Ovafilippi 2
2
Elinunupiko lyaKristus nounene we
1Okukala muKristus matji mu vandhipaleke. Kristus hiee mu hole matji mu tendeleke. Iya amu na oukumo nOmbepo Ondhilikwa, n̯e mu kale nonkenda nolweembya novakwen̯i, 2hwithilen̯i po ehuluko lyandje, mu kale nomalipulo amo, mu kale amu na ohole imo, omwenyo umo, nontanto imo. 3Hámu undapa tja nokanunu mombepo yokukala amu lihole ovene ne okutaendha vala etumbalo, iya linunupiken̯i mu tumbaleke ovakwen̯i okupon̯a pun̯e ovene. 4Hó litala vala pwoove omwene, tala omukwen̯i. 5Kalen̯i nomalipulo ngangaa li naKristus Jesus.
6Kristus nandaku tiwa wa li Kalunga,
ke liyulikile okutya oKalunga.
7Iya we lidhula oukalunga,
he liningi ngomupika,
he litha kovantu,
nahiaa kala, u ngala omuntu.
8We linunupika katee met̯o,
iinga, katee met̯o lyokomutjaakano.
9Iya Kalunga we mu yela peulu,
he mu luku ena ndyaa pon̯a omana aehe,
10opo auhe nguu li meulu nokombanda yohi nokohi yohi
a twike odhongolo mena lyaJesus,#Jes. 45:23
11elaka alihe li tumbaleke Kalunga Ihe,
li hipulule okutya Jesus Kristus oye e li Muhona.
On̯e otjiten̯i tjouye
12Iya vahivilikwa vandje, ngahi mwa kala amamu ntee apehe, tainkolo mba li pun̯e, tyeen̯i wo unene tuu napano hihe li pun̯e. Kalen̯i amamu undapa nontilo amamu teketa mena lyehupitho lyen̯i. 13Iya Kalunga oye a undapa mun̯e okutya mu hale n̯e mu undape ngahi ma hala.
14Ovipuka avihe vi undapen̯i ahamamu tanguna, n̯e ahamu na odhombata, 15opo mu kale odhondele dhaKalunga ovakohoki mbahamu na tja otjipo mokati kekula ndyaa uvala ndihali tee. Laiminen̯i mokati kawo ngodhonyothi mouye,#Deut. 32:5 16mu kambulithe odhondaka dhomwenyo, ndji litange metango lyaKristus, opo hé ngala mba dhamuka vala ne mba undapa vala okuliulithwa.
17Iya eitavelo lyen̯i olyo li li eyambo motjilinga tjaKalunga, iya ame nande yandjwa ngeyambo, me hulukwa, me linyandaele pamo nan̯e amuhe. 18Iya nan̯e wo hulukwen̯i, linyandaelen̯i pamo naame!
Timoteus naEpafroditus
19Iya ame me liun̯ike muMuhona Jesus ndji tume Timoteus dhiva kun̯e, opo naame wo ndji hulukwe, hime tee himu li po. 20Iya ame hí na tja uke umo nguma soko ngaame, e mu t̯ile otjiho. 21Hemba avehe va taendha ovipuka vyawo ovene, havyaJesus Kristus. 22Iya n̯e onkalo yaTimoteus mu i i, hiaa kala pamo naame ngondele ae li naihe meteetho lyondaka ombwa. 23Iya hengu oye mbe liun̯ike oku mu tumina dhiva, himba mono ovipuka mbime ka ningilwa. 24Mbe liun̯ika muMuhona, ame omwene me ke ya wo dhiva.
25Ame me tala okutya matji hepwa oku mu tumina Epafroditus omukwetu, omulongi nomukwavita mukwetu, ontumwa yen̯i, nguma mpopile muhime hepwa. 26Epafroditus we mu dhimbaluka amuhe, wa li ae yuvite navi, mena lyokutya mwa tyaa okutya wa li ama vele. 27Iinga, iya wa li ama vele unene okuhala naa okut̯a. Kalunga we mu t̯ila onkenda, iya haye vala aika, naame wo wa nt̯ila onkenda, opo hé wedhelwa uke oudheu. 28Iya ame me hala unene okutuma Epafroditus, himamu mu mono uke, mamu hulukwa, naame híme etetha onkenda. 29Mu tambulen̯i muMuhona nehuluko alihe, ovantu mbave li ngaye, ve tumbaleken̯i. 30Iya we tje t̯a mena lyotjilinga tjaKristus hiaa ndjandjela omwenyo a mpopile poluvedhe lwen̯i.
Dhimba New Testament © Bible Society in Namibia, 2010.