انجیل یوحنا 14
14
مَه را وُ حقیقت وُ حیات هِسِم
1«دِلِتو پریشُو نَشَه. وِ خدا ایمان داشتَواید وِ مَنِم ایمان داشتَواید. 2دِ خونَه بواِ آسِمُونیِ مَه اتاق زیادَه،وَیَر نَه مَه وِ شما مِگفتِم که مِرِم تا جایی وِرِ شما آمادَه کُنِم؟ 3وُ وَختی که رَفتِم وُ جایی وِرِ شما آمادَه کرِدِم، هَنی میام وُ شمانِه وَرِ خُیِم مُورِم، تا شمانَم اونچو باید که مَه هِسِم. 4جایی که مَه مِرِم راشِه مِینید.» 5توما وِش گُفت: «آقا اِیما حتی نِمِنیم کجا مِری پَ چجوری مِتوُنیم رانِ بَنِسَوایم ؟» 6عیسی وِش گُفت: «مَه را وُ حقیقت وُ حیات هِسِم هوشکه جز وِ واسطۀ مَه وَرِ بواَ نمیا. 7اَیَر مَنِه مِشناختید، بواِ مَنِه نَم مِشناختید اما بَعدِ ایی اونِه مِشناسید وُ اونِه دییِید.» 8فیلیپُس وِش گُفت: «آقا بواَنِه وِ اِیما نِشو بَ که هَمی وِرِ ایما کافیَ.» 9عیسی وِش گُفت: «فیلیپُس، مدت زیادیَه وا شِمانِم وُ هَنیم مَنِه نَشناختیَ کِسی که مَنه دییَه، بُواَنِ دییَه؛ پَ چِجورَ که مُویی ”بُواَنهِ وِ اِیما نِشو بَ“؟ 10آیا باور نَری که مَه اَ بُواَ اِم وُ بُواَ اَ مَنَه؟ حَرفایی که مَه وِ شما مِزِنم اَ خُیِم نیسا بَلکه اَ بُواِییَ که دِ مَه ساکِنَ، اونَه که کارا خُیِشِ وِ اَنجام مِرَسُونهَ. 11ایی حَرفِ مَنه باور کنید که مَه اَ بُواَ اِم وَبُواَ اَ مَنَه؛ اَیَرنَه، وِرِ خاطِرِ او کارایی که کِردِم مَنِه باور کنید.
12وِ راسی وِ شما موئِم، او که وِ مَه ایمان بیارَ کارایی نِه که مَه مُکُنِم،مُکُنَه وُ حتی کارایی بزرگتَر اَ او مُکُنَه وِرِ ایکه مَه وَرِ بواَ مِرِم. 13وُ هر چیی که وِ اِسم مَه بَخوایید، مَه اونِه انجام مییِم، تا بواَ اَ پسر جَلال پیا کُنَه. 14اَیَر چیی وِ اسم مَه اَ مَه بَخوایید اونِ انجام مییِم.
وَعدۀ روحالقدس
15اَیَر مَنه دوسِ دارید دستورا مَنه وِجا میارید. 16وُ مَه اَ بواَ ماخام وُ او، یاوَر دیَری وِ شما میَه که همیشه وا شما با ، 17یعنی روحِ حقیقت که دنیا نِمِتُونَه اون قَوول کُنَه وِرِ ایکه نَه اونِه مُویینَه و نَه اُونِه مِشناسَ. اَمّا شما اونِ مِشناسید، وِرِ ایکه وَرِ شما ساکن مِشهَ وُ دِ شما مِمُونهَ.
18شمانِ بیکَس نِمَلِم میام وَرِتو . 19بَعدِ مُدَت کمی دنیا دیَه مَنِه نِمُویینهَ امّا شما مُویینید وِرِ ایکه مَه زِنَه هِسِم،شما هم زِنِه ایی مُکُنید. 20دِ او روز، مِفَمید که مَه اَ بواَ هِسِم وُ شما اَ مَه وَ مَه اَ شما. 21او که دستورا مَنِه نیا دارَ وُ اَ اونا اطاعت مُکُنَه اونَ که مَنِه دوسِ دارَ؛ وُ او که مَنِه دوس دارَ، بُواَم، اونِه دوسِ دارَ وُ مَنِم اونِه دوس دارِم وُ خُیِمِه وِ او نِشُو مییِم.»
22یهودا، (نَه اَسْخَریوطی)، اَ او پُرسی: «آقا چِجورَ که ماخای خُیِتِه وِ اِیما نِشِو بَیی،امّا نَه وِ ایی دنیا؟» 23عیسی جُواو دا: «اَیَر کسی مَنه دوس داشتَ وا کَلام مَنِه نیا مَرَ، وُ بُواَم اونِه دوس دارَ، وُ ایما وَرِ او میایم وُ وا او زِنِه ایی مُکُنیم. 24او که مَنِه دوس نَرَ کلامِ مَنه وِجا نِمیارَه؛ وَ ایی کلام که مِشنویید اَ مَه نیسا بَلکه اَ بُواِییَ که مَنِه فِرسیَ.
25ایی چیانِه زِمانی وِ شما گفتِم که هَنی وا شمانِم. 26امّا او یاوَر، یعنی روحالقدُس، که بواَ اونِه وِ اسم مَه مِفِرسهَ او تمام چیانِه وِ شما یاد مییَه وُ هر چیی که مَه وِ شما گُفتِم وِ یادتو میاره. 27وِرِ شما آرامش وِجا مَلِم آرامش خُیِمِ وِ شما مییِم. او چیی که مَه وِ شما مییِم، مِثِ آرامشی که دُنیا وِتو مییَه نیسا. دلِ شما پَریشُو وُ هراسو نَوا. 28شِنُفتید که وِ شما گُفتِم ”مَه مِرِم امّا هَنی وَرِ شما میام.“ اَیَر مَنه دوس داشتید خوشالی مِکِردید که وَرِ بواَ مِرِم وِرِ ایکه بواَ اَ مَه بزرگتَرَ. 29ایسِه اینِنِ قبلِ ایکه اتفاق بِفتَه وِ شما گُفتِم تا وَختیکه اتفاق اِفتا ایمان بیارید. 30دیَه بیشتَر اَ ای وا شما صُوَت نِمُکُنم وِرِ ایکه حاکِم ایی دنیا میا. او هوچ ادعایی وِ رو مَه نَرَ. 31امّا مَه کارینِه مُکُنِم که بواَ وِ مَه دستور دیَه تا دنیا بَنِسَوا که بواَنِه دوس دارِم. ایسه وُریسید بَریم.»
Currently Selected:
انجیل یوحنا 14: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
