Jakob 4
4
Oupanga nouye
1Ovilwa nomalutangu mokati ken̯i vi dha pi? Kavi dhi molwiho lwen̯i nduu kondja momalutu en̯i? 2Mu na himu hala, atjaa kamu tji mono. Mu dhipaa, mu na onki, n̯e kamu na himu mona. Mu kondja, mu lwa, n̯e kamu na himu na tjo, mena lyokutya kamu kumbu. 3Mu kumba, atjaa kamu pewa, mena lyokutya mu kumba navi, mbimu kumba, mu ke vi undapetha ngahi mamu hala ovene. 4N̯e muvayoni wolukupo. Kamu tji i okutya au na oupanga nouye, mo ile ondjedhi yaKalunga? Iya nguma hala okuliholowolela oupanga nouye, ma ile ondjedhi yaKalunga. 5Ne mamu lipula okutya Omusonekwa mau popi vala himau tyaa: “Ombepo ndjika Kalunga ndjaa twaa munt̯e, u na olwiho nayo?” 6Iya et̯ilonkenda Kalunga ndime tu pa enene unene, iya Omusonekwa mau tyaa: “Kalunga u yele ovalinomi, u t̯ila onkenda ovalinunupiki.”#Omae. 3:34 7Tyeen̯i muKalunga. Kondjethen̯i omudiapoli, iya me mu inkolo. 8Hweenen̯i kuKalunga, ye ma hweene kun̯e. Ovalundhi, kohen̯i omawoko en̯i, n̯e owomahumbakuvali, kalen̯i ovakohoki momitima vyen̯i. 9Iwen̯i oluhepo lwen̯i, etethen̯i onkenda mu lile. Ovindjola vyen̯i ngavi ile ovililo, nehuluko lyen̯i ngali ile outhiwa. 10Linunupiken̯i kotjipala tjaMuhona, ye me mu nenepeke. 11Vakwetu, hámu likuminine, nguma kuminine omukwawo ne ha tya wa puka, ma kuminine oveta, ye he i tombo. Andaa mo tombo oveta okutya koo ulu oku i hwithila po, iya mo tya oveta ya puka. 12Kalunga oye a yandja oveta, ye oye a koya, ye oye ma ulu okuhupitha ne okuhan̯auna. Ove oove an̯i ngumo ulu okukoya omukwen̯i?
Hámu linomo
13Napano teelelen̯i, hemba mbamu tyaa: “Ndino ne muhuka matu ka ya kontumba, kotjitungwalongo tjongandi matu ka kala ko ombula amatu ndingosa, hatu ka nganyana.”#Omae. 27:1 14N̯e kamu tji i okutya muhuka ku na tji ne onkalamwenyo yen̯i i li vi. Onkalamwenyo yen̯i i ngala omwithi mbuu ya po vala omununu, tjau hau handjana po. 15Ngaile mu popya wo amamu tyaa: “Muhona andaa me tji hala, atjaa ame he kala wo nomwenyo, me ka undapa otjontumba ne otjongandi.” 16Iya napano mu litanga, mu linoma, okulinoma huku li nyahoka kwa puka. 17Iya nguu tji i okutya u tha okuundapa ouwa, atjaa ye ahame u undapa, okutya wa lundha.
Dhimba New Testament © Bible Society in Namibia, 2010.