انجیل یوحنا 13
13
شُشتَن پاآ شایِردا
1قبلِ عید پِسَخ، عیسی دِ حالی که مِینِس ساعت رفتِن او اَ ایی دُنیا وَرِ بواَ رَسِسَه،کَسِکار خُیِشِ که دِ ایی دنیاا دوس داشت تا وِ آخِر محبت کِرد.
2وَخت شام شد. ابلیس اَ زوتَر، دِ دلِ یهودا اَسْخَریوطی، پسر شَمعون، هَشتَ وی که عیسانِه تسلیم دشمن کُنَه. 3عیسی که مینس بواِ آسِمونی تمام چیانِه وِ دَسه او سِپُردَه وُ اَ وَرِ خدا آمییَ وُ وَرِ او مِرَ، 4پَ اَ سَرِ شام وُریسا وُ رَداشِ اَ وَرِش دِراوُرد وُ حولهای وُرداشت بَس وِ قَش. 5اوسِه اِوُ نِه دِ لِیَنی رِخت وُ شروع وِ شُشتَن پاآی شایِردا وُ خُشک کِردَنِشُ وا حولهای کِرد که بَسی وِ قَ. 6هَمی که وِ شَمعون پِطرُس رَسِس او وِش گُفت: «آقا مَه تو ماخای پاآی مَنه بَشُوری؟» 7عیسی جُواو دا: «اُوچیئی که دارِم مُکُنِم تُو ایسِه نِمِفَمی امّا بَعدِ ایی مِفَمی.» 8پِطرُس وِ او گُفت: «پاآی مَنه هوچ وَخت نِمِشوری!» عیسی جُواو دا: «تا تونِه نَشُورِم سَهمی وا مَه نَری.» 9شَمعونِ پِطرُس گُفت: «آقا نه فقط پاآم، بَلکه دَسا و سَرِمه هَم بَشُور!» 10عیسی جُواو دا: «او که حَموم کرِدَ، سر تا پا تَمیزَ وُ وِ شُشتِن احتیاج نَرَ مَیَر پاآش. ایسِه شما پاکید امّا نه هَمه.» 11وِرِ ایکه مینس چِه کسی اونِه تسلیم دُشمَن مُکُنه وَ وِرَ همی گُفت: «هَمَتو پاک نیسید.»
12بَعدِ ایکه عیسی پاآشُونِه شُشت، رَداشِ وَرش کِرد وُ هَنی سَرِ سفرَه شام نِشِس. اوسِه اَزِشو پُرسی: «آیا او چیی که وِرَتو کرِدَم فَمِسید؟ 13شما مَنه استاد وُ آقا هِنا مُکنید وُ دُرُس هم مُوئید وِرِ ایکه ایجورِم. 14پَ اَیَر مَه که آقا وُ استاد شمانِم پاآتونِ شُشتِم شما هم باید پاآ هَمدیَرِنِه بَشُورید. 15مَه وا ایی کار سرمشقی وِ شما دام تا شمانَم، همیجور رفتار کنید که مَه وا شما کرِدِم. 16حقیقتِ وِ شما موئِم، نه غُلام اَ آقا خُیِش بزرگتَرَ نه رَسول اَ او که فِرسیَش. 17ایسِه که اینانِ مینید خُوشالِتُو اَیَر اونان وِ کار بِیرید.
18او چیی که مُوئِم دِبارَه هَمَه شما نیسا. مَه اونایی نِه که انتخاب کِردِمَ مِشناسِم. امّا ایی نوشتِه مقدّس وِ حقیقت مِرَسَه که مُوئَه”او که نُونِ مَنِه مُخورَ وا مَه وِ دُشمنی وُریسائَه“. 19پَ اینِنِ ایسِه پیش اَزی که اتفاق بِفتهَ وِ شما مُوئِم تا موقعی که اتفاق اِفتا، باوَر کنید که مَه هِسِم. 20وِ راسی وِ شما موئِم ، هر کهَ او که مَنِه فِرسیَ قَوول کُنه مَنه قَوول کِردهَ و هرکه مَنه قَوول کُنَه او که مَنِه فِرسیَ قَوول کِردَه.»
21عیسی بَعدِ ایکه اینِنِ گُفت دِ روح خُیِش پَریشُو شُد وَ آشکارا گُفت: «وِ راسی وِ شما مُوئِم، یکی اَ شما مَنه تسلیم دُشمن مُکُنه.» 22شایِردا وِ هم سیل کِردِن، تعجب کِردِن که اینِنِ دِ بارَه چه کسی مُوئَه. 23یکی اَ شایِردا که عیسی دُوسِش داشت نَزیک سینَه عیسی تِکیَه زیَه وی ، 24شَمعون پِطرُس وا اشاره اَ او خواس تا اَ عیسی بَپرسَه وا کیهَ. 25پَ او خُیِشِه کمی وِ عقب کَشی وُ وِ سینَه عیسی تکیه زا وُ پرسی: «آقا او کیهَ؟» 26عیسی جُواو دا: «هَمو که ایی تیکه نُونهِ بَعدِ ایکه دِ مینِه کاسه زام وِ او مییِم.» اوسِه تیکه ای نُو دِ مینِه کاسه زا وَ اونِه وِ یهودا پسر شَمعون اَسْخَریوطی دا. 27یهودا هَمی که لُقمَنِه گِرِفت شیطُو رَفت دِ مینِش. اوسِه عیسی وِ او گُفت: «او چیی که دِ دُمِ اَنجامِشی زوتَر وِ اَنجام بَرَسُن.» 28امّا هوچ کام اَ کِسایی که سَرِ سُفرهَ نِشِسَه وین منظور عیسیانِه نَفَمسِن. 29بعضیا گُمو مِکِردِن وِرِ ایکه کیسَه پول دَخل وُ خرج دس یهوداَ عیسی وِ او مُوئَه که «هَر چی وِرَ عید نیازَه بَسُونَ»، یا ایکه چیی وِ فُقَرا بَیَه. 30بَعدِ خُوردِن لُقمَه، یهودا فِورن رَفت دَر. وَ شُو شد.
حکمی تازه
31بَعدِ ایکه یهودا رَفت دَر، عیسی گُفت: «ایسِه پسر انسان جلال پیا کِرد وُ خدا دِ او جلال پیا کِرد. 32اَیَر خدا دِ او جلال پیا کِرد، پَ خدا هم اونِه دِ خُیِش جلال مییَه وُ اونِه بلافاصِلَه جَلال مییَه. 33اولادای عزیزِم، مُدَت کم دیَری وا شِمانِم. مِفتید وِ جُسَنِ مَه وُ هَموجور که وِ یهودیا گُفتِم ایسِه وِ شما هم مُوئِم که اونچو که مَه مِرِم شما نمِتونید بیاید. 34حکمی تازَه وِ شما مییِم، وَ اینَ که وِ هَم محبت کنید. هَموجور که مَه وِ شما محبت کِردِم، شمانَم باید وِ هم محبت کنید. 35اَ هَمی محبتِ شما وِ هَم،هَمَه مِفَمِن که شایِردا مَنید.»
36شَمعون پِطرُس گُفت: «آقا کجا مِری؟» عیسی جُواو دا: «تو ایسِه نِمِتُونی وِ جایی که مِرِم دِ دُمِه مَه بیایی؛ امّا بَعدها دِ دُمِه مَه میای.» 37پِطرُس گُفت: «آقا وِرِ چی ایسِه نِمِتونم دِ دُمِ تُو بیام؟ مَه جُونمِه دِ را تو مَلِم.» 38عیسی گُفت: «آیا جُونِتِه دِ را مَه مَلی؟ وِ راسی وِ تو موئِم، پیش اَ ایی که خروس بَخوونه سه دفعهَ مَنه انکار مُکنی.»
Currently Selected:
انجیل یوحنا 13: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
