Ovafilippi 3
3
Kristus aika oye e li ouvyuuki watjatjili
1Iya uke, vakwetu, hulukwen̯i muMuhona! Oku mu sonekululila ovipuka hembi kaatji ndjulithwa, iya matji mu pameke. 2Lungamenen̯i odhombwa ndhoka, lungamenen̯i ovaundapi mboka ovavi, lungamenen̯i mboka mbave litangela etanda. 3Mbatwa pita etanda lyatjatjili ombatu undapela Kalunga mOmbepo yaKalunga, mbatu litangela muKristus Jesus, nt̯e katu liun̯ikile movipuka vyountu, 4naame wo nandaku tiwa mbe tje liun̯ika movipuka vyountu. Andaa pe na nguma soko okuliun̯ika movipuka vyountu, ame mbe tje soka ovipuka vyountu okupon̯a puye. 5Ame mba pitithwa etanda metango etyapandutatu, ame ndjiMwiisraeli owomeanda lyaBenjamin, Omuheberiheberi, Omufarisai ngundji kambulitha oveta yOvajuda,#Ovil. 23:6; 26:5; Rom. 11:1 6mouvandhi mba tatetha eongalo, mouvyuuki woveta ame hí na tja ombedhi.#Ovil. 8:3; 22:4; 26:9-11 7Iya ovipuka mbimba li andji na okunganyana, iya ovipuka mbyoka mena lyaKristus kavi na tjilinga. 8Iinga ovipuka avihe himbe vi yeleke nokwiiwa Kristus Jesus, Muhona wandje, ovipuka avihe mbe vi yetha mena lye, mba tala okutya kavi na tjilinga, okutya ame me nganyana Kristus, 9ame ndji moneke muye, hamouvyuuki wandje womoveta, iya owomeitavelo lyomuKristus, ouvyuuki waKalunga mbwaa kulama meitavelo. 10Ame me hala okwiiwa Kristus, nodhonkono dhokwiimuka kwe kout̯e noukumo womatatetho e, nomet̯o lye ndji lithe kuye, 11ame ndji thike ko keimuko kout̯e.
Ontanto yomukriste
12Hakutya mbe tji pewa ae ne mba hwile po. Ame me tji dhamukile, ndji kale natjo, ngaKristus Jesus hiaa nganyana ame. 13Vakwetu, ame omwene hime tya ndji na tjo, iya otjipuka tjimo hime ningi, okudhimba ovipuka vyokon̯ima, ame ndji dhamukile ovyokomeho. 14Ame me dhamukile humaku vyuukwa, kondjambi yomeulu, Kalunga ndjee tu ithanena muKristus Jesus.
15Iya mbatwa kula mombepo, atuhe ngatu soke hinyahi, andaa mu na otjipuka hitji lili himamu soko, natjo mamu ke tji holololelwa kuKalunga. 16Iya ngaile apehe mpatwe ya, ngatu enden̯i mondjila imo.
17Vakwetu, ntjolela ndjen̯i, mu tale nawa ovantu mboka mbava enda ngahi twe mu heela.#1 Kor. 4:16; 11:1 18Iya mbe mu heela tjo ae otwingi, iya otjo me mu heele uke nomihodhi okutya ovantu mboka odhondjedhi dhomutjaakano waKristus. 19Ovantu mboka ehulilo lyawo ekeko. Edhimo lyawo olyo li li kalunga kawo. Ohon̯i yawo kuwo etumbalo. Wo va soka vala ovipuka vyokombanda yohi. 20Iya oukwatjiwan̯a wetu u li meulu, omo matu kevelele Omuhupithi, Muhona Jesus Kristus, 21nguma ka pilulula omalutu etu ngaa kundjuka, e e ninge ngolutu lwe lwetumbalo. Hehi me tji ningi kodhonkono dhe ndhimadhi ulu okutwaa ovipuka avihe kohi yetumino lye.
Dhimba New Testament © Bible Society in Namibia, 2010.