انجیل یوحنا 20
20
مَقوِرَه خالی
1دِ اوَلی روزِ هفتَه، نَزیک صُو وَختی هوا هَنی تاریک بی، مریم مَجْدَلیّه وِ مَقوِرَه آما وُ دیی که سنگ اَ جلوش وُرداشتَه شیَ. 2اوسِه بَدُو بَدُو آما وَرِ شَمعون پِطرُس وُ او شایِردِ دیَر که عیسی اونِ دوست مَشتا وُ وِشو گُفت: «آقامونِه اَ مَقوِرَه بُردن وُ نِمِنیم کجا هَشتَنِش.» 3اوسهِ پِطرُس واردِ او شایِردِ دیَر رفت دَر وُ رفتِن او طرفِ مَقوِرَه. 4وُ هر دو وا هم مِدُوُئِسِن؛ امّا او شایِردِ دیَر تُن تر رفت وُ اَ پِطرُس جِلو اِفتا وُ اوَل وِ مَقوِرَه رَسِس. 5اوسِه خَم شد، سیل کِرد وُ دیی که پارچه آ کَفِه اونچونَن امّا مینِه مَقوِرَه نَرَفت. 6شَمعونِ پِطرُس هم دِ دُمِه او آما وُ مینِه مَقوِرَه رفت دیی که پارچه آ کَفِه اوچونَن. 7امّا لَچِکی که دُورِه سرِ عیسی بَسَه وین دِ مینِ پارچَه آ کَفِه نیسا بَلکه تا شیَ وُ دِ جا دیَری هَشتَ شیَ. 8اوسِه او شایِردِ دیَر هم که اوَل رَسِسَ وی وِ مقوِرَه، آما داخل وُ دیی وُ باور کِرد. 9وِرِ ایکه هَنی نوشتِه مقدّس نِه درکِ نَکِردَ وییِن که او باید اَ مُردِاآ زِنَه بَشَه. 10اوسِه او دوتا شایِرد وُریَشتِن وِ خُونَه خُیشُو .
ظاهر شییَنِ عیسی وِ مریم مَجْدَلیّه
11امّا مریم، دِ دَر، نَزیک مقوِرَه وایسیَ وی وُ مِگورگِس. او وا گورگَه خم شد تا مینِه مقوِرَه نِه سیل کُنَه. 12اوسِه دوتا فرشته نِه دیی که لواسا سفید دِ وَر داشتِن وُ اونچو که جنازه عیسی نِه هشتَ وین یکی دِ جای سر وُ یکی دیَر دِ جای پایا او نِشِسَه ویِن. 13اونا وِش گُفتِن: «ای زَ وِرَ شی مِگورگی؟» او جُواو دا: «آقامِه بُردَن وُ نِمِنِم کجا هَشتَنِش.» 14وَختی اینِ گُفت وُریَشت وُ عیسانِه دیی که دِ اونچِو وایسیَ، امّا اونِه نَشناخت. 15عیسی وِ او گُفت: «ای زَ چُنَ مِگورگی؟ دُمِ کی میَردی؟» مریم وِ خیال ایی که باغِوُنَه، گُفت: «آقا اَیَر تو اونِه وُرداشتیَ وِ مَه بُ کجا هَشتیشَ تا بَرِم وُ اونِه وُردارِم.» 16عیسی هِنا کِرد: «مریم!» مریم رو وِ جانِوِ او وُرییَشتُن وُ وِ زُون آرامی گُفت: «رَبّونی!» استاد! 17عیسی وِش گُفت: «وِ مَه دَس نَزِ، وِرِ ایکه هَنی وَرِ بواَ بالا نَرَفتمَ. بَلکه وَرِ برارام بَرو وُ وِ اونا بُ که وَرِ بواَ خُیِم وَ بُواَ شما وُ خدای خُیِم وُ خدای شما بالا مِرِم.» 18مریم مَجْدَلیّه رَفت وُ وِ شایِردا خَوَر دا که «خداوندِ دییِمَ!» وُ هَر چیی که او وِش گفته وی وِاونا گُفت.
آشکار بییَن عیسی وِ شایِردا
19ایوارَه همو رو، که اوَلی روز هفته بی، اوسِه که شایِردا دُور هم بییِن وُ دَرا اَ ترس یهودیا قفل بی، عیسی آما وُ وایسا دِ مینِشو وُ گُفت: «سِلام وِ شما!» 20وَختی اینِنِ گُفت دَسا وُ پَهلوشِ وِ اونا نِشُو دا. شایِردا وَختی خداوندِ دییِن خیلی خوشال شُوئِن. 21عیسی هَنی وِ اونا گُفت: «سِلام وِ شما! هموجور که بواَ مَنِه فِرسا مَنِم شما نِه مِفِرسِم.» 22هَمی که اینِ گُفت وِ اونا پُف کِرد وُ گفت: «روحالقدُس نِه بِیرید. 23اَیَر گُناآ کِسینِه بَوَخشید وِ اونا بخشییَ مِشَه وُ اَیَر گُناآ کسینِه نَوَخشیه بَلید نَوَخشیه مِمُونَه.»
عیسی وُ توما
24وَختی که عیسی آما،توما، یکی اَ او دُوآزَ نَفر، که هِناش مِکِردِن لِفونَه واشو نَوی. 25اوسِه بقیَه شایِردا وِ او گُفتِن: «خداوندِ دییِیمَ!» امّا او وِشو گُفت: «تا خُیِم نِشونَه او میخانِه دِ دَساش نُویینِم وُ کِلِکِ خُیِمهِ دِ جا میخا نَلِم وُ دَسِه خُیِمهِ دِ سُولا پَهلوش نَلِم باوَر نِمُکنم.» 26بعدِ هَش رو شایِردا عیسی، هَنی دِ خُونَه بییِن وُ توما هَم واشو بی. هَموجور که دَرا قفل بی، عیسی آما وُ دِ بین اونا وایسا وُ گُفت: «سِلام وِ شما!» 27اوسِه وِ توما گُفت: «کِلِک خُیِتِه اینچو بَل وُ دسامِه سیل کُ، وُ دَس خُیِتِه جلو بیار وُ بَل دِ سُولا پَهلوم . بیایمان نَوا بَلکه باوَر داشتَه وا» 28توما وِ او گُفت: «خداوند مَه وَ خدای مَه!» 29عیسی گُفت: «آیا وِرِ ایکه مَنه دیی باوَر کِردی؟ خوشالِ اونایی که نِیدَه ایمان بیارَن.»
هَدَفِ ایی کِتاو
30عیسی نِشونِه آ وَ معجِزاتِ زیاد دیَری دِ بِراوَرِ شایِردا اَنجام دا که دِ ایی کتاونِوِشته نَشیَ. 31امّا اینا نوشتَه شد تا ایمان بیارید که عیسی هَمو مسیح موعود، پسر خداَ،وُ تا وا ایی ایمان دِ اسم او حیات داشتَواید.
Currently Selected:
انجیل یوحنا 20: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
