انجیل یوحنا 16
16
1«ایی چیانِه وِ شما گفتِم تا نَلَغزید. 2شمانِ اَ کنیسِه آ مِنازَن دَر وُ حتی زِمانی مِرَسَه که هرکه شمانِه بَکُشَه، گُموُ مُکُنهَ که خدانِه خدمت کرِدَ. 3ایی کارانِ مُکُنن وِرِ ایکه نَه بواَنِه مِشناسَن نَه مَنِه. 4اینانِ وِ شما گفتِم تا وَختی ایی چیا وِ سَرتُو میا، وِ یاد بیارید که شمانِه واخَوَر کرِدَ ویم. اونان اَ اَول وِ شما نَگُفتِم وِرِ ایکه خُیِم وا شما بییِم.
روح خدا چی مُکُنَه
5ایسِه وَرِ او مِرِم که مَنِه فِرسیَ وُ هوچ کامتو نِمِپرسید ”کجا مِری؟“ 6امّا وِ خاطرِ ایی چیا که وِتو گُفتِم دلِ شما غُصَه دار شیَ. 7وا ایی حال، مَه وِ شما راس مُوئِم که رَفتَنِم وِ نفعِ شمانَه. وِرِ ایکه اَیَر نَرِم او یاوَر وَرِ شما نمیا امّا اَیِر بَرِم اونِه وَرِ شما مِفِرسم. 8هَمی که او بیا، جَهانِ دِ موردِ گُناه وُ عدالت وُ داوری مُتِقاعد مُکُنِه که تقصیر کارَ. 9دِ موردِ گُناه وِرِ ایکه وِ مَه ایمان نمیارَن. 10دِ مورد عدالت وِرِ ایکه وَرِ بواَ مِرِم وُ دیَه مَنِه نِمُوینَن. 11وُ دِ مورد داوری، وِرِ ایکه حاکم ایی جهان محکوم شیَ.
12خیلی چیا دیَری دارِم که باید وِ شما بُوئِم، امّا ایسِه نِمِتونید بَفَمید. 13اما وَختی روحِ حقیقت بیا شمانِه وِ تمام حقیقت رَهبری مُکُنهَ وِرِ ایکه او اَ جانِوِ خُیِش حَرفی نِمزِنَه، بَلکه او چیی که مِشنُوءَ مُوئَه وُ اَ او چیی که دِ پیشَ وا شما صحبت مُکُنه. 14او مَنِه جلال مییهَ وِرِ ایکه او چیی که متعلق وِ مَنَه مِیرَ،وِ شما اعلام مُکُنَه. 15هرچیئی که وِرِ بواَ هِسا وِرِ مَنَه.وِرِ ایی گفتِم او چیی که متعلق وِ مَنَه مِیرَ، وِ شما اعلام مُکُنَه.
عیسی شایِردا نِه تسلی مییَه
16بَعدِ مُدَت کَمی، دیَه مَنِه نِمُویینید وُ بَعدِ مُدَت کمی دیَه هَنی مَنه مُویینید.» 17او وَخت بعضی اَ شایِرداش وِ هم گُفتِن: «قصد او اَ ایی حَرف شیَ که،” بَعدِ مُدَت کمی دیَه مَنِه نِمُویینید“ وَ بَعدِ مُدَت کمی دیَه هَنی مَنِه مُویینید یا اَ ایکه مُوئَه” وَرِ بواَ مِرِم“؟» 18بَعد وِ هم گُفتِن: «ایی ”مُدَت کمی“ که مُوئَه، شیَ؟ قصد اونِه نِمِفَمیم؟» 19امّا عیسی که مینس ماخان اَ او سؤال کُنَن وِ اونا گُفت: «آیا دِ ایی باره وا هم بحث مُکُنید که گُفتِم، ”بَعدِ مُدَت کَمی، دیَه مَنه نِمُویینید وُ بَعدِ مُدَت کمی دیَه هَنی مَنِه مُویینید“؟ 20وِ راسی وِ شما موئِم، شما شیوَن وُ زاری مُکُنید امّا دنیا شادی مُکُنهَ شما غُصَه دار مِشید امّا غَم شما وِ شادی وُرمیَردهَ . 21زَ دِ وَخت زایمان درد مِکَشَه وِرِ ایکه ساعت او رَسِسَه؛ امّا وَختی بَچَش وِ دنیا آما دَردِ خُیِشِه وِ یاد نمیارَه، وِرِ ایکه خوشالَ اَ ایکه انسانی وِ دنیا آمییَ. 22وِ هَمی صُورَت، شمانَم ایسِه غُصَه دارید امّا هَنی شمانِه مُویینِم وُ دلِ شما شاد مِشَه وُ هوشکه او شادینِه اَ شما نِمِتُونهَ بَسُونَه. 23دِ او رو، دیه چیی اَ خودِ مَه نِماخایید. وِ راسی وِ شما موئم، هر چیی وِ اسم مَه اَ بواَ بَخوایید اون وِ شما میئَه. 24تا ایسِه وِ اسم مَه چیی نخواسیِن بَخوایید تا پیا کنید وُ شادیتو کامل با.
25اینانِ وا مثَل وِ شما گُفتِم امّا زِمانی مِرَسَه که دیَه ایجور وا شما صُوَت نِمُکُنِم بَلکه آشکارا دِبارَه بواَ وِ شما مُوئِم. 26دِ او رو، وِ اسم مَه ماخایید. وُ وِ شما نِمُوئِم که مَه اَ جانِوِ شما اَ بواَ ماخام، 27وِرِ ایکه بواَ خُیِش شمانِ دوس دارَ، وِرِ ایکه شما مَنه دوس دارید وُ ایمان اُوُردید که اَ وَرِ خدا آمیَم. 28مَه اَ وَرِ بواَ آمیَم وُ وِ ایی دنیا داخل شوئِم وُ ایسِه ایی دنیانِه ترک مُکُنِم وُ وَرِ بواَ مِرِم.»
29او وَخت شایِرداش گُفتِن: «ایسِه آشکارا صُوَت مُکُنی نه وا مَثلا. 30ایسِه مینیم که اَ همه چی خَور داری وُ حتی احتیاج نَری کسی اَ تُو چیی بَپُرسَه. اَ ایی رو باوَر داریم که اَ وَرِ خدا آمیی.» 31عیسی وِ اونا گُفت: «یعنی ایسِه باوَر دارید؟ 32ایسِه زِمانی مِرَسهَ وُ وِ راسی که هَمی الانَ رَسِسَه، که پَخشِ پِلا مشید وُ هر کام وِ خونَه خُیِتُ مِرید وُ مَنه تنا مَلید امّا مَه تنا نیسِم، بواَ وا مَنَه. 33اینانِ وِ شما گفتِم تا دِ مَه آرامش داشتَواید. دِ دنیا وِرِ شما زَمَتَ هِسا امّا دلِتو قُرص وِرِ ایکه مَه وِ دنیا غالب شییِمَ.»
Currently Selected:
انجیل یوحنا 16: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
