ای اَ جانِوِ خداوَند میا دامو وُ اِوُنِه تَکو میَه وُ اوَلی کِسی که بعدِ حَرِکَتِ اِوُ بَرَ مینِ حوض اَ هر مَرَضی که دارَه شفا میرَ.
5دِ اونچو مردی بی که سیُ هش سال زِمیگیر بی. 6وَختی عیسی اونِه دِ اونچِو دِراز کَشیَه دیی وُ فَمِس که مُدَتِ زیادیَ وِ ایی حال گِرِفتارَ اَ او پُرسی: «آیا ماخای شَفا بِیری؟» 7مَردِ علیل گُفت: «ای آقا کِسینِه نَرِم که وَختی اِوُ میا وِ تَکو مَنِه مینِ حِوُض بَنازَ تا خُیِمهِ مِرَسُنِم اونچو، یکی دیَر قبلِ مَه رفتَه مینِ اِوُ.» 8عیسی وِش گُفت: «وُریسُ رَختِخُوتِ وُردارُ وُ را بَرو.» 9او مرد دَرجا شفا پیا کِرد وُ رَختِخُوشِ وُرداشت وُ هشت وِ را رَفتن.
او رو، روزِ شَبّات بی. 10پَ یهودیا وِ مردی که شفا گِرِفتَه وی گُفتِن: «اِمرو شَبّاتَ وُ وِرَتو جایِز نیسا که رَختِخُوتِ وُرداری.» 11او جُواو دا: «او که مَنه شفا دا وِ مَه گُفت” رَختِخِوُتِ وُردارُ وُ را بَرو“.» 12اَ او پُرسیِین: «او که وِ تو گُفت رَختِخُوُتِ وُرداریُ را بَری کی بی؟» 13اما مرد شفا گِرِفتَه نِمِنِس او کیَه، وِرِ ایکه عیسی دِ مینه جمعیت گُم شیَ وی.
14کَمی بَعد، عیسی اونِه دِ معبد پیا کِرد وُ وِش گُفت: «ایسِه که شفا پیا کِردِی دیَه گُنا نَکُ تا مَوادا بَدتَر وِ سَرِت نیا» 15او مرد رَفت وُ وِ یهودیا گفت: «او که مَنه شفا دا عیسیَ.»
16وُ وِرِ ایی بی که یهودیا عیسی نِه اذیَت مِکردِن، وِرِ ایکه ایی کارانِ دِ روزِ شَبّات مِکِرد. 17اما جُواوِ عیسی ای بی که «بُواِ مَه هَنی کار مُکُنَه،مَنِم کار مُکُنِم.» 18اَ ایی رو، یهودیا بیشتَر دِ دُمه ایی بیئِن که عیسانِه بَکُشَن، وِرِ ایکه نَه تنا شَبّاتنِه مِشکِنا بَلکه خدانِه هَم بواَ خُیِش هِنا مِکِرد وُ خُیِشِه وا خدا یِکی مِکِرد.
قُدرَت وُ اِقتدار پسر خدا
19عیسی وِشو گُفت: «وِ راسی وِ شما موئِم که پسر نِمِتونَه اَ خُیِش کاری کُنَه مَیَر کارایی که مُوینَه بُواَش مُکُنَه؛ وِرِ ایکه هرچی بواَ مُکُنَه پسر هم مُکُنهَ. 20وِرِ ایکه بواَ، پسرِنِ دوس دارَه وُ هر چیی مُکُنهَ وِ اونَم نِشو مییَه. وُ کارا بزرگتَر اَ اینَم نِشُونِش مییَه تا شگِفت زیَه بَشید. 21وِرِ ایکه هَموجوری که بواَ مُردِآنِ زِنَه مُکُنَه وُ وِشو حیات مییَه، پسر هَم وِ همیجور وِ هر که بَخا حیات مییَه. 22بُواَ کِسی نِه داوَری نِمُکُنهَ بَلکه تَمام داوَری نِه وِ پسر سِپُردَه. 23تا هَمَه عِزِت پسرِنِ داشتَه وان، هَموجوری که عِزَتِ بواَ نِه دارَن. وِرِ ایکه کِسی که عِزَتِ پسر نِه نَرَ،عِزَت بُواِیی که او نِه فِرسیَ هم نَرَ . 24وِ راسی وِ شما موئِم، هَرکَه کِه کَلام مَنه بَشنوئَه وُ وِ او که مَنِه فِرسیَ ایمان بیارَه، حیات ابدی دارَه وُ وِ داوَری نِمیا بَلکه اَ مرگ وِ حیات مُنتَقِل شیَ. 25وِ راسی وِ شما موئِم، زِمانی مِرَسهَ بَلکه همی ایسِنَه که مُرداآ صدای پسر خدانِه مِشنوئَن وُ اونایی که بَشنوئَن، زِنَه مِشَن. 26وِرِ ایکه هَموجوری که بواَ اَ خُیِش حیات دارَه، وِ پسر هَم عطا کرِدَه که اَ خُیِش حیات داشتَ وا. 27وُ وِ او ایی اقتدارِ نِه دیَه که داوَری هم کُنه وِرِ ایکه پسر انسانَ. 28اَ ایی صُوَتا تعجب نکنید وِرِ ایکه وَختی مِرَسَه که تمام اونایی که دِ قَبرَن صدا پسرِ نِه مِشنُوئَن وُ میان دَر. 29اونایی که خویی کِردَ وان، زِنَه مِشَن وِرِ حَیات. وُ اونایی که بَدی کِردَ وان، زِنَه مِشَن وِرِ داوَری. 30مَه اَ خُیِم نِمِتُونم کاری کُنِم، بَلکه بَنا وِ او چیی که مِشنُوئِم داوری مُکُنِم وُ داوریِ مَه عادلانیَه وِرِ ایکه دِ دُمِ ایی نیسِم که خواسِ خُیِمه انجام بَیِم بَلکه دِ دُمِ اینِم که خواسِ اونی که مَنِه فِرسیَ اَنجام بَیِم.»
شَهادَت وِ عیسی
31«اَیَر مَه خُیِم، وِ خُیِم شهادت بَییِم شهادَتِم اعتباری نَرَ. 32اما یکی دیَه هِسا که وِ مَه شهادت مِیَه وُ مینِم شهادتِش دِ بارَه مَه مُعتَبَرَ. 33اَلوَته شما کِسایی نِه وَرِ یَحیی فِرسایین وُ او وِ حقیقت شهادت دا. 34نَه ایکه مَه شهادت انسانِ قَوول کُنِم بَلکه ایی صُوَتا نِه مُوئِم تا نجات پیا کُنید. 35یحیی چراغی بی که مِسُخت وُ مِدُرُنجِس، وُ شما ماخاسین دَمی دِ نورش خوش باید. 36امّا مَه شهادتِ بزرگتَری اَ شهادتِ یَحیی دارِم، وِرِ ایکه کارایی که بواَ وِ مَه سپُردَه تا انجام بَیِم،یعنی هَمی کارایی که مُکُنِم،خُیِشُو وِ مَه شهادت مییَن که مَنِه بواَ فِرسیَ. 37وُ هَمو بُوایی که مَنه فِرسا خُیِش وِ مَه شهادت مییَه. شما هوچ وَخت صدا اونِه نَشنُفتینَ وُ رو اونِه نِیدیتونَ. 38وُ کلام او دِ شما ساکن نیسا وِرِ ایکه وِ فِرسیَش ایمان نَرید. 39شما نوشتِه آمقدّس نِه مِجُورید، وِرِ ایکه گُموُ مُکُنید وِ واسطۀ اونا حیاتِ ابدی دارید دِ حالی که هَمی نوشتِه آ وِ مَه شهادت مییَن. 40امّا نِماخایید وَرِ مَه بیاید تا حیات داشتَه وایید.
41مَه جَلالِ اَ انسانا قَوول نِمُکُنم. 42اَما شمانِ خُو مِشناسِم که محبت خدانِه دِ دل نَرید. 43مَه وِ اسم بواِ خُیِم آمییَم ولی شما مَنه قَوول نِمُکُنید. امّا اَیَر یکی دیَر وِ اسم خُیِش بیا، اونِ قَوول مُکُنید. 44چِجور مِتُونید ایمان بیارید دِ حالی که جَلالِ نِه اَ هَم قَوول مُکُنید امّا دِ دُمِه جَلالی که اَ خدای یکتا با نیسید؟ 45گُمو نَکنید مَنِم که دِ بِراوَر بُوا، شمانِ مُتهم مُکُنِم ، مُتهمکُنَندَ شما موسی وُ هَمونَ که وِش امید بَسین. 46وِرِ ایکه اَیَر موسانِه تصدیق مِکِردید مَنِ هَم تَصدیق مِکِردید وِرِ ایکه او دِ بارَه مَه نوشتَه. 47اَما اَیَر نوشتِه آ اونِه باور نَرید چِجور مِتُونید صُوَتا مَنه باوَر کنید؟»
Currently Selected:
انجیل یوحنا 5: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
