کارا رسولا 1
1
وَعدِۀ روحالقدس
1تِئُوفیلُوس، مَه کلام اول خُیِمِ، دِبارَه تمام کارایی نوِشتِم که عیسی اَ اِبتدا اَنجام دا وُ شروع کِرد وِ تعلیم دیَنِشو، 2تا او روزی که وِ واسطِۀ روحالقدُس، دستوراتی وِ رسولای مُنتَخب خُیِش دا وُ بعد او وِ آسمُو بُرده شُد بالا. 3عیسی بعد عِذاو کَشیَنِش، خُیِشِه وِ رسولا آشکار کِرد وَ وا دَلایِل زیادی وِاونا ثابت کِرد کِه زِنَه شیَ. اوسِه تا چِل رو وِاونا ظاهر مِشُد وُ دِبارَه پادشاییِ خدا واشُو صُوَت مِکِرد. 4عیسی وَختی که هَنی واردِ رسولا بی وِشو دستور دا: «اَ اورشلیم هوچ نَرَن دَر، بَلکه چِش وِ را او وَعدِۀ بواَ بان وَ وِشو گفت:شما اَ مَه شِنُفتِید، 5وِرِ ایکه یحیی وا اُو تعمید مِدا اما چن رو اَزِش نِمیزَرَ که شما وا روحالقدس تعمید مِیرید.»
6اوسِه وَختی که دُورِ هم جمع بییِن ازِش پُرسییِن: «ای خداوند، یعنی زِمانش رَسِسَ که اَ نُو پادِشاییِ نِه وِ اسرائیل وُریَردُنی؟»
7عیسی وِاونا جواو دا: «لازم نیسا که شما وَخت وُ زِمانایی که بُواِ آسمُونی دِ اختیارِ خُیِش نیا داشتَه،بَنِسَوایید. 8امّا وَختی که روح القدُس رو شما قِرار بِیرَ،شما قدرت مِیرید وَ دِ اورشلیم وُ تمام یهودیَه وُ سامِرَه وُ دِ گُلَه،گُلَه دنیا وِ مَه شهادَت میید».
9بعد ایکه عیسی ایی صُوَتا نِه کِرد،وِ بالا بُردَ شد وَ ابری او نِه دِ وَرِ چشاشو گِرِفت دِ مینِ خُویِش. 10وَ همی که داشت مِرَفت بالا وَ هَنی رسولا هَمو جور خیرَه شیَ وییِن وِ آسمُو، یِیهو دوتا مرد،لواس سفید دِ وَر، وایسان وَرِ اونا 11وُ گُفتِن: «ای مردایِ جَلیلی، وِرَ شی ایجور وایسی یِین وُ خیرَه شی یِین وِ آسِمُو؟ همی عیسی که اَ مینِتُو بُرده شد وِ آسمُو، هموجور که دییِد رفت وِ آسُمو، هَنی وُرمیَردَ میا».
انتخابِ مَتیاس وِ جا یهودا
12اوسِه شایِردا اَ کُوئی که معروف وِ زِیتُو بی وُریَشتِن وِ طرف اورشلیم. راءِ او کُو تا اورشلیم بیشتَر اَ یِه روزِ شَبات نَوی یعنی او قَدی که اجازَه داشتِن دِ او رو اَ خُونَه دور بان. 13همی که رَسِسِن، رفتِن وِ بالاخُونِهای که د اونچو اقامَت داشتِن. اونا پِطرُس وُ یوحنا، یعقوب وَ آندِریاس، فیلیپُس وَ توما، بَرتولما وَ مَتی، یعقوب پسر حَلفای وُ شَمعونِ غَیور وُ یهودا پسر یعقوب بییِن. 14همَشو واردِ زَنا وَ همی جور مریم نِنَه عیسی وُ بِراراش،یِ دل وَختِشُو نِه وَقفِ دعا مِکِردَن.
15یکی اَ او روزا پِطرُس وایسا دِ مینِ ایماندارا که همه شو وا هم نَزیکِ صَد وُ بیست نَفَر بییِن، 16اوسِه گُفت: «ای برارا، او نوشتۀ کِتاوا مقدس، باید وِ حقیقت مِرَسَس،که اَ زوتَر روحالقدُس اَ زِوُونِ داوود پادشا دِبارَه یهودا، هَمونی که راهنما اونا بی که عیسی نِه دستگیر کِردَن، پیشگویی کِردَه وی. 17وِرِ ایکه او یکی اَ اِیما بی وُ سَهمی اَ ایی خدمَت داشت.
18یهودا وا پاداشِ شِرارتِ خُیِش گُلَه زِمینی خَری وُ دِ او وا رو کُفتِس وِ زِمی، وَ اَ مینجا توقِس وُ میندِلِش تمام رِختِس دَر. 19تمام مَردِمِ اورشلیم اَ ایی جریان واخور شوئِن وَ وِ زوُونِ خُیِشُو اسم اونچو نِه هَشتِن ”حَقِل دَما“، یعنی زِمینِ خِوُن.
20وِرِ ایکه دِ کِتاوِ زَبور نوشته شیَ:
”خُونَهش بَرُمَه
وَ هُوشکَه اونچو سکونَت نَکُنَه“
وَ هَمیجور آمییَ:
”ماموریَتِش وِ دیَری سِپُردَه بَشَه“
21وِ ایی خاطر باید یکی اَ او مَردایی که دِ تمام مدّتی که عیسی خداوند واردِمُو آمد وُ شد داشت، 22یعنی اَ روزی که یحیی، عیسی نِه تعمید دا تا روزی که عیسی اَ وَرِمو بُرده شد بالا، دِ مینِ اِیما بیَ، باید وِ عنوانِ شاهدِ زِنَه شیَنِ عیسی، بیا وُ وِمواِضافَه با.»
23پَ اسم دوتا مرد نِه پیش کَشیِن: یوسفِ نِه که وِش مِگُفتن بَرسابا وَ او نِه وِ اسم یوستوس هَم مِشناختِنِش، وُ مَتیاسِ نِه. 24اوسِه ایجور دعا کِردَن: «تو ای خداوند، تو که اَ دِلِ همَه واخَوَری. وِرَمو آشکار کُ کامی اَ ایی دو نَفَرِ نِه انتخاب کِردِی، 25تا ایی خدمتِ رسالتِ نِه وِ عُهدَه بیرَ، خدمتی که یهودا ازِش رو وُرییَشتُن وَ رَفت وِ او جاکَه خُیِش». 26اوسِه پِشک اِناختن وَ پِشک اِفتا وِ اسم مَتیاس. وُ ایجوری او رَفت دِ شُمارِ یازَه رسول.
Currently Selected:
کارا رسولا 1: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
