Ovafilippi 4
4
Omapukululo
1Vakwetu n̯e, ovahivilikwa vandje mbamba dhimbaluka, on̯e ehuluko lyandje nohala yandje. Vahivilikwa, kalen̯i amwa kola muMuhona.
2Euodia naSintike me mu pukulula, mu kale amu na omalipulo amo muMuhona. 3Iinga, naove wo omupopili wandje watjatjili, me ku pula, u popile ovakadhintu hemba, mena lyokutya va kondjela ondaka ombwa pamo naame, wo va undapa pamo naKlemens novapopili vakwetu mboka mbave na omana awo membo lyomwenyo.
4Hulukwen̯i muMuhona apehe! Me mu heele uke okutya hulukwen̯i!
5Olweembya lwen̯i ngalu moneke kovantu avehe. Muhona u li popedhi. 6Hámu kala amu na otjiho natja, iya outhona wen̯i u heelen̯i Kalunga momaalikano, mokukumba nomokupandula. 7Ouwa waKalunga, mbwaa pon̯a ounongo auhe wountu ngau amene omitima vyen̯i nomalipulo en̯i muKristus Jesus.
8Iya, vakwetu, thongononen̯i otjipuka atjihe soka hitji li otjatjili, nahitja tumbala, nahitja vyuuka, nahitja kohoka, nahitji holwe, nahitja tumbalekwa, kutya onteto ombwa ne ompandu, 9ovipuka hembi avihe mbimwe lilonga nambimwa tambula nambimwa tyaa nambimwa mona mwaame, vi ningen̯i. Kalunga kouwa nga kale pamo nan̯e.
Ompandu kovipuka vyotjali
10Ame napano mbe hulukwa unene muMuhona, mena lyokutya mwa yandhumuka okunt̯ila otjiho ngahi mwa li amamu hala oku tji ninga lukulu, atjaa kamu mwene oluvedhe oku tji ninga. 11Hamena lyokutya ndji na oluhepo, otjo me popile hinyahi, monkalo aihe mbe lilonga okutya hindji na tjo tja ntjulu. 12Ame okukala moluhepo ndji tji i, okukala mekuta ndji tji i. Avihe mbe vi ilila, okukala ambe kuta ne okut̯a ondjala, okukala mekuta ne moluhepo. 13Ovipuka avihe me vi ulu muKristus nguma nkoleke.
14Nandaku tiwa otjo nyahoka mwa ninga nawa, himu na oupanga naame moudheu wandje. 15Napano nan̯e wo Ovafilippi, mu tji i okutya himba uta okuteetha ondaka ombwa, himba dha koMakedonia, kape na tja eongalo nolimo ndyee litwaa kumo naame okuhava hitja yandjwa nahitja tambulwa, kakele vala kan̯e.#2 Kor. 11:9 16Iya tainkolo mba li noluhepo moTessalonika mwa ntumina epopilo, hatjikando tjimo vala, iya ovingi.#Ovil. 17:1 17Hatjali me hala, iya me hala okutya n̯e ovene mu limonene otjingi, hitja hulu. 18Iya ovipuka avihe mbe vi pewa, ndji na hitja hulu, pa hupu. Mba yowoka unene himba mono soka himba etelwa kuEpafroditus, himwa ntumine otjali, matji ngala eyambo ndyaa pepa, ndyaa tambulwa, ndyee thevelwa Kalunga.#Eks. 29:18 19Kalunga kandje me mu pa atjihe himamu hepa hitji lithike pouhona we metumbalo muKristus Jesus. 20Kalunga Tate nga tumbalekwe apehe katee apehe. Amen.
Omameneko
21Menekelen̯i po ovantu ovadhilikwa avehe muKristus Jesus. Ovakwetu mbatu kala nawo mave mu menekele po. 22Ovantu ovadhilikwa avehe mave mu menekele po unene owomoyomukesari.
23Et̯ilonkenda lyaMuhona Jesus Kristus ngali kale nan̯e amuhe! Amen.
Dhimba New Testament © Bible Society in Namibia, 2010.