انجیل یوحنا 3
3
نیقودیموس وِ دیدَن عیسی میا
1مَردی بی اَ عُلمای فِرقَه فَریسی، وِ اسمِ نیقودیموس ، اَ بزرگا یهود. 2او یِه شُو وَرِ عیسی آما وُ وِش گُفت: «استاد مِینیم که تُو مُعَلمی هِسی که اَ طَرَفِ خدا آمییِی وِرِ ایکه هوشکَه نِمِتُونه مُعجِزِات وُ نِشونِه آیی که تو مُکُنی،وِ عمل بَرَسُونَه، مَیَر ایکه خدا وا او با.» 3عیسی دِ جُواو گُفت: «وِ راسی وِت موئِم، تا کِسی اَ نِوُ وِ دنیا نیا، نِمِتُونه پادشایی خدانِه بُویینَه.» 4نیقودیموس وِش گُفت: «کِسی که پیرَ چجوری مِتونهَ اَ نِوُ زادَ بَشَه؟ آیا مِتونَه ی دفعه دیَر وِ رَحِم نِنَش وُریَردَ وُ وِ دنیا بیا؟» 5عیسی جُواو دا: «وِ راسی وِت مُوئِم تا کِسی اَ اِوُ وَ روح زادَ نَشَه نِمِتُونه وِ پادشایی خدا را پیا کُنَه. 6او چیی که اَ بشَرِ خاکی زادَ بَشه بَشریَ؛ امّا چیی که اَ روح زادَ بَشَه روحانیَ. 7تعجُب نَکُ که گفتِم باید اَ نِوُ زادَ بَشید! 8باد هر کجا که بَخوا مِوَزَه؛ صدای اونِ مِشنُوئی، امّا نِمِنی اَ کجا میا وُ وِ کجا مِرَ. ایجوریَ، هرکِسی که اَ روح زادَه بَشَه.» 9نیقودیموس اَ او پُرسی: «ایجور چیی چِجور مُمکِنَ؟» 10عیسی جُواو دا: «تو مُعَلِم اسرائیلی وُ ایی چیانِه دَرک نِمُکُنی؟ 11وِ راسی وِت موئِم که ایما اَ او چیی که مِینیم صُوَت مُکُنیم وَ وِ او چیی که دی یِیمَ شهادت مییم، امّا شما شهادت ایمانِ قَوول نِمُکنید. 12اَیَر مِوقعی که دِبارَه اُمور زِمینی وا شما صُوَت کِردِم باور نَکِردِید، چطُور باور مُکُنید اَیَر اَ اُمور آسِمُونی وِ شما بُئِم؟ 13هوشکَه وِ آسِمو بالا نَرَفته مَیَر او که اَ آسِمو آما دامو یعنی پسر انسان. 14هَموجور که موسی او مارِ بِرِنجینِه دِ بیاوُو توکِ چویی عِلَمش کِرد بالا، پسر انسان هم باید عِلَم با بالا، 15تا هرکَه وِ او ایمان بیارَه، حیاتِ اَبَدی داشتَه وا.
16وِرِ ایکه خدا جهانِ ایقَد محبت کِرد که پسر یگانۀ خُیِشِه فِرسا تا هرکَه وِ او ایمان بیارَه هِلاک نَشَه بَلکه حیاتِ ابدی نِه پیا کُنَه. 17وِرِ ایکه خدا پسرِنِ وِ جهان نَفِرسا تا جَهانیانِ محکوم کُنَه بَلکه فِرسا تا وِ واسطۀ او نجات پیا کُنَن. 18هرکه وِ او ایمان دارَه محکوم نِمِشهَ اَمّا هرکه وِ او ایمان نَرَ هَمی ایسِه محکوم شیَ وِرِ ایکه وِ اسمِ پسر یگانۀ خدا ایمان نیاوُرد. 19وَ محکوم شیَن دِ اینَ که نور وِ جهان آما امّا مردِم تاریکی نِه بیشتَر اَ نور دوس داشتِن، وِرِ ایکه اَعمالِشو بَدَ. 20وِرِ ایکه هر که بَدی نِه وِجا میارَه اَ نور نِفرَت دارَ وُ وِ سَمتِ نور نِمیا مَوادا کاراش آشکار با وُ رُسوا بَشَه. 21امّا اونی که او چیی که دُرُسِه وِ جا میارَ وِ طرفِ نور میا تا دیار با که کاراش وِ یاری خدا انجام شیَ.»
شهادت یحیی دِ بارَه عیسی
22بعدِ او، عیسی وُ شایِرداش وِ داهاتا وُلاتِ یهَودیَه رفتِن.او مُدَتی نِه واردِ اونا مُن اونچو وُ مَردِمِ نِه تعمید مِدا. 23یَحیی هَم دِ عِیْنون، نَزیکِه شَرِ سالیم، تعمید مِدا وِرِ ایکه دِ اونچو اِوُ فَراوُو بی وُ مردِم میامانُ تعمید میرِفتِن. 24ایی پیش اَزی بی که یَحیی وِ زندان بِفتَه. 25ایسِه، مینِ شایِردا یَحیی وُ یِه یهودی بَحثی اِفتا سَرِ آداب غسلِ پاکی. 26پَ آمان وَرِ یَحییُ وِش گُفتن: «استاد او که وا تُو دِ او طرف رودخونه اُردن بی، وُ تو وِش شهادت دایی ایسِه خُیِش تعمید مییَه وُ همَه وَرِ او مِرَن.» 27یَحیی دِ جُواو گُفت: «هوشکَه نِمِتُونه چیی وِ دَس بیارَه، جز او چیی که اَ آسِمو وِ او عطا با. 28شما خُیِتو شاهدید که مَه گفتِم مسیحِ موعود نیسِم، بَلکه قبلِ او فِرسیَ شییِمَ. 29عروس وِرَ داماَ وَ امّا دوس داما که دِ کناری وایسیَ وَ اونِه مِشنوءَ اَ شِنُفتَن صدا داما شادیِ زیادی مُکُنَه. پَ شادی مَنِم الانَ کامِل شیَ. 30او باید بزرگ بَشَه وَ مَه باید کُوچوک بَشِم.»
31«او که اَ بالا میا اَ هَمَه بالاتَرَ ،امّا اونی که اَ زِمینَه، زِمینیَ وَ اَ چیا زِمینی صُوَت مُکُنه اونی که اَ آسِمو میا اَ هَمَه بالاتَرَ. 32او وِ هَر چیی که دیدَ وُ شِنُفتهَ شهادت مییَه امّا هوشکَه شهادتشِه قَوول نِمُکُنَه. 33اونی که شهادتِشِ قَوول مُکُنه مُهرِ تائید وِ ایی مِزِنَه که خدا حقیقتَ. 34وِرَ ایکه او کِسی که خدا فِرسیَ کلامِ خدانِه اعلام مُکُنه،وِرِ ایکه خدا روح خُیِشِه وِ قَدِ معیَن”وِش“ عطا نِمُکُنهَ. 35بُواِ آسِمونی، پسرِ دُوس دارَ وُ همه چی نِه وِ دَس او سِپُرده. 36هَرکِسی که وِ پسر ایمان دارَ، حیات ابدی دارَ؛ امّا کِسی که اَ پسر اطاعت نِمُکُنهَ حیاتِ نِه نِمُویینهَ، بَلکه غَضَبِ خدا مِمونَه وِ روش.»
Currently Selected:
انجیل یوحنا 3: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
