انجیل یوحنا 11
11
مُردن ایلعازَر
1مردی ایلعازَر نام مریض بی. او اَ مَردِم بِیتعَنْیا، دِهات مریم وُ خُواَرِش مارتا بی. 2مریم هَمو زَنی بی که رو پایا خداوند رِوغَن رِخت وُ وا مویاش پایا اونِه خُشک کِرد. ایسه بِرارِش ایلعازَر مریض شیَ وی. 3پَ خُواَرا ایلعازَر وِرِ عیسی پِیغام فِرسانُ گُفتن: «ای خداوند، دوسِ عزیزت مریضَ.» 4عیسی وَختی ایی خَوَرِنِه شِنُفت گُفت: «ایی مریضی وِ مرگ خَتم نِمِشهَ بَلکه وِرِ جَلالِه خداَ تا پسر خدا وِ واسطۀ او جَلال پیا کُنه.» 5عیسی، مارتا وُ خُوَاَرِش وُ ایلعازَرِ نِه دوس داشت. 6پَ وَختی شِنُفت که ایلعازَر مریضَ دو رو دیَر هم دِ جایی که بی، مُن.
7او وَخت وِ شایِرداش گُفت: «بیاید هَنی وِ یهودیه بَریم.» 8شایِرداش وِش گُفتن: «استاد چیی اَزِش نَرَفتَه که یهودیا ماخاسن سنگسارِت کُنَن وُ تو هَنی ماخای بَری وِ اونچو ؟» 9عیسی جُواو دا: «مَیَر روز، دُوآزَ ساعت نیسا؟ اونی که دِ روز را بَرَ پاش وِ چیی گیر نِمُکنه که بِفتهَ وِرِ ایکه نورِ ایی دنیانِه مُویینهَ. 10امّا اَیَر کِسی دِ شُو را بَرَ پاش گیر مُکنَه وِ چیی وُ مِفتَه، وِرِ ایکه نور دِ ”شُو“ نیسا.» 11بَعدِ ایی حرفا وِشو گُفت: «دوسِمُو ایلعازَر خُفتیهَ امّا مَه مِرِم که اَ خِوُ بیارِش کُنِم.» 12شایِرداش وِش گُفتن: «آقا اَیَر او خُفتیهَ،خُو مِشَه.» 13امّا عیسی اَ مرگ او صُوَت مِکرد، دِ صُورَتی که شایِرداش گُمو مِکِردن منظورِ عیسی اینَه که ایلعازر خِوُش بُردهَ وُ استراحت مُکُنهَ. 14اوسِه عیسی آشکارا وِشو گُفت: «ایلعازَر مُردَه. 15وَ وِ خاطرِ شما خُوشالم که اونچو نَوییِم، تا ایمان بیارید.اما ایسِه وَرِ او بَریم.» 16توما، که معروف بی وِ لِفُونَه وِ شایِردا دیَر گُفت: «بیاید ایمانَم بَریم تا وا او بَمیریم.»
مَه قیامت وُ حیات هِسِم
17وَختی عیسی وِ اونچو رَسِس فَمِس که چار روزَ که ایلعازَرنِه هشتِنَ دِ قَبر . 18بِیتعَنْیا نزیکِ نیم فَرسَخ وا اورشلیم فاصِلَه داشت. 19یهودیا زیادی وَرِ مریم وُ مارتا آمیَ وین تا اونان وِرِ مرگ بِرارشُو تسلی بییَن. 20وَختی مارتا شِنُفت که عیسی میایَ اونچو وِ استقبالش رفت امّا مریم دِ خُونَه مُن. 21مارتا وِ عیسی گُفت: «ای خداوند، اَیَر اینچو بییی بِرارِم نِمِمُرد. 22امّا مینِم که همی الانَم هر چی اَ خدا بَخوایی خدا وِ تو مِیَه.» 23عیسی وِش گُفت: «بِرارِت زِنَه مِشَه.» 24مارتا وِش گُفت: «مینِم که دِ روزِ قیامت زِنَه مِشهَ.» 25عیسی گُفت: «قیامت وُ حیات مَنِم او که وِ مَه ایمان بیارَه، حتی اَیَر بَمیرَه، هَنی زِنَه مِشَه. 26وُ هر کهَ زِنَه هِسا وُ وِ مَه ایمان داره، هوچ وخت نِمِمیرَ آیا اینِنِ باور مُکنی؟» 27مارتا گُفت: «بله، آقا مَه ایمان اُوُردِمَ که تونی مسیحِ موعود، پسر خدا، هَمو که باید وِ دنیا میاما.»
28اینِنِ گُفت وُ رَفت وُ خُواَرِ خُیِش مریمِ هِنا کِرد، دِ گوشه ای خلوت وِش گُفت: «استاد اینچُونَ وُ تونِه هِنا مُکُنَه.» 29مریم وَختی اینِنِ شِنُفت فِورن وُریساُ رفت وَرِ عیسی. 30عیسی هَنی داخل دِهات نشیَ وی بَلکه هَمو جایی بی که مارتا رفتَ وی وِ دییِنِش. 31یهودیائی که وا مریم دِ خونه وییِن وُ اونِه تسلی مِدان وختی دِیِین مریم وا عجِلَه وُریسا وُ رفت دَر رفتِن دُمِش. گُمو مِکِردن سَرِ قَبر مِرَ تا دِ اونچو بَگورگَه. 32وَختی مریم وِ اونچو که عیسی بی رَسِس وُ اونِه دیی، وِ پاش اِفتا وُ گُفت: «آقا اَیَر اینچو بییی بِرارِم نِمِمُرد.» 33وَختی عیسی گورگَه زاری مریم وُ یهودیایی که واردِش بینِ دیی، دِ مینِه خُیِش منقلب شد وُ سخت پَریشُو شُد. 34پُرسی: «اونِه کجا هَشتیتَ؟» اونا وِش گُفتن: «آقا بیا وُ سیل کُ.» 35عیسی سیل کردُ اَشک رِخت. 36اوسِه یهودیا گُفتن: «سیل کنید چَنی اونِه دوسِ داشتَه!» 37امّا بعضیاشو گُفتِن: «مَیَر او که چِشا او مرد کورِنِه وا کِرد، نِمِتُونِس کاری کُنَه ایلعازر نَمیرَه؟»
زِنَه شییَنِ ایلعازَر
38اوسِه عیسی، هَنی مُنقَلِب شد، سرِ قَبر آما. قبر غاری بی که رو دَهَنَش سنگی هَشتَه وین. 39عیسی گفت: «سنگ نِه وُردارید.» مارتا،خُواَرِ مُردَه گُفت: «آقا ایسِه حَتمن بوگَن کِردَ، وِرِ ایکه چار رو ازِش رَفتَه.» 40عیسی وِ او گُفت: «مَیَر وِ تُو نَگفتم که اَیَر ایمان داشته وایی جَلالِ خدانِه مُویینی؟» 41پَ سنگ نِه وُرداشتِن. او وخت عیسی وِ بالا سیل کِرد وُ گُفت: «بواَ، تونِه شکر مُکُنِم که مَنِه شِنُفتی. 42مَه مینِسِم که همیشه مَنِه مِشنُوی. امّا اینِنِ وِ خاطرِ کِسایی گفتِم که دِ اینچو حاضِرَن، تا باوَر کُنن که تو مَنه فِرسییی » 43اینِنِ گُفت و بَعد وا صدایی بُلن هِنا کِرد: «ایلعازَر، بیا دَر!» 44بَعد او مُرده، دَس وُ پا بسَه دِ کَفِه وُ لَچِکی دُورِ روش پیچِسَه، دِراما عیسی وِ اونا گُفت: «او نِه وا کنید و بَلید بَرَ.»
نَخشَه قتل عیسی
45اوسه تِعداد زیادی اَ یهودیا که وِ دییِنِ مریم آمیَ وین وُ کار عیسانِه دیدَ ویِن وِ او ایمان اُوُردِن. 46اما بعضی اَ اونا وَرِ علمای فِرقَه فَریسی رَفتِن وُ اونانِ اَ او چیی که عیسی کِردَ وی، واخَور کِردَن. 47پَ سران کاهنا وُ فَریسیا نِشِسِن وِ مشورت کِردِنُ گُفتِن: «شی کنیم؟ایی مرد، نِشونِه آ وُ مِعجِزات زیادی مُکُنَه. 48اَیَر بَلیم هَمی جور پیش بَرَ همه وِ او ایمان میارَن، وُ رومیا میان، ایی مَکان وُ ایی مِلَتِن نِه اَ دَس اِیما مِسُونَن.» 49امّا یکیشو وِ اسم قیافا، که دِ او سال کاهن اعظم بی، وِ بقیه گُفت: «شما هوچی نِمِینید، 50وُ فِکر نِمُکُنید که صَلاحتو دِ اینَ که ایی یِه نَفَر وِرِ قُوم بَمیرَه، تا ایکه تمام ملت نابود بَشَه.» 51امّا ایی صُوَت اَ خُیِش نَوی، بَلکه عِلَتِش ایی بی که دِ او سال کاهن اعظم بی، ایجور نبوت کِرد که عیسی وِرِ مِلَت مِمیرَ، 52وُ نَه فقط وِرِ ملت، بَلکه تا اولادای خدا نِه که توچِسِنَ دِ یه بدن جمع کنَه . 53پَ، اَ او رو وِ بعد نَخشه آ کَشین تا اونِه بَکُشَن.
54اَ ایی رو عیسی دیَه آشکارا دِ مینه یهودیا آمَد وُ شُد نِمِکرِد، بَلکه وِ شَری وِ اسم اِفرایِم دِ ناحیهای نَزیک وِ بیاوُو رَفت وُ واردِ شایِرداش دِ اونچو مُن.
55وَختی عید پسَخ یهودیا نَزیک شد، گروه زیادی اَ جایا جور وا جور وِ اورشلیم رفتِن تا آدابِ پاکی قبلِ عیدِ پسَخ نِه وِجا بیارَن. 56اونا عیسی نِه مِجُسِن وَ هَموجور که دِ صحن معبد وایسیَ وین وِ هم مِگُفتن: «چی گُمو مُکُنید؟ یعنی هوچ وِ عید نمیا؟» 57امّا سران کاهنا وُ فَریسیا دستور دیَه ویِن که هر وَخت کِسی فَمِس عیسی کُجانَ خَوَر بَیَه تا بیرَنِش.
Currently Selected:
انجیل یوحنا 11: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
