انجیل یوحنا 2
2
مُعجِزَه دِ جَشنِ عروسی
1روزِ سِوُم دِ دِهات قانا دِ وُلاتِ جَلیل عروسی بی وُ نِنَه عیسی هَم دِ اونچو بی . 2عیسی هَم واردِ شایِرداش وِ عروسی دعوت شیَ ویی. 3وَختی شِراو خِلاص شُد، نِنَه عیسی وِش گُفت: «اونا شِراو نَرَن!» 4عیسی وِش گُفت: «ای خانِم مَنِه وا ایی اَمر چه کارَ؟ ساعتِ مَه هَنی نَرَسِسَه.»
5نِنَش وِ خادِما گُفت: «هرچی وِ شما مُوئَه، بَکُنید.» 6دِ اونچو شِش تا خُمرَ سنگی بی که یهودیا اِوُ ش وِرَ غسل پاکی استفادَه مِکِردِن وُ هر کام حدود صَد وُ بیس لیتر جا داشت. 7عیسی وِ خادما گُفت: «ایی خُمرِآنِ پُر کنید اَ اِوُ.» اوسِه اونان لُوریز پُر کِردِن. 8اوسِه وِشو گُفت: «ایسِه کمی ازِش وُر دارید وَرِ صاحِوِ مَجلِس بُورید.» وُ اونا بُردِن. 9صاحِوِ مَجلِس اِوُنِه که شِرآو شیَ وی چَشی او نِمِنِس اونِ اَ کُجا اُوُردِنَ،اما خادمایی که اِوُنِه کَشی وییِن مینِسِن. صاحِوِ مَجلِس، دامانِ هِنا کِرد 10وُ وِش گُفت: «هَمه اوَل وا شِرآوِ ناب پذیرایی مُکُنن وَ موقعی کِه مِهمونا مَس شوئِن شِرآوِ اَرزُتِرِنِ میارَن؛ امّا تُو شِرآوِ ناب نِه تا الان نیا داشتیَ!»
11ایی اوَلین مُعجِزَه وُ نِشُونه ایی بی که عیسی دِ قانای جَلیل کِرد وُ جَلال خُُیِشِه آشکار کِرد وُ شایِرداش وِ او ایمان اُوُردِن.
12اوسِه وا نِنَه وُ برارا وُ شایِرداش وِ شَرِ کَفَرناحوم رَفت وُ چَن روزی دِ اونچو مُنِن.
عیسی دِ معبد
13هَمی که عید پسَخ یهود نَزیک بی، عیسی وِ اورشلیم رَفت. 14دِ صحن معبد دیی که عدهای وِ فُروش گِآو وُ گوسوَنُ کبوتَر مَشغولَن، وُ صَرّافا هَم نِشِسِنَ وِ کاسبی. 15عیسی شَلاقی اَ طِناف دُرِس کِرد وُ همَه نِه واردِ گِآو وُ گُوسوَنا اَ معبد اِناخت دَر. وَ سِکه آ صَرّافان رِخت رو زِمی وُ تختاشونِ چَپَ کِرد، 16وُ وِ کفتر فُروشا گُفت: «اینانِ اَ اینچُو بُورید دَر، وُ خُونِۀ بواَ مَنِه محل کسب نَکُنید!» 17اوسِه شایِرداش وِ یاد اُوُردِن که دِ نوشتِه آ مقدَس نوشتَه شیَ: «غیرت وِرَ خُونه تو مَنِه مِسوزونَه.» 18پَ یهودیا دِ بِراوَر ایی کارِ او گُفتِن: «چه مُعجِزَه وُ نِشُونِه ایی وِرَمو داری تا بَنِسَواییم اجازَ ایجور کارایی نِه داری؟» 19عیسی دِ جُواو گُفت: «ایی معبدِنِ خِراو کُنید کِه مَه اونِه سِه روزَ هَنی اَ نُو بَرپا مُکُنِم.» 20یهودیا گُفتن: «بنای ایی معبد چِل وُ شِش سال طول کَشیَه، وُ ایسِه تو ماخای سه روزَه اونِه اَ نُو بَر پا کنی؟» 21اَما معبدی که عیسی ازِش صُوَت مِکِرد بَدَن خُیِش بی. 22پَ موقعی که اَ مُرداآ زِنَه شد، شایِرداش ایی گُفتِۀ اونِه وِ یاد اُوُردِن، وُ وِ نوشتِه آ مقدّس وُ کَلام عیسی ایمان اُوُردِن.
23دِ مُدَتی که عیسی وِرَ عید پَسَخ دِ اورشلیم بی، خیلیا وا دییِن مُعجِزات وُ نِشُونِه آیی که او مِکِرد وِ اسم او ایمان اُوُردِن. 24امّا عیسی وِ ایمانشو اعتماد نَشتا وِرِ ایکه هَمَه نِه مِشناخت. 25وُ نیازی نَشت کِسی دِبارَ انسان چیی وِ او بُئَه، وِرِ ایکه خُیِش مِینس دِ دِلِ انسان چیَه.
Currently Selected:
انجیل یوحنا 2: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
