انجیل یوحنا 18
18
گرفتار شییَنِ عیسی
1عیسی بَعدِ ایکه ایی صُوَتانِ کِرد، وا شایِرداش وِ او طرف درّه قِدْرون رَفت.دِ اونچو باغی بی، وَ عیسی وُ شایِرداش رفتِن داخلِ باغ. 2امّا یهودا، تسلیمکنندَ او، او جا نِه مینس وِرِ ایکه عیسی وُ شایِرداش چَن بار جَم شیَ وین دِ اونچو. 3پَ یهودا دَسِه ایی اَ سَروازا وُ مأمورای سران کاهنا وُ علمای فرقَۀ فَریسی نِه وُرداشت وِ اونچو رَفت. اونا وا چراغ وُ مَشعَل وُ سِلاح رَسِسِن وِ اونچو. 4عیسی، وا ایکه مینس چی وِ سَرش میا، جِلو رَفت وُ وِشو گُفت: «دِ دُم چه کِسی هِسید؟» 5جُواو دان: «عیسی ناصری.» گُفت: «مَنِم» یهودا، تسلیمکنندَ اونَم وا اونا وایسیَ وی. 6وَختی عیسی گُفت «مَنِم» اونا عقبَکی رَفتِنُ اِفتان رو زِمی. 7بَعد یِ دفعَه دیَه اَ اُونا پُرسی: «دِ دُم چه کِسی هِسید؟» گُفتِن: «عیسی ناصری.» 8جُواو دا: «وِ شما گفتِم که مَنِم. پَ اَیَر مَنِه ماخایید بَلید اینا بَرَن.» 9اینِنِ گُفت تا او چیی که جِلوتِر گُفته وی وِ انجام بَرَسَه که: «هوچ کام اَ اونایی که وِ مَه بَخشییی اَ دَس نَدام.»
10اوسِه شَمعون پِطرُس شِمشیری که داشت کَشی وُ یِه ضربَه وِ خادِم کاهن اعظم زَا وُ گوش راسِشِه بُری. اسم او خادم مالخوس بی. 11عیسی وِ پِطرُس گُفت: «شِمشیرتِ غَلاف کُ! آیا نباید پیالِه ای نِه که بواَ وِ مَه دیَه بَنُوشِم؟»
12او وَخت سَروازا واردِ فرماندَه خُیِشو وُ مأمورا یهودیا عیسانِه گرفتِن. اونا دَساشِ بَسِن 13وُ اوَل وَرِ حَنّا بُردِن. او خُسوره قیافا، کاهِن اعظمِ او زِمان بی. 14قیافا همو کِسی بی که وِ یهودیا سِفارِش کِرد بهتِرَ که یِه نَفر وِرَ قُوم یهود بَمیرَه.
15شَمعون پِطرُس وُ شایِردِ دیَری دِ دُمِه عیسی رَفتِن. اَ اونچو که او شایِرد، اَ آشناآ کاهن اعظم بی، پَ وا عیسی وِ حیاط خونَه کاهن اعظم رَفت. 16امّا پِطرُس پشت دَر وایسا. او وَخت او شایِردِ دیَه که اَ آشناآ کاهن اعظم بی، رَفت دَر وُ وا زَنی که دَربُو بی، صُوَت کِرد وُ پِطرُسِ نهِ بُرد مین حیاط. 17اوسِه او زَنِ دربُو اَ پِطرُس پُرسی: «مَیَر تونَم یکی اَ شایِردا او مرد نیسی؟» پِطرُس جُواو دا: «نَه نیسِم.»
18هوا سرد بی. خادِما وُ مأمورا آتِشی وا زغال روشن کِردن وُ همه وایسیَ ویین دِوُرِش وُ خُیِشونِ گرم مِکِردِن. پِطرُس هم وا اونا وایسیَ وی وُ خُیِشِه گرم مِکِرد.
19کاهن اعظم اَ عیسی دِ بارَ شایِردا وُ تعلیماش پُرسی. 20عیسی جُواو دا: «مَه وا دنیا آشکارا صُوَت کِردِم وُ هَمیشَه دِ کنیسه وُ دِ معبد که مَحَلِ جمع شیَنِ همه یهودیاَ تعلیم دیَم وُ چیی پِنهونی نَگُفتِم. 21وِرِ شی اَ مَه مِپرسی؟ اَ اونا بَپُرس که صُوَتا مَنه شِنُفتَن! اونا خُو مینَن وِشو چی گُفتِمَ.» 22وَختی اینِنِ گُفت یکی اَ نِگَبانا که اونچو وایسی وی یِه سیلی وِش زَا وُ گُفت: «ایی جور وِ کاهن اعظم جُواو میی؟» 23عیسی جُواو دا: «اَیَر خِلاف گُفتِم خِلافِمِه ثابت کُ؛ امّا اَیَر راس گُفتِم وِرِ شی مَنِه مِزِنی؟» 24اوسِه حَنّا اونِه دس بَسَه وَرِ قیافا، کاهن اعظم، فِرسا.
25دِ همو حال که شَمعون پِطرُس وایسیَ وی وُ خُیِشِه گرم مِکرد، بعضیا اَ او پُرسیِین: «مَیَر تونَم یکی اَ شایِردا او نیسی؟» او اِنکار کِرد وُ گُفت: «نَه! نیسِم.» 26یکی اَ خادِما کاهن اعظم که اَ فامیلا او کِسی بی که پِطرُس گوشِشِه بُرّیَ وی گُفت: «مَیَر مَه خُیِم تونِه وا او دِ او باغ نِییدَم؟» 27پِطرُس هَنی انکار کِرد. هَمو مُوقَع خروس خُن.
28عیسانِه اَ وَرِ قیافا وِ کاخ فرَماندار بُردِن. نَزیک صُو بی. اونا خُیِشُو مینِه کاخ نَرَفتِن تا نَجِس نَشَن وُ بَتُونَن شام عیدِ پِسَخ نِه بَخورَن. 29اوسِه پیلاتُس آما دَر وَرِ اونا وُ پُرسی: «ایی مردِنِ وِ چِه جرمی متهم مُکُنید؟» 30جُواو دان،گُفتِن: «اَیَر مجرم نَوی، وِ تو تسلیمش نِمِکِردیم.» 31پیلاتُس وِشو گُفت: «شما خُیِتو اونِه بُورید وُ بَنا وِ شریعت خُیِتو محاکِمَه کُنید.» یهودیا گُفتِن: «اِیما اجازۀ اعدام کِسی نِه نَریم.» 32وُ اییجور حَرفِ عیسی که گُفتَه وی وا چِجور مَرگی باید بَمیره وِ انجام رَسِس.
33پَ پیلاتُس وِ کاخ وُریَشت وُ عیسانِه خواس وُ وِش گُفت: «یعنی تو پادشاِ یهودیایی؟» 34عیسی جُواو دا: « اینِ تو خُیِت مُوئی یا دییَریائَم دِ بارَه مَه وِ تو ایجور گُفتِنَ؟» 35پیلاتُس جُواو دا: «مَیَر مَه یهودیاِم؟ مِلَتِ خَیِت وُ سران کاهنا تونِه وِ مَه تسلیم کِردِنَ،مَه شی کِردیَ؟» 36عیسی جُواو دا: «پادشاییِ مَه دِ ایی دنیا نیسا. اَیَر پادشایی مَه دِ ایی دنیا بی، خادِمامَم مِجَنگین تا وِ دَس یهودیا اسیرِ نَوام. امّا پادشایی مَه دِ ایی دنیا نیسا.» 37پیلاتُس اَ او پُرسی: «پَ تو یِه پادشایی؟» عیسی جُواو دا: «تو خُیِت مُوئی که مَه پادشائِم. وِرِ ایکه مَه وِرِ هَمی وِ دنیا آمییَم وَ وِ ای دلیل وِ ایی دنیا پا هَشتَم تا وِ حقیقت شهادت بییِم. پَ هر کَه کِه اَ حقیقتَ وِ صُوَتا مَه گوش مییَه.» 38پیلاتُس پُرسی: «حقیقت شیَ؟»
وَختی اینِ گُفت،رفت دَر وَرِ یهودیا وُ وِ اونا گُفت: «مَه هوچ جُرمی وِرِ مَحکوم کِردَنِه او پیا نَکِردِم. 39امّا شما رَسمی دارید که دِ عید پِسَخ یِه زندانی نِه وِرَتو آزاد کُنِم آیا ماخایید پادشا یهودیانه آزاد کُنِم؟» 40اونا دِ جُواو حَوار کِردِن: «اونِه نَه، بَلکه بارْاَبّاس نِه آزاد کُ!» وَ بارْاَبّاس یِه را زَن بی.
Currently Selected:
انجیل یوحنا 18: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
